ຣັດເຊຍ ບໍ່ໄດ້ຖືກຮັບເລືອກໃຫ້ເຂົ້າຮັບຕຳແໜ່ງຕື່ມອີກ ຢູ່ໃນສະພາສິດທິມະນຸດຂອງອົງ ການສະຫະປະຊາຊາດ ໃນມື້ວັນສຸກວານນີ້ ຊຶ່ງເປັນການເຄື່ອນໄຫວ ທີ່ເບິ່ງກັນວ່າ ເປັນ ການຕ້ອງຕິຕໍ່ການໃຫ້ຄວາມສະໜັບສະໜຸນທາງທະຫານຂອງຣັດເຊຍແກ່ລັດຖະບານຊີເຣຍ.
ໃນການປ່ອນບັດແບບປິດລັບນັ້ນ ສະມາຊິກ 193 ປະເທດຂອງສະມັດຊາໃຫຍ່ ອົງການສະຫະປະຊາຊາດໄດ້ເລືອກເອົາສະມາຊິກ 14 ປະເທດເພື່ອເຂົ້າໄປນັ່ງ ຢູ່ໃນສະພາ ທີ່ມີສະມາຊິກທັງໝົດ 47 ປະເທດຊຶ່ງເປັນພະແນກການທີ່ສຳຄັນສຸດຂອງສະຫະປະຊາຊາດ ຮັບຜິດຊອບໃນການສົ່ງເສີມແລະປົກປ້ອງຄຸ້ມຄອງສິດທິມະນຸດ.
ຮັງກາຣີ ຊຶ່ງໄດ້ຮັບຄະນະ 144 ສຽງ ແລະໂຄເອເຊຍ ທີ່ໄດ້ຮັບ 114 ສຽງ ໄດ້ຊະນະຣັດເຊຍທີ່ໄດ້ຮັບຄະແນນແຕ່ພຽງ 112 ສຽງ. ປະເທດທັງສາມແມ່ນແຂ່ງກັນເອົາສອງບ່ອນ ນັ່ງສຳລັບຂົງເຂດ ຢູ່ໃນສະພາສິດທິມະນຸດ.
ເອກອັກຄະລັດຖະທູດຣັດເຊຍປະຈຳອົງການສະຫະປະຊາຊາດ ທ່ານ Vitaly Churkin ບໍ່ໄດ້ຄວາມສຳຄັນຕໍ່ການສູນເສຍບ່ອນນັ່ງດັ່ງກ່າວຂອງມົສກູ.
ທ່ານ Churkin ກ່າວຕໍ່ພວກນັກຂ່າວວ່າ ມົສກູໄດ້ປະເຊີນໜ້າກັບການແຂ່ງຂັນຢ່າງໜັກ ໂດຍເວົ້າວ່າ “ມັນເປັນການລົງຄະແນນສຽງ ທີ່ໃກ້ຄຽງບກັນ. ໂຄຣເອເຊຍ ຮັງກາຣີ ເຂົາເຈົ້າໂຊກດີຍ້ອນວ່າ ຂະໜາດຂອງເຂົາເຈົ້າບໍ່ໄດ້ຖືກເຜີຍແບໃສ່ກະແສລົມການທູດນາໆຊາດປານໃດ ແຕ່ຣັດເຊຍແມ່ນໄດ້ຖືກ.”
ທ່ານກ່າວຕື່ມວ່າ “ພວກເຮົາໄດ້ຢູ່ທີ່ນັ້ນ ເປັນເວລາຫລາຍໆປີມາແລ້ວ. ຂ້າພະເຈົ້າເຊື່ອໝັ້ນວ່າເທື່ອໜ້າພວກເຮົາຈະເຂົ້າໄປຢູ່ໃນນັ້ນອີກ”. ການກຳຕຳແໜ່ງຂອງຣັດເຊຍຢູ່ໃນສະພາດັ່ງກ່າວເວລານີ້ ຈະໝົດອາຍຸລົງໃນວັນທີ 31 ທັນວານີ້.
ມີອົງການຈັດຕັ້ງສິດທິມະນຸດຫລາຍກວ່າ 80 ອົງການໄດ້ວິ່ງເຕັ້ນໃຫ້ບັນດາປະເທດສະ ມາຊິກຂອງອົງການສະຫະປະຊາຊາດລົງຄະແນນສຽງປົດຣັດເຊຍອອກຈາກສະພາດັ່ງ ກ່າວ ຍ້ອນໃຫ້ການສະໜັບສະໜຸນ ຕໍ່ປະທານາທິບໍດີຊີເຣຍ ທ່ານ Bashar al-Assad ໃນສົງຄາມກາງເມືອງທີ່ດຳເນີນມາເກືອບ 6 ປີແລ້ວນັ້ນ.
