ປະທານາທິບໍດີຢູເຄຣນ ທ່ານໂວໂລດີເມຍ ເຊເລັນສກີ ກ່າວໃນວັນສຸກມື້ນີ້ວ່າ ຣັດເຊຍ ໄດ້ທໍາການໂຈມຕີຢ່າງຮຸນແຮງໃສ່ ຢູເຄຣນ ດ້ວຍການຍິງລູກສອນໄຟຫຼາຍກວ່າ 90 ລູກ ແລະເຮືອບິນບໍ່ມີຄົນຂັບທີ່ຜະລິດໂດຍອີຣ່ານອີກ 60 ລຳ, ອີງຕາມລາຍງານຂອງອົງການຂ່າວ AFP.
ທ່ານກ່າວວ່າ "ມີເຮືອບິນບໍ່ມີຄົນຂັບ 'Shaheds' ຫຼາຍກວ່າ 60 ລຳ ແລະລູກສອນໄຟປະເພດຕ່າງໆເກືອບ 90 ລູກໃນການໂຈມຕີເວລາກາງຄືນນັ້ນ."
ທ່ານກ່າວອີກວ່າ "ໂລກເຫັນເປົ້າໝາຍຂອງພວກກໍ່ການຮ້າຍຣັດເຊຍຢ່າງຈະແຈ້ງທີ່ສຸດ ເທົ່າທີ່ເປັນໄປໄດ້ເຊັ່ນ: ໂຮງງານໄຟຟ້າ ແລະສາຍສົ່ງພະລັງງານໄຟຟ້າ, ເຂື່ອນໄຟຟ້ານ້ຳຕົກ, ຕຶກອາຄານທີ່ຢູ່ອາໄສທົ່ວໄປຂອງປະຊາຊົນ, ຫຼືແມ່ນແຕ່ ລົດເມແລ່ນເທິງລາງໄຟຟ້ານໍາດ້ວຍ."
ກະຊວງພາຍໃນຂອງຢູເຄຣນກ່າວວ່າ ການໂຈມຕີດັ່ງກ່າວໄດ້ສັງຫານຢ່າງໜ້ອຍ 2 ຄົນ ແລະມີຜູ້ບາດເຈັບອີກ 14 ຄົນ, ໃນຂະນະທີ່ 3 ຄົນຍັງຄົງຫາຍສາບສູນ.
ທ່ານກ່າວຕື່ມວ່າ "ບັດນີ້ ການບໍລິການຂອງພວກເຮົາທັງຫມົດ ແມ່ນພົວພັນກັບການກຳຈັດຜົນທີ່ຕິດຕາມມາຂອງການໂຈມຕີ. ພວກເຮົາໄດ້ໃຊ້ອຸປະກອນຫຸ່ນຍົນໃນຂົງເຂດທີ່ອັນຕະລາຍ ເພື່ອຫຼຸດຜ່ອນການບາດເຈັບຕໍ່ພະນັກງານກູ້ໄພຂອງພວກເຮົາ."
ອີກຄັ້ງນຶ່ງ, ທ່ານ ເຊເລັນສກີ ໄດ້ຮ້ອງຂໍໃຫ້ມີອາວຸດຈາກຕາເວັນຕົກເພີ້ມເຕີມ.
ທ່ານກ່າວວ່າ "ລູກສອນໄຟຂອງຣັດເຊຍບໍ່ມີຄວາມຫຼ້າຊ້າເລີຍ, ເຊັ່ນດຽວກັບຊຸດການຊ່ວຍເຫຼືອໃຫ້ແກ່ປະເທດຂອງພວກເຮົາ. 'Shahed' ບໍ່ມີການຕັດສິນໃຈໃດໆ ຄືກັບນັກການເມືອງບາງຄົນ. ມັນເປັນສິ່ງສຳຄັນທີ່ຈະເຂົ້າໃຈຜົນຂອງຄວາມຫຼ້າຊ້າ ແລະການຕັດສິນໃຈໃນການເລື່ອນເວລາອອກໄປ.
"ພວກເຮົາຈໍາເປັນຕ້ອງມີການປ້ອງກັນທາງອາກາດເພື່ອປົກປ້ອງປະຊາຊົນ, ປົກປ້ອງພື້ນຖານໂຄງລ່າງ, ບ້ານເຮືອນທັງຫຼາຍ ແລະເຂື່ອນຕ່າງໆ. ບັນດາຄູ່ພາຄີຂອງພວກເຮົາຮູ້ດີວ່າ ສິ່ງໃດຈໍາເປັນ. ແນ່ນອນ ພວກເຂົາເຈົ້າສາມາດສະໜັບສະໜຸນພວກເຮົາ, ຊີວິດຕ້ອງໄດ້ຮັບການປົກປ້ອງຈາກຜູ້ທີ່ບໍ່ແມ່ນມະນຸດຈາກມົສກູເຫຼົ່ານັ້ນ."
ຟໍຣັມສະແດງຄວາມຄິດເຫັນ