ປະຊາຊົນຫລາຍສິບພັນຄົນພາກັນຫລັ່ງໄຫລເຂົ້າສູ່ຖະນົນຫົນທາງໃນນະຄອນຫລວງ
ໂມສໂກ ແລະຫົວເມືອງອື່ນໆທົ່ວປະເທດຣັດເຊຍ ເມື່ອວັນ ເສົາວານນີ້ ເພື່ອປະທ້ວງການ
ສໍ້ໂກງຄະແນນສຽງ ໃນການເລືອກຕັ້ງເອົາສະມາຊິກສະພາແຫ່ງຊາດຕາມທີ່ມີການກ່າວ
ຫາທີ່ຊະນະໂດຍພັກ United Russia ທີ່ກໍາລັງປົກຄອງປະເທດຂອງນາຍົກລັດຖະມົນຕີ
Vladimir Putin ນັ້ນ.
ຕໍາຫລວດລາຍງານວ່າ ພວກເດີນຂະບວນປະທ້ວງຢ່າງໜ້ອຍ 20,000 ຄົນ ທີ່ຈະຕຸລັດ
Bolotnaya ຂອງໂມສໂກ ທີ່ຢູ່ຝັ່ງກົງຂ້າມກັບວັງເຄຣມລິນ ເຖິງແມ່ນພວກຈັດການປະ
ທ້ວງໃຫ້ຕົວເລກປະມານ 50,000 ຄົນນັ້ນ. ພວກເຈົ້າໜ້າທີ່ທີ່ໂມສໂກໄດ້ອະນຸຍາດໃຫ້
ມີການເຕົ້າໂຮມກັນ 30,000 ຄົນ ທີ່ຈະຕຸລັດນີ້.
ຍົນເຮຣິຄອບເຕີ ບິນລາດຕະເວນຢູ່ເທິງນ່ານຟ້າແຫ່ງຕ່າງໆ ແລະລົດບັນທຸກພວກຕໍາ
ຫລວດຮັກສາຄວາມປອດໄພ ແລະປາບຈະລາຈົນ ໄດ້ຖືກສົ່ງໄປປະຈໍາການຢູ່ເຂດປະທ້ວງ
ຊຶ່ງເວລານີ້ຍັງບໍ່ມີລາຍງານການປະທະ ຫລືການຈັບກຸມໃດໆທີ່ແຜ່ລາມອອກໄປຢ່າງ
ກວ້າງຂວາງເທື່ອ.
ການໂຮມຊຸມນຸມກັນ ໄດ້ເລິ່ມຂຶ້ນໃນຫລາຍຫົວເມືອງອື່ນໆທົ່ວສ່ວນໃຫຍ່ຂອງປະເທດ
ໂຮມທັງເມືອງ Vladivostok ເມືອງທ່າປາຊິຟິກ ບ່ອນທີ່ ຫລາຍຮ້ອຍຄົນໄປເຕົ້າໂຮມ
ກັນນັ້ນ ມີຫລາຍໆຄົນທີ່ຖືແຜ່ນປ້າຍທີ່ອ່ານວ່າ ພວກໜູທັງຫລາຍຄວນໜີອອກໄປ.
ຢ່າງໜ້ອຍມີປະຊາຊົນ 7,000 ຄົນ ທີ່ໄດ້ເຕົ້າໂຮມກັນຢູ່ຈະຕຸລັດ St. Petersburg
ໃນຂະນະທີ່ຢູ່ໃນເມືອງ Khabarovsk ທີ່ມີຄົນຖືກຈັບກຸມ ຢ່າງໜ້ອຍ 30 ຄົນ ຫລັງ
ຈາກການປະທ້ວງທີ່ບໍ່ໄດ້ຮັບອະນຸຍາດຢ່າງ ເປັນທາງການໄດ້ເລີ່ມຂຶ້ນ ນອກນີ້ແລ້ວ
ຍັງມີລາຍງານວ່າມີພວກປະທ້ວງ ຢູ່ຫລາຍໆຫົວເມືອງໃນໄຊບີເຣຍນັ້ນນໍາ.
ການໂຮມຊຸມນຸມກັນຢູ່ແຫ່ງຕ່າງໆ ຕິດຕາມມາດ້ວຍການກວາດລ້າງຢ່າງຮຸນແຮງ
ໃນການເດີນຂະບວນປະທ້ວງຫລາຍບັ້ນໃນຕົ້ນອາທິດນີ້ ຫລັງຈາກພັກຂອງທ່ານ
ພູຕິນ ຊະນະການເລືອກຕັ້ງສະມາຊິກສະພາເມື່ອວັນອາທິດຜ່ານມານັ້ນ.
