ໜັງສືພິມແນວໜ້າຂອງອັງກິດໄດ້ເວົ້າວ່າ ຣັດເຊຍ ແລະ ຈີນ ໄດ້ຖອດລະຫັດ ເອກະສານລັບສຸດຍອດທີ່ຖືກລັກຂະໂມຍໂດຍອະດີດ ພະນັກງານ ສືບລັບສັນຍາຈ້າງຂອງ ສະຫະລັດ ທ້າວ Edward Snowden ຈຶ່ງບັງ ຄັບໃຫ້ເຈົ້າໜ້າທີ່ອັງກິດ ຕ້ອງຖອນນັກສືບຂອງຕົນອອກຈາກ “ການປະຕິບັດການທີ່ກຳລັງດຳເນີນຢູ່ໃນ
ປະເທດທີ່ເປັນສັດຕູ.”
ໜັງສືພິມ Sunday Times ກ່າວວ່າ ການຖອນເຈົ້າໜ້າທີ່ ໄດ້ມີ ຄຳສັ່ງ ຫຼັງຈາກ Moscow ສາມາດເຂົ້າເຖິງເອກະສານລັບ ທີ່ຖືກຖອດລະຫັດເປັນລ້ານສະບັບທີ່ ທ້າວ Snowden ຄອບຄອງຢູ່ ໃນຕອນທີ່ລາວໄດ້ໜີອອກຈາກ ສະຫະລັດ ໃນປີ 2013.
ແລະ ບໍ່ດົນຕໍ່ມາ, ລາວໄດ້ຂໍການຄຸ້ມຄອງຂອງປະທານາທິບໍດີຂອງ ຣັດເຊຍ ທ່ານ Vladimir Putin, ທີ່ອະນຸຍາດໃຫ້ລາວ ເຂົ້າໄປລີ້ໄພຊົ່ວຄາວໃນ ຣັດເຊຍ. ຕໍ່ມາລາວກໍໄດ້ຮັບໃບ
ອະນຸຍາດໃຫ້ພັກພາອາໄສເຊິ່ງ ອະນຸຍາດໃຫ້ລາວເດີນທາງຢ່າງເປັນອິດສະຫຼະໃນແຜ່ນດິນຂອງ ຣັດເຊຍ.
ໂດຍອ້າງອີງແຫຼ່ງຂ່າວທີ່ມາຖະໜົນ Downing, ໜັງສືພິມ The Times ກ່າວວ່າ ການຖອດລະຫັດ “ໄດ້ໝາຍຄວາມວ່າ ນັກສືບຈະຕ້ອງໄດ້ຖືກເຄື່ອນຍ້າຍ ແລະ ຄວາມຮູ້ກ່ຽວກັບການທີ່ເຮົາປະຕິບັດງານແມ່ນໄດ້ຢຸດໃຫ້ພວກເຮົາໄດ້ຮັບຂໍ້ມູນທີ່ສຳຄັນຍິ່ງ.” ນອກນັ້ນຍັງໄດ້ມີການອ້າງ ຄຳເວົ້າຂອງ ເຈົ້າໜ້າທີ່ຢູ່ຫ້ອງການ ນາຍົກລັດຖະມົນຕີ David Cameron ທີ່ກ່າວວ່າ “ບໍ່ມີຂໍ້ພິສູດວ່າ ມີຜູ້ໃດຖືກທຳຮ້າຍ.”
ໜັງສືພິມສະບັບນີ້ໄດ້ອ້າງຄຳເວົ້າຈາກແຫຼ່ງຂ່າວລັດຖະບານຕ່າງຫາກ, ທີ່ກ່າວວ່າ ຈີນ ກໍຍັງໄດ້ເຂົ້າເຖິງເອກະສານ, ເຊິ່ງຍັງໄດ້ອີກເວົ້າວ່າ ຈະເປີດເຜີຍເທັກນິກການສືບລັບຂອງຕາເວັນຕົກຢ່າງກວ້າງຂວາງອີກດ້ວຍ.
