ເຮືອບິນລົບຈາກກຳປັ່ນບັນທຸກເຮືອບິນພຽງລຳດຽວຂອງຣັດເຊຍແລະເຮືອພິຄາດຕິດລູກສອນໄຟ ໄດ້ທຳການໂຈມຕີເປົ້າໝາຍຕ່າງໆຢູ່ຊີເຣຍ ໃນວັນອັງຄານວານນີ້ ໂດຍຖິ້ມລະເບີດໃສ່ເຂດຕ່າງໆທາງກ້ຳຕາເວັນຕົກສຽງໃຕ້ຂອງເມືອງ Aleppo ໃນຂະນະທີ່ເຮືອບິນຂອງລັດຖະບານຊີເຣຍເລີ້ມການໂຈມຕີດ້ວຍລະເບີດຖັງຮອບໃໝ່ໃສ່ເຂດໃຈກາງເມືອງ.
ການໂຈມຕີເທື່ອທຳອິດຂອງຣັດເຊຍຈາກກຳປັ່ນບັນທຸກເຮືອບິນພົນເອກ Kuznetsov ທີ່ ກຳລັງແລ່ນຢູ່ໃນທະເລເມດີເທີເຣນຽນ ໄດ້ບັນລະຍາຍ ໂດຍວັງເຄຣັມລິນ ໃນວັນອັງຄານວານນີ້ວ່າ ໄດ້ແນເປົ້າໝາຍໃສ່ພວກຫົວຮຸນແຮງຈັດ ໃນແຂວງ Idlib ແລະ Homs.
ກະຊວງປ້ອງກັນປະເທດຣັດເຊຍກ່າວວ່າ ເຮືອພິຄາດຂອງກອງທັບເຮືອກໍໄດ້ຍິງລູກສອນໄຟນຳວິຖີ ໃສ່ເປົ້າໝາຍຕ່າງໆ ໃນພາກເໜືອຂອງແຂວງ Idlib ຊຶ່ງເປັນບໍລິເວນທີ່ຕັ້ງຫ່າງ ຈາກເມືອງ Aleppo ໄປທາງທິດຕາເວັນຕົກສຽງໃຕ້ປະມານ 60 ຫລັກກິໂລແມັດ.
ແຕ່ແນວໃດກໍຕາມ ກະຊວງປ້ອງກັນປະເທດຢືນຢັດວ່າການໂຈມຕີຂອງຣັດເຊຍແມ່ນຈຳ ກັດສະເພາະແຕ່ເປົ້າໝາຍຂອງກຸ່ມລັດອິສລາມແລະກຸ່ມຫົວຮຸນແຮງຈັດອື່ນໆແລະໂຄສົກ ຂອງກະຊວງປ້ອງກັນປະເທດທ່ານ Igor Konashenkov ໄດ້ປະຕິເສດຕໍ່ລາຍງານຂອງສື່ມວນຊົນທີ່ໄດ້ກ່າວຫາວ່າ ເຮືອບິນຂອງຣັດເຊຍ ມີສ່ວນພົວພັນໃນການໂຈມຕີໂຮງໝໍຢູ່ເມືອງ Aleppo. ທ່ານກ່າວວ່າ ບໍ່ມີການໂຈມຕີຂອງຣັດເຊຍ ຢູ່ເມືອງ Aleppo ໃນໄລຍະ 28 ມື້ທີ່ຜ່ານມານີ້.
ທີ່ນະຄອນຫຼວງວໍຊິງຕັນ ກະຊວງການຕ່າງປະເທດສະຫະລັດ ໄດ້ປະນາມມົສກູ ຕໍ່ການໂຈມຕີຮອບໃໝ່.
ທ່ານນາງ Elizabeth Trudeau ໂຄສົກກະຊວງການຕ່າງປະເທດ ກ່າວວ່າ “ພວກເຮົາຂໍປະນາມຢ່າງແຮງຕໍ່ການໂຈມຕີທາງອາກາດຮອບໃໝ່ຢູ່ໃນຊີເຣຍໂດຍຣັດເຊຍ.” ນອກນັ້ນ ທ່ານນາງຍັງໄດ້ກ່າວຫາຣັດເຊຍວ່າຂັດຂວາງການສົ່ງອາຫານແລະຄວາມຊ່ອຍເຫຼືອອື່ນໆ ໄປເມືອງ Aleppo ໃນລະຫວ່າງ ທີ່ມີການຢຸດເຊົາຖິ້ມລະເບີດ ຊຶ່ງເປັນການກະທຳທີ່ທ່ານນາງກ່າວວ່າ ປ່ອຍໃຫ້ປະຊາຊົນອຶດຫິວໃນຂະນະທີ່ມົສກູຊອກສະແຫວງຫາການຊົມເຊີຍຈາກນາໆຊາດທີ່ໄດ້ຍຸຕິການໂຈມຕີແບບບໍ່ເລືອກໜ້າ.
ໃນອີກດ້ານນຶ່ງໃນວັນອັງຄານວານນີ້ ອົງການຂ່າວຂອງຊີເຣຍລາຍງານວ່າ ເຮືອບິນຂອງລັດຖະບານໄດ້ໂຈມຕີທີ່ໝັ້ນຂອງພວກກໍ່ການຮ້າຍ ໃນພາກຕາເວັນອອກ ເມືອງ Aleppo ຊຶ່ງເປັນເຂດ ທີ່ມີພົນລະເຮືອນອາໄສຢູ່ຫຼາຍເຖິງ 3 ແສນຄົນແລະພວກຕໍ່ຕ້ານລັດຖະບານ ທີ່ພວມຊອກຫາທາງໂຄ່ນລົ້ມລັດຖະບານຂອງປະທານາທິບໍດີ Bashar al-Assad.
ພວກນັກສັງເກດການ ຈາກກຸ່ມສິ້ງຊອມສິດທິມະນຸດ ໃນຊີເຣຍ ກ່າວວ່າ ການໂຈມຕີດັ່ງ ກ່າວແມ່ນເທື່ອທຳອິດທີ່ມີຕໍ່ກ້ຳຕາເວັນອອກຂອງເມືອງ Aleppo ນັບແຕ່ວັນທີ 18 ຕຸລາເປັນຕົ້ນມາ.
