ຄະນະຜູ້ແທນຂອງສະຫະລັດ ຣັດເຊຍ ແລະອົງການສະຫະປະຊາຊາດ ກຳລັງເຮັດວຽກເພື່ອໃຫ້ການອະນຸມັດຂັ້ນສຸດທ້າຍຕໍ່ແຜນການທີ່ອາດນຳໄປສູ່ການຟື້ນຟູການຍຸຕິຄວາມເປັນປໍລະປັກກັນ ຢູ່ໃນຊີເຣຍ ບ່ອນທີ່ການສູ້ລົບລະຫວ່າງກຳລັງລັດຖະບານ ແລະພວກຕໍ່ຕ້ານ ອາດເຮັດໃຫ້ ການດຳເນີນຄວາມພະຍາຍາມຂອງນາໆຊາດ ເພື່ອຕໍ່ສູ້ກັບກຸ່ມລັດອິສລາມແຕກຫັກລົງ.
ລັດຖະມົນຕີການຕ່າງປະເທດສະຫະລັດ ທ່ານ John Kerry ກ່າວວ່າ ຄະນະຂອງພວກເຮົາ ພາຍໃຕ້ພື້ນຖານ ລະຫວ່າງກອງທັບກັບກອງທັບ ກຳລັງເຮັດວຽກ ກ່ຽວກັບລາຍລະ ອຽດຕ່າງໆທີ່ຈຳເປັນໃນການຈັດຕັ້ງປະຕິບັດເພືີ່ອວ່າການຢຸດຍິງສາມາດຟື້ນຟູໄດ້.
ທ່ານໃຫ້ຄວາມເຫັນດັ່ງກ່າວໃນວັນອັງຄານວານນີ້ ນຶ່ງມື້ຫລັງຈາກໄດ້ທຳການພົບປະສຸກເສີນກັບພວກເຈົ້າໜ້າທີ່ກ່ຽວຂ້ອງ ຮວມທັງທູດພິເສດຂອງອົງການສະຫະປະຊາຊາດຮັບ ຜິດຊອບໃນເລື້ອງຊີເຣຍ ທ່ານ Staffan de Mistura.
ນອກນັ້ນ ທ່ານ Kerry ຍັງໄດ້ໂອ້ລົມທາງໂທລະສັບ ກັບລັດຖະມົນຕີການຕ່າງປະເທດ ຣັດເຊຍທ່ານ Sergei Lavrov. ສະຫະລັດ ແລະຣັດເຊຍແມ່ນປະທານຮ່ວມເພື່ອຄວບ ຄຸມການຢຸດຍິງຢູ່ໃນຊີເຣຍ.
ໃນຕອນເຊົ້າວັນອັງຄານວານນີ້ ທ່ານ Lavrov ກ່າວຕໍ່ພວກນັກຂ່າວວ່າ ທ່ານຫວັງວ່າຈະ ມີການຕົກລົງກັນໄດ້ ກ່ຽວກັບການຢຸດຍິງ ໃນໄວໆນີ້ ອາດຈະເປັນພາຍໃນ ບໍ່ເທົ່າໃດຊົ່ວໂມງຕໍ່ໜ້າກໍເປັນໄດ້. ທ່ານໃຫ້ຄວາມເຫັນດັ່ງກ່າວຂະນະທີ່ພົບປະກັບທ່ານ de Mistura ທີ່ນະຄອນຫຼວງມົສກູ.
ການປະຊຸມກັນຫຼາຍໆຮອບມີຂຶ້ນຫຼັງຈາກການຢຸດຍິງ ທີ່ໄດ້ປະກາດໂດຍມະຫາອຳນາດຂອງໂລກ ເມື່ອເດືອນກຸມພາຜ່ານມານີ້ ເລີ້ມໄດ້ຮັບການສັ່ນຄອນ ໂດຍສະເພາະທີ່ເມືອງ Aleppo ຫົວເມືອງໃຫຍ່ສຸດຂອງຊີເຣຍ.
ນັບແຕ່ທ້າຍເດືອນເມສາເປັນຕົ້ນມາ ມີຫຼາຍກວ່າ 270 ຄົນໄດ້ເສຍຊີວິດຍ້ອນການສູ້ລົບກັນໃນເມືອງດັ່ງກ່າວຮວມທັງຫລາຍກວ່າ 50 ຄົນໄດ້ຖືກຂ້າຕາຍໃນການໂຈມຕີທາງອາ ກາດໃສ່ໂຮງໝໍແຫ່ງນຶ່ງ ເມື່ອວັນພະຫັດແລ້ວ ທີ່ມີການຖິ້ມໂທດໃສ່ອຳນາດການປົກຄອງ ຊີເຣຍນັ້ນ.
