ໃນວັນພະຫັດນີ້, ບໍ່ຮອດສອງອາທິດຫຼັງຈາກຣັດເຊຍຖອນຕົວອອກຈາກຂໍ້ລິເລີ່ມ ອາຫານປະເພດເມັດທະເລດຳ (Black Sea Grain Initiative), ກອງປະຊຸມ ຣັດເຊຍ-ອາຟຣິກາ ໄດ້ເປີດຂຶ້ນຢູ່ເມືອງເຊນປີເຕີສ໌ເບີກ (Saint Petersburg).
ກະຊວງປ້ອງກັນປະເທດອັງກິດ ໄດ້ລາຍງານໃນວັນສຸກນີ້ວ່າ ມີພຽງ ປະມຸກລັດໃນອາຟຣິກາ 17 ຄົນເທົ່ານັ້ນທີ່ໄດ້ເຂົ້າຮ່ວມການປະຊຸມ. ຜູ້ນໍາອາຟຣິກາ ສີ່ສິບສາມຄົນ ໄດ້ເຂົ້າຮ່ວມກອງປະຊຸມຄັ້ງຫຼ້າສຸດ.
ກ່ອນໜ້າທີ່ຣັດເຊຍຈະຖອນຕົວອອກຈາກຂໍ້ລິເລີ່ມນີ້ ອາຫານປະເພດເມັດ 30 ລ້ານໂຕນຂອງຢູເຄຣນ ໄດ້ຖືກສົ່ງໄປອາຟຣິກາ, ກະຊວງດັ່ງກ່າວ ໄດ້ກ່າວໃນການອັບເດດຂ່າວກອງປະຈຳວັນກ່ຽວກັບການບຸກລຸກຂອງຣັດເຊຍ. ແນວໃດກໍ່ຕາມ, ອີງຕາມກະຊວງ ໃນຂະນະນີ້ ການສະກັດກັ້ນ ບໍ່ໃຫ້ສົ່ງອາຫານປະເພດ ເມັດຂອງຢູເຄຣນ ໂດຍມົສກູ (Moscow) ບໍ່ພຽງແຕ່ເຮັດໃຫ້ລາຄາອາຫານປະເພດເມັດສູງຂຶ້ນ, ແຕ່ຍັງມີສ່ວນຮັບຜິດຊອບຕໍ່ຄວາມບໍ່ຫມັ້ນຄົງດ້ານສະບຽງອາ ຫານ ໃນທົ່ວທະວີບອາຟຣິກາ "ຢ່າງຫນ້ອຍໃນອີກ 2 ປີຂ້າງຫນ້າ," ກະຊວງປ້ອງກັນປະເທດອັງກິດໄດ້ກ່າວ.
ໃນອີກດ້ານນຶ່ງ ທະຫານຢູເຄຣນໄດ້ຍຶດເອົາບ້ານ ສະ-ຕາ-ໂຣ-ມາຍ-ຢອສ-ກາ (Staromaiorske) ທາງພາກຕາເວັນອອກສຽງໃຕ້ ຈາກກອງທັບຣັດເຊຍ ຄືນມາໄດ້, ວີດີໂອທີ່ນຳອອກເຜີຍແຜ່ ໃນວັນພະຫັດວານນີ້ ໂດຍປະທານາທິບໍດີຢູເຄຣນ ທ່ານໂວໂລດີເມຍ ເຊເລັນສກີ (Volodymyr Zelenskyy) ໃນຂະນະທີ່ຢູເຄຣນຍັງສືບຕໍ່ການບຸກໂຈມຕີຕອບໂຕ້ທາງຕາເວັນອອກສຽງໃຕ້ ທີ່ຣັດເຊຍ ຍຶດຄອງເອົາ.
"ກອງພົນນ້ອຍທີ 35 ແລະ ໜ່ວຍປ້ອງກັນດິນແດນ ’ອາຣິ (Ariy)' ໄດ້ບັນລຸພາລະກິດຂອງຕົນ ແລະ ປົດປ່ອຍໝູ່ບ້ານ ສະ-ຕາ-ໂຣ-ມາຍ-ຢອສ-ກາ (Staromaiorske). ຂໍສະແດງຄວາມນັບຖືຢູເຄຣນ! ທະຫານຄົນນຶ່ງກ່າວໃນວີດີໂອ ທີ່ບໍ່ໄດ້ລະບຸທີ່ຕັ້ງພູມສາດໃນທັນທີ, ອີງຕາມອົງການຂ່າວ ຣອຍເຕີສ໌.
ຮອງລັດຖະມົນຕີກະຊວງປ້ອງກັນປະເທດຢູເຄຣນ ທ່ານນາງຮານນາ ມາເລຍອາ (Hanna Maliar) ໄດ້ປະກາດການປົດປ່ອຍ ບ້ານ ສະ-ຕາ-ໂຣ-ມາຍ-ຢອສ-ກາ (Staromaiorske), ໂດຍກ່າວວ່າ, "ປະຈຸບັນນີ້ຝ່າຍປ້ອງກັນຂອງພວກເຮົາກຳລັງສືບຕໍ່ກວດລ້າງບ້ານດັ່ງກ່າວ."
ບ້ານ ສະ-ຕາ-ໂຣ-ມາຍ-ຢອສ-ກາ (Staromaiorske) ຕັ້ງຢູ່ໃນພາກພື້ນ ໂດເນດ (Donetsk), ຢູ່ທາງໃຕ້ ຂອງກຸ່ມບ້ານນ້ອຍ ທີ່ຢູເຄຣນ ຍຶດເອົາຄືນ ໃນລະຫວ່າງການໂຈມຕີຕອບໂຕ້ ທີ່ໄດ້ເລີ່ມຂຶ້ນໃນເດືອນມິຖຸນາ.