ລິ້ງ ສຳຫລັບເຂົ້າຫາ

logo-print

ຮອງ ​ລມ​ຕ ກະ​ຊ​ວງ​ຍຸ​ຕິ​ທຳ ໂຣ​ເຊັນ​ສ​ໄຕ​​ນ໌ ຈ​ະ ​ພົບ​ກັບ ປ. ທ​ຣຳ ໃນ​ວັນ​ພະ​ຫັດ​ນີ້


ຮອງ​ລັດ​ຖະ​ມົນ​​ຕີກະ​ຊ​ວງ​ຍຸ​ຕິ​ທຳ ສະ​ຫະ​ລັດ ທ່ານ​ຣອ​ດ ໂຣ​ເຊັນ​ສ​ໄຕ​​ນ໌ ກ່າວ​ໃນ​ກອງ​ປະ​ຊຸມ​ຖະ​ແຫຼງ​ຂ່າວ ຂອງກະ​ຊ​ວງ​ຍຸ​ຕິ​ທຳ.

​ທຳ​ນຽບ​ຂາວ ໄດ້​ກ່າວ​ໃນ​ວັນ​ຈັນ​ວານ​ນີ້​ວ່າ ຮອງ​ລັດ​ຖະ​ມົນຕີກະ​ຊ​ວງ​ຍຸ​ຕິ​ທຳ ສະ​ຫະ​ລັດ ທ່ານ​ຣອ​ດ ໂຣ​ເຊັນ​ສ​ໄຕນ໌ ຈະ​ພົບ​ກັບ ປະ​ທາ​ນາ​ທິ​ບໍ​ດີ ດໍໂນ​ລ໌ ທ​ຣຳ ໃນ​ວັນ​ພະ​ຫັດ​ຈະ​ມາ​ນີ້ ຫລັງ​ຈາກທີ່ມີລາຍ​ງານ​ຂ່າວ​ວ່າ ​ເຈົ້າ​ໜ້າ​ທີ່​ອັນ​ດັບ 2 ຂອງກະ​ຊ​ວງ​ຍຸ​ຕິ​ທຳ ຄາດ​ວ່າ​ຈະ​ຖືກ​ປົດ​ອອກ​ຕຳ​ແໜ່ງ.

ການ​ປະ​ກາດ​ທີ່​ວ່າ​ນີ້ ມີຂຶ້ນ​ບໍ່​ເທົ່າ​ໃດ​ມື້ ຫຼັງ​ຈາກ​ໜັງ​ສື​ພິມ The New York Times ໄດ້​ລາຍ​ງານ​ວ່າ ​ປີ​ກາຍ​ນີ້ ທ່ານໂຣ​ເຊັນ​ສ​ໄຕນ໌ ໄດ້​ແນະ​ນຳ​ວ່າ ​ໃຫ້ບັນ​ທຶກສຽງ​ທ່ານ​ທ​ຣຳ​ແບບ​ລັບໆ ແລະ​ທີ່​ທ່ານ​ໄດ້​ນຳ​ເອົາ​ຄວາມ​ຄິດ ທີ່​ຈະ​ນຳ​ໃຊ້​ບົດ ແກ້​ໄຂລັດ​ຖະ​ທຳ​ມະ​ນູນ ຂໍ້ທີ 25 ທີ່​ຈະ​ປົດ​ປະ​ທາ​ນາ​ທິ​ບໍ​ດີ​ ອອກ​ຈາກຕຳ​ແໜ່ງ ຍ້ອນ​ທ່ານ​ບໍ່​ເໝາະ​ສົມ​ທີ່​ຈະ​ປົກ​ຄອງປະ​ເທດ​.

ທ່ານໂຣ​ເຊັນ​ສ​ໄຕນ໌ ໄດ້​ປະ​ຕິ​ເສດ​ຕໍ່​ລາຍ​ງານ ໃນ​ສັບ​ປະ​ດາ​ແລ້ວນີ້.

“ໃນ​ການ​ຮ້ອງ​ຮຽນ​ຂອງຮອງ​ລັດ​ຖະ​ມົນຕີກະ​ຊ​ວງ​ຍຸ​ຕິ​ທຳ ​ທ່ານໂຣ​ເຊັນ​ສ​ໄຕນ໌, ທ່ານ​ແລະ​ປະ​ທາ​ນາ​ທິ​ບໍ​ດີ​ທ​ຣຳ ໄດ້​ມີ​ການ​ສົນ​ທະ​ນາ​ກັນ​ຢ່າງ​ຍືດ​ຍາວ ເພື່ອ​ປຶກ​ສາ​ຫາ​ລື​ກ່ຽວ​ກັບ​ລາຍ​ງານ​ຂ່າວຫວ່າງ​ມໍ່​ມານີ້. ຍ້ອນ​ປະ​ທາ​ນາ​ທິ​ບໍ​ດີ ​ໄປຮ່ວມກອງ​ປະ​ຊຸມ​ສະ​ມັດ​ຊາ​ໃຫຍ່​ອົງ​ການ​ສະ​ຫະ​ປະ​ຊາ​ຊາດ ແລະ​ມີ​ໝາຍ​ກຳ​ໜົດ​ການ​ຢ່າງ​ເຕັມອັດ​ຕາກັບ​ບັນ​ດາ​ຜູ້​ນຳ​ຈາກ​ທົ່ວ​ໂລກ, ພວກ​ເພິ່ນ​ຈະ​ພົບ​ພໍ້​ກັນ​ໃນ​ວັນ​ພະ​ຫັດ​ນີ້ ​ເວລາທີ່​ປະ​ທາ​ນາ​ທິ​ບໍ​ດີ ກັບຄືນ​ມາ​ຍັງ​ວໍ​ຊີງ​ຕັນ ດີ​ຊີ,” ນັ້ນ​ຄື​ຄຳ​ເວົ້າ​ຂອງ​ໂຄ​ສົກ​ທຳ​ນຽ​ບ​ຂາວ ທ່ານ​ນາງ​ຊາ​ຣາ ຮັກ​ກາ​ບີ ແຊນ​ເດີ​ຣ໌​ສ ໄດ້​ກ່າວ​ຢູ່​ໃນ​ຖະ​ແຫຼງ​ການ.

ລາຍ​ງານ​ຂອງສື່ມວນ​ຊົນ​ບາງ​ສະ​ບັບ ໃນ​ວັນ​ຈັນວານ​ນີ້ ແນະ​ໃຫ້​ຮູ້​ວ່າ ທ່ານໂຣ​ເຊັນ​ສ​ໄຕນ໌ ໄດ້​ສົນ​ທະ​ນາ​ ກ່ຽວກັບໃຫ້​ລາ​ອອກ ໃນ​ຂະ​ນະ​ທີ່​ບາງ​ສະ​ບັບ​ກ່າວ​ວ່າ ທ່ານບໍ່​ຍອມ​ລາ​ອອກ ນອກ​ເສຍ​ຈາກວ່າ ທ່ານ​ຈະ​ຖືກ​ໄລ່​ອອກ.

ຜູ້​ອຳ​ນວຍ​ການ​ທີ່​ກຳ​ລັງ​ປະ​ຕິ​ລັດ​ຢູ່​ໃນ​ໜ້າ​ທີ່​ແທນ ຂອງ​ອົງ​ການ FBI ທ່ານ​ແອນດ​ຣູ ເມັກ​ເຄບ ນັ່ງ​ຮັບ​ຟັງ​ໃນລັດ​ຖະ​ສະ​ພາ, 11 ພຶດ​ສະ​ພາ 2017 ໃນ​ຂະ​ນະ​ທີ່​ໃຫ້​ປາກ​ຄຳ​ຕໍ່ ​ຄະ​ນະ​ສືບ​ລັບ​ຂອງ​ລັດ​ຖະ​ສະ​ພາ.
ຜູ້​ອຳ​ນວຍ​ການ​ທີ່​ກຳ​ລັງ​ປະ​ຕິ​ລັດ​ຢູ່​ໃນ​ໜ້າ​ທີ່​ແທນ ຂອງ​ອົງ​ການ FBI ທ່ານ​ແອນດ​ຣູ ເມັກ​ເຄບ ນັ່ງ​ຮັບ​ຟັງ​ໃນລັດ​ຖະ​ສະ​ພາ, 11 ພຶດ​ສະ​ພາ 2017 ໃນ​ຂະ​ນະ​ທີ່​ໃຫ້​ປາກ​ຄຳ​ຕໍ່ ​ຄະ​ນະ​ສືບ​ລັບ​ຂອງ​ລັດ​ຖະ​ສະ​ພາ.

ຫລັງ​ຈາກ​ໄດ້​ມີຂ່າວ​ໃນ​ໜັງ​ສື​ພຶມ New York Times ເມື່ອ​ສັບ​ປະ​ດາ​ແລ້ວ​ນີ້ ທ່ານໂຣ​ເຊັນ​ສ​ໄຕນ໌ໄດ້​ກ່າວ​ວ່າ “ເລື້ອງ​ໃນ​ໜັງ​ສື​ພິມ New York Times ນັ້ນ​ແມ່ນ​ບໍ່ຖືກ​ຕ້ອງ ແລະ​ເນື້ອ​ໄນ​ແມ່ນ​ຜິດ​ພາດ. ຂ້າ​ພະ​ເຈົ້າ​ບໍ່​ອອກ​ຄວາມ​ຄິດ​ໃດໆ​ຕື່ມ​ອີກ ໃນ​ເລື້ອງ​ທີ່ມາ​ຈາກ​ແຫ່ງ​ຂ່າວບໍ່​ຊາບ​ຊື່ ຜູ້​ຊຶ່ງ​ແນ່ນອນ ​ແມ່ນ​ມີ​ຄວາມ​ລຳອຽງ​ຕໍ່​ກະ​ຊວງ ແລະ​ໃຫ້​ຕົວ​ເອງ​ໄດ້​ປຽບ. ແຕ່​ວ່າ ໃຫ້​ຂ້າ​ພະ​ເຈົ້າ​ເວົ້າ​ຢ່າງ​ຈະ​ແຈ້ງ​ກ່ຽວ​ກັບ​ເລື້ອງ​ນີ້ ອີງ​ຕາມ​ການ​ພົວ​ພັນ​ຂອງ​ຂ້າ​ພະ​ເຈົ້າ ກັບ​ປະ​ທາ​ນາ​ທິ​ບໍ​ດີ ມັນ​ບໍ່ພື້ນ​ຖານ​ໃດໆ ທີ່​ຈະນຳ​ໃຊ້​ບົດ​ແກ້​ໄຂ​ລັດ​ຖະ​ທຳ​ມະ​ນູນ ຂໍ້ທີ 25.”

​ບົດ​ແກ້​ໄຂ​ລັດ​ຖະ​ທຳ​ມະ​ນູນ​ຂໍ້ທີ 25 ແມ່ນກ່າວເຖິງ​ຂັ້ນ​ຕອນທີ່ຮອງ​ປະ​ທາ​ນາ​ທິ​ບໍ​ດີ ແລະ​ສະ​ມາ​ຊິກ​ສ່ວນ​ໃຫຍ່​ຂອງຄະ​ນະລັດ​ຖະ​ບານ ທີ່​ຈະປົດ​ປະ​ທາ​ນາ​ທິ​ບໍ​ດີ ອອກ​ຈາ​ຕຳ​ແໜ່ງ​ ຖ້າ​ຫາກວ່າ ​ທ່ານບໍ່​ສາ​ມາດ​ທີ່​ຈະ​ປະ​ຕິ​ລັດ​ໜ້າ​ທີ່​ຂອງ​ທ່ານ​ໄດ້.

ຕໍ່​ມາ ທ່ານ​ໂຣ​ເຊັນ​ສ​ໄຕນ໌ ໄດ້​ອອກ​ຖະ​ແຫຼງ​ການ​ສະ​ບັບ​ທີ 2 ປະ​ຕິ​ເສດ ຕໍ່​ຂໍ້​ກ່າວ​ຫາ ໃນ​ຄຳ​ເວົ້າ​ທີ່​ແຮງ​ຂຶ້ນກວ່າ​ເກົ່າ ໂດຍ​ກ່າວ​ວ່າ “ຂ້າ​ພະ​ເຈົ້າ​ບໍ່​ເຄີຍທີ່​ຈະນຳ​ໃຊ້ ຫຼືອະ​ນຸ​ຍາດໃຫ້​ບັນ​ທຶກສຽງປະ​ທາ​ນາ​ທິ​ບໍ​ດີ ແລະ​ການ​ສະ​ເໜີ​ແນະໃດ​ໆ ​ກໍ​ຕາມທີ່​ວ່າ ຂ້າ​ພະ​ເຈົ້າ​ເຄີຍ​ສະ​ໜັບ​ສະ​ໜູນ​ໃຫ້​ປົດ​ປະ​ທາ​ນາ​ທິ​ບໍ​ດີ​ອອກ​ຈາ​ກ​ໜ້າ​ທີ່ນັ້ນ ແມ່ນ​ບໍ່​ຖືກ​ຕ້ອງຢ່າງ​ແນ່ນອນ.”

ອ່ານ​ຂ່າວນີ້ເປັນ​ພາ​ສາ​ອັງ​ກິດ​ເພີ້ມ​ຕື່ມ

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

ທ່ານອາດຈະມັກເລື້ອງນີ້ຄືກັນ

XS
SM
MD
LG