ຍັງເຫຼືອເວລາຢູ່ບໍ່ຮອດ 6 ເດືອນຊໍ້າ ກ່ອນວັນເລືອກຕັ້ງຈະມາເຖິງ ຍຸດທະສາດຂອງພັກຣີພັບ
ບລີກັນໃນການຂັບໄລ່ປະທານາທິບໍດີບາຣັກ ໂອບາມາອອກຈາກຕຳແໜ່ງ ແມ່ນຈະແຈ້ງຄືໃຫ້
ເປັນທີ່ແນ່ໃຈວ່າ ບັນດາຜູ້ມີສິດປ່ອນບັດ ເພັ່ງເລັງໃສ່ປະຫວັດຜົນງານໃນດ້ານເສດຖະກິດຂອງ
ທ່ານ.
ຄູ່ແຂ່ງສ່ວນໃຫຍ່ໃນພັກຣີພັບບລີກັນຂອງທ່ານ Mitt Romney ໄດ້ຖອນໂຕອອກຈາກການ
ແຂ່ງຂັນໃນການເລືອກຕັ້ງຂັ້ນຕົ້ນແລ້ວ ແລະເປັນທີ່ປະກົດວ່າອະດີດຜູ້ປົກຄອງລັດ Massa-
chusetts ພວມຢູ່ໃນເສັ້ນທາງໄປສູ່ການໄດ້ຮັບໄຊຊະນະໃນການທີ່ຈະຖືກແຕ່ງຕັ້ງໃຫ້ເປັນຜູ້
ສະມັກປະທານາທິບໍດີຂອງພັກ ໃນເດືອນສິງຫາຈະມານີ້. ທ່ານ Romney ອາດສາມາດຈະ
ໄດ້ຮັບຈໍານວນຜູ້ຕາງໜ້າທີ່ຈຳເປັນ ເພື່ອໃຫ້ໄດ້ຮັບການແຕ່ງຕັ້ງເປັນຜູ້ສະມັກຂອງພັກນັ້ນໃນ
ໄລຍະຫຼາຍໆອາທິດຕໍ່ໜ້ານີ້.
ທ່ານ Romney ໄດ້ຫັນຄວາມສົນໃຈຂອງທ່ານ ໄປໃສ່ປະທານາທິບໍດີໂອບາມາ ຢ່າງເຕັມທີ່
ແລະໃຫ້ຄຳໝັ້ນສັນຍາວ່າ ເສດຖະກິດຈະດີຂຶ້ນຖ້າທ່ານຫາກໄດ້ຮັບເລືອກຕັ້ງໃນເດືອນພະຈິກ
ທ້າຍປີນີ້.
ທ່ານ Romney ເວົ້າວ່າ “ພວກທີ່ມັກຝັນ ກໍສາມາດຝັນໄດ້ໃຫຍ່ກວ່າເກົ່າ ປ້າຍຮັບສະມັກ
ເອົາຄົນງານກໍຈະສາມາດນຳມາເຊັດຖູແລະໃຊ້ຄືນອີກແລະພວກເຮົາສາມາດເລີ້ມຕົ້ນໃໝ່ອີກ
ແລະເທື່ອນີ້ພວກເຮົາຈະດຳເນີນການຢ່າງຖືກຕ້ອງ.”
ພວກນັກວິເຄາະກ່າວວ່າ ເກືອບບໍ່ມີການສົງໄສໃດໆເລີຍວ່າ ເລື່ອງເສດຖະກິດພາຍໃນປະ
ເທດຈະເປັນບັນຫາຕັດສິນຊີ້ຂາດໃນເດືອນພະຈິກປີນີ້. ການໂຄສະນາຫາສຽງກໍມີທ່າທາງ
ວ່າຈະເນັ້ນໜັກເຖິງຄວາມແຕກຕ່າງ ລະຫວ່າງບຸກຄົນທັງສອງ ກ່ຽວກັບຂະໜາດແລະບົດ
ບາດຂອງລັດຖະບານກາງ.
ທ່ານ Romney ໃຫ້ຄຳໝັ້ນສັນ
ຍາວ່າ ຈະຕັດການໃຊ້ຈ່າຍຂອງ
ລັດຖະບານກາງ ລົງຢ່າງຫລວງ
ຫຼາຍຂະນະທີ່ປະທານາທິບໍດີໂອ
ບາມາປະຕິຍານວ່າຈະສືບຕໍ່ສວຍ
ໃຊ້ລັດຖະບານ ເພື່ອກະຕຸກຊຸກ
ຍູ້ການຟື້ນໂຕຄືນຂອງເສດຖະກິດ.
ທ່ານໂອບາມາເວົ້າວ່າ “ຂ້າພະ
ເຈົ້າໄດ້ຮັກສາ ຄຳໝັ້ນສັນຍາທີ່
ໄດ້ໃຫ້ໄວ້ແລະຍັງສືບຕໍ່ຄິດເຖິງພວກທ່ານຢູ່. ຂ້າພະເຈົ້າຍັງຄືນຄິດພວກທ່ານ ແລະຂ້າພະເຈົ້າ
ຍັງມີຄວາມເຊື່ອໝັ້ນໃນໂຕທ່ານ ແລະຖ້າທ່ານຫາກຮ່ວມສົມທົບກັບຂ້າພະເຈົ້າ ພວກເຮົາຈະ
ເຕືອນໃຫ້ໂລກຮູ້ວ່າ ເປັນຫຍັງອາເມຣິກາ ຈຶ່ງເປັນປະເທດທີ່ຍິ່ງໃຫຍ່ທີ່ສຸດໃນໂລກ.”
ໃນບັນດາພວກທີ່ຈັບຕາເບິ່ງການໂຄສະນາຫາສຽງເລືອກຕັ້ງຢ່າງໃກ້ຊິດໃນປີນີ້ ກໍມີທ່ານ Ken
Duberstein ອະດີດຫົວໜ້າທີ່ປຶກສາປະຈຳທຳນຽບຂາວ ຂອງມື້ລາງປະທານາທິບໍດີ Ronal
Reagan ໃນຊຸມປີ 1980 ຊຶ່ງທ່ານທຳນາຍວ່າຈະເປັນການເລືອກຕັ້ງທີ່ມີຄະແນນສຽງໃກ້ຄຽງ
ກັນ ແລະຜົນຂອງການເລືອກຕັ້ງດັ່ງກ່າວຈະຂຶ້ນຢູ່ກັບວ່າ ບັນດາຜູ້ມີສິດປ່ອນບັດ ຈະມອງເບິ່ງ
ຜູ້ສະມັກທັງສອງແບບໃດ ລະຫວ່າງທ່ານໂອບາມາແລະທ່ານ Romney.
ທ່ານ Duberstein ເວົ້າວ່າ “ຖ້າຫາກວ່າ ນີ້ເປັນການລົງປະຊາມະຕິກ່ຽວກັບຜົນງານໃນໄລ
ຍະກຳຕຳແໜ່ງ 3 ປີເຄິ່ງທຳອິດ ຂອງປະທານາທິບໍດີໂອບາມາ ແລະເປັນການລົງປະຊາມະຕິ
ກ່ຽວກັບເສດຖະກິດຂອງອາເມຣິກາແລ້ວຜູ້ປົກຄອງລັດ Romney ແມ່ນມີໂອກາດດີໆທີ່ຈະ
ຖືກເລືອກເປັນປະທານາທິບໍດີສະຫະລັດ. ແຕ່ຖ້າຫາກນີ້ເປັນການລົງປະຊາມະຕິກ່ຽວກັບພັກ
ຣີພັບບລີກັນແລະຜູ້ປົກຄອງລັດ Romney ແລ້ວ ປະທານາທິບໍດີໂອບາມາກໍມີໂອກາດພຽງ
ພໍ ທີ່ຈະຖືກເລືອກເຂົ້າຮັບຕຳແໜ່ງຕື່ມອີກສະໄໝນຶ່ງ.”
ເວລານີ້ທ່ານ Romney ຕ້ອງໄດ້ເຕົ້າໂຮມພັກຣີພັບບລີກັນຫຼັງຈາກໄດ້ຮັບຄວາມບອບຊໍ້າຈາກ
ການໂຄສະນາຫາສຽງໃນການເລືອກຕັ້ງຂັ້ນຕົ້ນທີ່ໄດ້ມີການຮ້ອງຮຽນຫຼາຍໆຢ່າງໄປຍັງພວກ
ຝ່າຍຂວາທີ່ນິຍົມແນວທາງເດີມຂອງພັກ.
ແຕ່ໃນຂະນະດຽວກັນ ທ່ານ Romney ຍັງຈະຕ້ອງໄດ້ຫັນປ່ຽນຈຸດເພັ່ງເລັງຂອງທ່ານ ໄປໃສ່
ການພະຍາຍາມໃຫ້ໄດ້ຮັບຄວາມສະໜັບສະໜຸນຈາກບັນດາຜູ້ມີສິດປ່ອນບັດທີ່ນິຍົມແນວທາງ
ການເມືອງປານກາງ ຊຶ່ງມັກຈະເປັນຜູ້ມີບົດບາດສຳຄັນໃນການຕັດສິນຊີ້ຂາດກ່ຽວກັບວ່າຜູ້ໃດ
ຈະໄດ້ເຂົ້າໄປນັ່ງໃນທຳນຽບຂາວ.
ທ່ານ Duberstein ຄາດວ່າ ມັນຈະເປັນສິ່ງທ້າທາຍບໍ່ແມ່ນໜ້ອຍສຳຫຼັບທ່ານ Romney.
ທ່ານ Duberstein ເວົ້າວ່າ “ຂ້າພະເຈົ້າຄິດວ່າ ບັນຫາພື້ນຖານກໍຄືຜູ້ປົກຄອງລັດ Romney
ຈະຕີຄວາມໝາຍຫຼືໃຫ້ຄຳຈຳກັດຄວາມແບບໃດກ່ຽວກັບພັກຣີພັບບລີກັນ ຫຼືວ່າພວກຂວາຈັດ
ຈະຕີຄວາມໝາຍແບບໃດ ກ່ຽວກັບທ່ານ Romney ແລະ ນັ້ນກໍຄືການອະພິປາຍທີ່ພວກເຮົາ
ຈະໄດ້ຍິນ ໄປຈົນຮອດວັນເລືອກຕັ້ງ ຄືວັນທີ 6 ພະຈິກ.”
ການຢັ່ງຫາງສຽງປະຊາຊົນສ່ວນ
ໃຫຍ່ ສະແດງໃຫ້ເຫັນວ່າ ປະທາ
ນາທິບໍດີໂອບາມາ ມີຄະແນນນຳ
ໜ້າທ່ານ Romney ໜ້ອຍນຶ່ງໃນ
ເວລານີ້. ແຕ່ພວກນັກຊ່ຽວຊານ
ໃຫ້ຂໍ້ສັງເກດວ່າ ການໄດ້ປຽບ
ຂອງປະທານາທິບໍດີ ໂດຍສະ
ເພາະແລ້ວ ສຳຫຼັບຜູ້ທີ່ເຂົ້າແຂ່ງ
ຂັນ ເອົາຕຳແໜ່ງຕື່ມອີກ ແມ່ນ
ບໍ່ຫຼາຍປານໃດ ແລະອາດຫາຍ
ໄປໄດ້ຖ້າບັນດາຜູ້ມີສິດປ່ອນບັດ
ຫາກຕັດສິນໃຈວ່າ ເສດຖະກິດຍັງບໍ່ທັນຟື້ນໂຕຄືນ ໄວເທົ່າທີ່ຄວນຈະເປັນ.