ສະຫະລັດກໍາລັງຮຽກຮ້ອງໃຫ້ບັງກລາແດັສ ຈົ່ງອະນຸຍາດໃຫ້ບັນດາກຸ່ມຊ່ວຍເຫຼືອດ້ານມະ
ນຸດສະທໍານາໆຊາດ ສືບຕໍ່ສະໜອງການຊ່ວຍເຫຼືອໃຫ້ແກ່ອົບພະຍົບຊົນເຜົ່າໂຣຮິງຢາ ທີ່
ໄດ້ຫຼົບໜີຈາກເຫດການຄວາມຮຸນແຮງທາງສາສະໜາຢູ່ໃນມຽນມາ ຊຶ່ງເປັນປະເທດເພື່ອນ
ບ້ານນັ້ນ.
ເມື່ອອາທິດຜ່ານມາ ບັງກລາແດັສ ໄດ້ສັ່ງໃຫ້ບັນດາອົງການຕ່າງໆທີ່ບໍ່ຂຶ້ນກັບລັດຖະບານ
ຫຼື NGO ຍຸຕິການປະຕິບັດງານຂອງພວກເຂົາເຈົ້າ ຢູ່ໃນເຂດເມືອງ Cox’s Bazar ທາງ
ພາກຕາເວັນອອກສຽງໃຕ້ຂອງປະເທດ. ເຈົ້າໜ້າທີ່ບັງກລາແດັສເວົ້າວ່າ ການເຄື່ອນໄຫວ
ດັ່ງກ່າວນີ້ ກໍເພື່ອບໍ່ຢາກຊຸກຍູ້ໃຫ້ປະຊາຊົນ ຫຼັ່ງໄຫຼຂ້າມຊາຍແດນຈາກມຽນມາ ເຂົ້າໄປ
ຍັງບັງກລາແດັສຫຼາຍຂຶ້ນໄປເລື້ອຍໆ.
ກະຊວງຕ່າງປະເທດສະຫະລັດເວົ້າເມື່ອຕອນບ່າຍວັນອັງຄານວານນີ້ວ່າ ຕົນມີຄວາມເປັນ
ຫ່ວງຢ່າງເລິກເຊິ່ງ ກ່ຽວກັບເຈດຕະນາຂອງບັງກລາແດັສ ທີ່ໄດ້ຢຸດກິດຈະກໍາຂອງກຸ່ມຕ່າງໆ
ອັນມີໂຮມທັງກຸ່ມນາຍແພດບໍ່ມີພົມແດນຫຼື Doctors Without Borders ແລະກຸ່ມປະຕິ
ບັດການຕໍ່ຕ້ານ ຄວາມອຶດຫິວ ແລະກຸ່ມຊ່ວຍເຫຼືອມຸສລິມ.
ຄວາມຮຸນແຮງທາງດ້ານສາສະໜາລະຫວ່າງຊາວພຸດ ແລະຊາວມຸສລິມ ໂຣຮິງຢາ ຢູ່ໃນລັດ
Rakhine ທາງພາກຕາເວັນຕົກຂອງມຽນມາ ທີ່ຍັງຜົນໃຫ້ມີຜູ້ເສຍຊີວິດຫຼາຍສິບຄົນ ໃນ
ເຫດຮ້າຍດັ່ງກ່າວ ນັບຕັ້ງແຕ່ເດືອນ ມິຖຸນາຜ່ານມາ. ຊາວໂຣຮິງຢາຈຳນວນນຶ່ງ ທີ່ມຽນມາ
ຖືວ່າເປັນຊາວຕ່າງດ້າວເຂົ້າເມືອງຜິດກົດໝາຍນັ້ນ ໄດ້ພະຍາຍາມຫຼົບໜີເຂົ້າໄປໃນປະເທດ
ບັງກລາແດັສ.