ຕຳຫຼວດໃນເທີກີໄດ້ນຳໃຊ້ພາວະສຸກເສີນສະບັບໃໝ່ ທີ່ໄດ້ມີການປະກາດຫຼັງຈາກການກໍ່ລັດຖະປະຫານທີ່ປະສົບກັບຄວາມລົ້ມແຫຼວໃນເດືອນກໍລະກົດ ເພື່ອທໍລະມານພວກທີ່ຖືກ
ຄຸມຂັງ ອິງຕາມລາຍງານທີ່ໄດ້ນຳເຜີຍແຜ່ ໃນວັນອັງຄານມື້ນີ້ໂດຍກຸ່ມປົກປ້ອງສິດທິມະນຸດ Human Rights Watch.
ລາຍງານໄດ້ກ່າວເຖິງ 13 ກໍລະນີ ທີ່ມີການທໍລະມານ ດ້ວຍນ້ຳມືຂອງພວກຕຳຫຼວດ ຊຶ່ງມີຂຶ້ນໄດ້ກໍຍ້ອນພາວະສຸກເສີນ ທີ່ຈະໃຫ້ອະໄພ ແກ່ບັນດາເຈົ້າໜ້າທີ່ລັດຖະບານບໍ່ຕ້ອງຮັບຜິດ ຊອບຕໍ່ການກະທຳລົງທີ່ພວກເຂົາເຈົ້າໄດ້ເຮັດລົງໄປນັ້ນ.
“ດ້ວຍການຍົກເລີກການປົກປ້ອງຄຸ້ມຄອງຕໍ່ການທໍລະມານດັ່ງກ່າວ ລັດຖະບານເທີກີ ແມ່ນວ່າ ໄດ້ຂຽນເຊັກທີ່ຫວ່າງເປົ້າ ແບບບໍ່ຈຳກັດ ໃຫ້ພວກໜ່ວຍຮັກສາຄວາມປອດໄພ ທີ່ຈະທຳການທໍລະມານ ແລະປະຕິບັດຕໍ່ພວກທີ່ຖືກຄຸມຂັງແບບໃດກໍໄດ້ ຕາມທີ່ ພໍໃຈ,” ນັ້ນແມ່ນຄຳເວົ້າຂອງທ່ານ Hugh Williamson ຜູ້ອຳນວຍການຂອງອົງການ Human Rights Watch ທີ່ຮັບຜິດຊອບກ່ຽວກັບຢູໂຣບແລະເອເຊຍກາງ.
ປະທານາທິບໍດີເທີກີ ທ່ານ Recep Tayyip Erdogan ໄດ້ປະກາດສະພາວະສຸກເສີນ
ໃນເດືອນກໍລະກົດຜ່ານມານີ້ ຫຼັງຈາກທີ່ໄດ້ມີການກໍ່ລັດຖະປະຫານທີ່ປະສົບກັບຄວາມລົ້ມແຫຼວ. ນັບຕັ້ງແຕ່ນັ້ນມາ ໄດ້ມີຜູ້ຄົນ ຫຼາຍກວ່າ 30 ພັນຄົນ ໄດ້ຖືກຈັບກຸມຄຸມຂັງ ຊຶ່ງສ່ວນໃຫຍ່ແລ້ວແມ່ນເປັນພວກທະຫານ ພວກເຈົ້າໜ້າທີ່ໃນລະບົບສຶກສາ ແລະຈາກຂະແໜງຕຸລາການ.
ການກ່າວຫາທີ່ວ່ານີ້ ມີຂຶ້ນຢູ່ໃນລາຍງານ ຊຶ່ງຮວມທັງ ການບີບຄັ້ນພວກນັກໂທດ ການຕົບຕີ ບໍ່ໃຫ້ຫລັບນອນ ແລະການທຳລະມານທາງເພດ ຊຶ່ງນຶ່ງກໍລະນີໃນນັ້ນ ກໍແມ່ນວ່າ ພວກຕຳ
ຫຼວດໄດ້ບອກກັບນັກໂທດຄົນນຶ່ງວ່າ ພວກເຂົາເຈົ້າສາມາດທີ່ຈະຂ້າລາວໄດ້ ແລະຈະບໍ່ມີຜູ້ໃດຫົວຊານຳດອກ ເພາະວ່ານີ້ແມ່ນຢູ່ໃນພາວະສຸກເສີນ.
