ບັນດານັກເຄື່ອນໄຫວເພື່ອສິດທິມະນຸດ ພາກັນຮຽກຮ້ອງໃຫ້
ດຳເນີນຄະດີ ບັນດາເຈົ້າໜ້າທີ່ ມີສ່ວນພົວພັນກັບ ວິທີການ
ປະຕິບັດທີ່ຮຸນແຮງຂອງອົງກາງສຶືບລັບ CIA ຂອງສະຫະລັດ
ໃນການສອບສວນຜູ້ຕ້ອງສົງໄສກໍ່ການຮ້າຍນັ້ນ.
ທ່ານ Ben Emmerson ທູດພິເສດ ສະຫະປະຊາຊາດດ້ານ
ສິດທິມະນຸດ ແລະຕໍ່ຕ້ານການກໍ່ການຮ້າຍ ກ່າວວ່າລາຍງານ
ຂອງ ສະພາສູງ ສະຫະລັດ ກ່ຽວກັບການປະຕິບັດງານຂອງ
CIA ຫລັງຈາກການໂຈມຕີໃນເດືອນກັນຍາປີ 2001 ນັ້ນ
ແມ່ນເນ້ນໃຫ້ເຫັນເຖິງຄວາມຈຳເປັນ ທີ່ຕ້ອງໃຫ້ມີຜູ້ຮັບຜິດ
ຊອບ ໃນການກະທຳຄວາມຜິດ ທາງອາຍາ.”
ທ່ານ Kenneth Roth ຫົວໜ້າອົງການສິ້ງຊອມສິດທິມະນຸດ Human Right Watch
ທີ່ຕັ້ງຢູ່ສະຫະລັດ ກ່າວວ່າ ການທໍລະມານ “ຈະຍັງຄົງເປັນທາງເລືອກ ດ້ານນະໂຍບາຍ
ຂອງບັນດາປະທານາທິບໍດີຄົນຕໍ່ໆໄປ” ຖ້າຫາກວ່າ ບັນດາເຈົ້າໜ້າທີ່ບໍ່ຖືກລົງໂທດ.
U.S. Senate Intelligence Committee Releases Torture Report
ຄະນະກຳມາທິການສືບລັບ ຂອງສະພາສູງ ໄດ້ເຜີຍແຜ່ບົດສະຫລູບ ຂອງລາຍງານທີ່ຍາວ
ກວ່າ ໃນວັນອັງຄານວານນີ້ ທີ່ກ່າວວ່າ CIA ໄດ້ປະຕິບັດຢ່າງໂຫດ ຮ້າຍຕໍ່ພວກນັກໂທດ
ໃນລະຫວ່າງການສອບສວນຢູ່ນັ້ນ. ລາຍງານໄດ້ກ່າວຫາ CIA ວ່າ ບໍ່ບອກຄວາມຈິງ ແລະ
ເຮັດໃຫ້ລັດຖະສະພາ ແລະປະຊາຊົນອາເມຣິ ກັນເຂົ້າໃຈຜິດ ກ່ຽວກັບປະສິດທິຜົນຂອງ
ວິທີການສອບສວນເຫລົ່ານັ້ນ ອັນມີ ຮວມທັງການກັກຂັງຢູ່ບ່ອນຄັບແຄບ ບໍ່ໃຫ້ໄດ້ຫລັບໄດ້
ນອນ ແລະຖອກນ້ຳໃສ່ໜ້າ ເຮັດໃຫ້ຮູ້ສຶກຄືກັບວ່າ ກຳລັງຈະຈົມນໍ້າ ຕາຍ.
ຜູ້ແທນສະພາສູງ ພັກເດໂມແຄຣັດ ຈາກລັດ California ທ່ານນາງ Dianne Feinstein
ປະທານຄະນະກຳມາທິການສືບລັບຂອງສະພາສູງ ກ່າວວ່າ “ບໍ່ວ່າຈະຕີຄວາມໝາຍຂອງ
ວິທີການເຫລົ່ານັ້ນແບບໃດກໍຕາມ ບັນດານັກໂທດຂອງ CIA ກໍແມ່ນໄດ້ຖືກທໍລະມານ.”
ທ່ານນາງເອີ້ນພາກປະຕິບັດດັ່ງກ່າວຂອງ CIA ວ່າ ເປັນຮອຍດ່າງຫລືມົນທິນ ໃນຄຸນຄ່າ
ຂອງຊາວອາເມຣິກັນ.
ປະທານາທິບໍດີ ສະຫະລັດ ທ່ານ Barack Obama ໄດ້ກ່າວຕໍ່ ໂທລະພາບ ພາສາສະແປ
ນິສ ຊ່ອງ Univision ວ່າ ສະຫະລັດໄດ້ພົວພັນ ກັບກິດຈະການທີ່ໂຫດຮ້າຍປ່າເຖື່ອນ
ແລະ ທ່ານກ່າວວ່າ ມັນເປັນຄວາມຜິດພາດຢ່າງຮ້າຍແຮງ ທີ່ບໍ່ສົມຄວນຈະປະຕິບັດຄືນອີກ.
