ກອງທະຫານ ແລະ ລົດຫຸ້ມເກາະ ຂອງຢູເຄຣນ ໄດ້ຕາມລ່າພວກ
ແບ່ງແຍກດິນແດນຫົວນິຍົມຣັດເຊຍ ທີ່ກຳລັງຖອຍໜີໄປ ໃກ້ກັບ
ຊາຍແດນຣັດເຊຍ ເມື່ອວັນອາທິດວານນີ້ ໜຶ່ງມື້ ຫຼັງຈາກທີ່ຢຶດ
ໄດ້ຄືນ ເມືອງ Slovyansk ທີ່ໝັ້ນສຳຄັນ ຂອງພວກກະບົດ.
ບັນດາເຈົ້າໜ້າທີ່ກ່າວວ່າ ກອງກຳລັງຂອງລັດຖະບານ ຍັງຢຶດ
ໄດ້ຄືນ ເມືອງນ້ອຍ 4 ແຫ່ງ ລະຫວ່າງ ເມືອງ Slovyansk ແລະ
ເມືອງ ຊາຍແດນ Donetsk ທີ່ໄດ້ຖືກພວກກະບົດຢຶດເອົາໄປ
ໃນເມື່ອກ່ອນ. ຮອງລັດຖະມົນຕີຄວາມປອດໄພແຫ່ງຊາດຢູເຄຣນ
ທ່ານ Mykhaylo Koval ກ່າວວ່າ ພວກທະຫານ ໄດ້ເຄື່ອນກຳລັງ
ເຂົ້າໄປ ໃນວັນອາທິດວານນີ້ ເພື່ອປິດລ້ອມ Donetsk ແລະ Luhansk ຊຶ່ງເປັນ 2 ຫົວເມືອງ ໃຫຍ່ ໃນເຂດຕາເວັນອອກ ທີ່ເວົ້າພາສາຣັດເຊຍ ທີ່ຍັງຢູ່ໃຕ້ການປົກຄອງຂອງພວກກະບົດ.
ພາບຫລ້າສຸດ ຈາກຢູເຄຣນ
ພວກຜູ້ນຳຂອງພວກກະບົດ ໄດ້ຍອມຮັບວ່າ ພວກຕົນໄດ້ປະສົບກັບການສູນເສຍຢ່າງໜັກ
ໃນຂະນະທີ່ປະລະເມືອງ Slovyansk ໄປ. ບັນດາເຈົ້າໜ້າທີ່ຢູເຄຣນ ຖະແຫລງໃນວັນ
ອາທິດ ວານນີ້ ວ່າ ໄດ້ຢຶດເອົາຄັງອາວຸດໃຫຍ່ ຂອງພວກກະບົດ ລວມທັງລູກສອນໄຟຕໍ່
ຕ້ານລົດຖັງ ແລະ ປືນຍິງລະເບີດມື.
ໜຶ່ງ ຮ້ອຍກິໂລແມັດລົງໄປຈາກພາກໃຕ້ ສື່ຂ່າວຂອງຕາເວັນຕົກໃນຂົງເຂດ ລາຍງານ
ວ່າ ພວກກະບົດທີ່ປະກອບອາວຸດໜັກ ພາກັນເຄື່ອນຍ້າຍຢ່າງອິດສະລະ ຢູ່ໃນເມືອງ
Donetsk ນັ້ນ.
