ກອງທັບສະຫະລັດ ກ່າວວ່າ ຕົນໄດ້ທຳການໂຈມຕີທາງອາກາດ
ໃນພາກຕາເວັນຕົກຂອງອີຣັກໃກ້ໆກັບເຂື່ອນ Haditha ທີ່ກຳລັງ
ຢູ່ພາຍໃຕ້ການຂົ່ມຂູ່ ຈາກພວກນັກຕໍ່ສູ້ຫົວຮຸນແຮງລັດອິສລາມ.
ບັນດາເຈົ້າໜ້າທີ່ສະຫະລັດ ກ່າວໃນວັນອາທິດມື້ນີ້ວ່າ ອີຣັກຍັງ
ຄວບຄຸມເຂື່ອນດັ່ງກ່າວຢູ່ ແຕ່ການບຸກໂຈມຕີນີ້ໄດ້ເລີ້ມຂຶ້ນ ເພື່ອ
ຕອບໂຕ້ຕໍ່ພວກກະບົດ ທີ່ກຳລັງພະຍາຍາມເຂົ້າຄວບຄຸມເຂື່ອນ
ດັ່ງກ່າວ.
ທ່ານ Chuck Hagel ລັດຖະມົນຕີປ້ອງກັນປະເທດສະຫະລັດ ໃນ
ລະຫວ່າງທີ່ກ່າວປາໄສ ຢູ່ປະເທດ Georgia ໃນວັນອາທິດມື້ນີ້
ເວົ້າວ່າ ການຮັກສາເຂື່ອນ Haditha ໃຫ້ປອດໄພແມ່ນສຳຄັນທີ່ສຸດ.
ທ່ານ Hagel ກ່າວວ່າ “ຖ້າເຂື່ອນແຫ່ງນີ້ຫາກຕົກໄປຢູ່ໃນກຳມືຂອງກຸ່ມລັດອິສ
ລາມຫຼືຖືກທຳລາຍໄປ ຄວາມເສຍຫາຍທີ່ຈະເກີດຂຶ້ນນັ້ນແມ່ນມີຢ່າງຫຼວງຫຼາຍ
ແລະມັນຈະມີການສ່ຽງທີ່ສຳຄັນແລະໃຫຍ່ຫຼວງ ແກ່ຄວາມສັບສົນໃນອີຣັກນັ້ນ.”
ກອງທັບສະຫະລັດ ຍັງໄດ້ທຳການໂຈມຕີທາງອາກາດເຊັ່ນກັນຕໍ່ພວກ ຫົວຮຸນແຮງລັດອິສລາມໃນພາກເໜືອຂອງອີຣັກ ໂດຍແນເປົ້າໝາຍໃສ່ ພວກຫົວຕໍ່ສູ້ ແລະອາວຸດຍຸດ
ໂທປະກອນທາງທະຫານ ໃກ້ໆກັບເມືອງ Irbil.
ກອງບັນຊາການທະຫານສະຫະລັດໃນເຂດພາກຕາເວັນອອກກາງ ບັນລະຍາຍການ
ໂຈມຕີນີ້ວ່າ ເປັນ “ການໂຈມຕີແບບປະສົມ ຄືໃຊ້ທັງເຮືອ ບິນລົບ ແລະເຮືອບິນ
ທີ່ບໍ່ມີຄົນຂັບ” ໂດຍກ່າວວ່າ ການໂຈມຕີເຫຼົ່ານີ້ມີຂຶ້ນໃນວັນສຸກແລະວັນເສົາວານນີ້.
ທີ່ຊີເຣຍ ໃກ້ໆກັນນັ້ນ ພວກນັກສັງເກດການນາໆຊາດ ກ່າວວ່າ ການໂຈມຕີທາງອາກາດ
ຂອງລັດຖະບານຊີເຣຍ ທີ່ແນເປົ້າໝາຍໃສ່ເມືອງ Raqqa ຊຶ່ງເປັນທີ່ໝັ້ນຂອງກຸ່ມລັດອິສ
ລາມ ໄດ້ສັງຫານປະຊາຊົນຢ່າງໜ້ອຍ 25 ຄົນ ທີ່ຮວມທັງພວກພົນລະເຮືອນ 16 ຄົນນຳ.
ກຸ່ມສິ້ງຊອມສິດທິມະນຸດໃນຊີເຣຍ ກ່າວວ່າ ພວກພົນລະເຮືອນເສຍຊີວິດໃນການຖິ້ມລະ
ເບີດໃສ່ໂຮງເຂົ້າຈີ່ແຫ່ງນຶ່ງທີ່ດຳເນີນການໂດຍກຸ່ມຫົວຮຸນແຮງ. ການໂຈມຕີບັ້ນອື່ນໆໄດ້
ຕົກໃສ່ຄ້າຍເຝິກແອບແຫ່ງນຶ່ງຂອງກຸ່ມລັດອິສລາມ ແລະອາຄານຂອງພະແນກການຄັງ
ຫຼັງນຶ່ງ ຂອງລັດຖະບານ ທີ່ຖືກໃຊ້ເປັນສານຂອງກຸ່ມອິສລາມນັ້ນ.
ເມືອງ Raqqa ທີ່ຕັ້ງຢູ່ໃນພາກຕາເວັນອອກສຽງເໜືອຂອງຊີເຣຍ ເປັນທີ່ໝັ້ນແຫ່ງສຳຄັນ ຂອງກຸ່ມລັດອິສລາມໃນຊີເຣຍ.
