ຈີນ ກໍ່ສ້າງເດີ່ນບິນ ໃສ່ເກາະດອນ ຢູ່ໃນທະເລຈີນໃຕ້ ທີ່ຂັດແຍ້ງກັນ ກັບປະເທດເພື່ອນບ້ານ

ພາບ​ຖ່າຍ​ຕ່າງໆ​ຈາກ​ດາວ​ທຽມ ​ເມື່ອ​ບໍ່​ດົນ​ມາ​ນີ້ ສະ​ແດງ​ໃຫ້​ເຫັນ
​ວ່າ ຈີນພວມ​ກໍ່​ສ້າງ​ເດີ່ນບິນ ​ໃສ່ເກາະດອນ​ ທີ່​ຖົມເອົາເອງ​ ໃນ
ເຂດນຶ່ງ ຂອງ​ທະ​ເລ​ຈີນ​ໃຕ້ ທີ່​ຍັງເປັນບັນຫາໂຕ້ແຍ້​ງກັນ​ຢູ່​ນັ້ນ
​ແລະ​ ອາດ​ມີ​ແຜນ ທີ່​ຈະ​ສ້າງ​ຕື່ມອີກ​ແຫ່ງ​ນຶ່ງ.

ວາລະສານ ດ້ານ​ການ​ປ້ອງ​ກັນປະເທດ ລາຍອາ​ທິດ Jane’s
Defense Weekly ລາຍ​ງານ​ວ່າ ພາບ​ຖ່າຍ​ຕ່າງໆ​ ທີ່​ລົງ​ວັນ​ທີ
23 ມີນາ ຈາກ​ບໍລິສັດ Airbus Defense and Space ​ໄດ້​
ສະແດງ​ໃຫ້​ເຫັນ​ເຖິງ ການ​ດຳ​ເນີນ​ການ ​ກໍ່ສ້າງທາງ​ແຫ​ລ່ນ​
ເຮືອບິນ ​ໃສ່ເກາະ Fiery Cross ໃນ​ໝູ່​ເກາະ Spratly ຊຶ່ງ​ເປັນ
​ເຂດ​ນ້ຳ​ແດນ​ດິນ ​ທີ່​ມີການ​ອ້າງ​ເອົາກຳມະສິດ ​ຂອງເພື່ອນ​ບ້ານ
ຫລາຍໆ ປະເທດ ລວມມີ ຫວຽດນາມ ​ໄຕ້​ຫວັນ ​ແລະ ຟີ​ລິບ​ປິນ.

ສ່ວນ​ພາບອື່ນໆ ທີ່ຖ່າຍເອົາ​ໄວ້​ໃນ​ເດືອນ​ມີນາ ສະແດງ​ໃຫ້​ເຫັນ​ວ່າ ຈີນອາດ​ຈະ​ກໍ່ສ້າງ​ເກາະ
ທຽມທີ່ຖົມເອງ ​ໃຫ້ໃຫຍ່​ພໍ ​ເພື່ອຮອງ​ຮັບເດີ່ນ​ບິນໄດ້ ທີ່​ສາມາດ​ນຳ​ໃຊ້ ​ໃນ​ດ້ານ​ພົນລະເຮືອນ ​ແລະ ດ້ານ​ທະຫານ.

ປັກ​ກິ່ງ ​ໄດ້​ປະຕິ​ເສດ​ຕໍ່​ການ​ຕຳ​ໜິຕິຕຽນ ຊ້ຳ​ແລ້ວ​ຊ້ຳອີກ ຕໍ່ການ​ຖົມ​ດິນເພື່ອສ້າງເກາະທຽມ ໂດຍ​ອ້າງ​ວ່າ ຈີນ​ມີສິດອະ​ທິ​ໄຕໃນ​ບໍລິ​ເວນ​ນັ້ນ.

​ເມື່ອອາທິດ​ກ່ອນ​ນີ້ ຮູບ​ພາບ​ດາວ​ທຽມ​ຕ່າງໆ ​ໄດ້ສະ​ແດງ​ໃຫ້​ເຫັນວ່າ ຈີນຍັງ​ໄດ້​ຂະຫຍາຍ​
ອອກ​ໄປອີກ ​ໃນສອງ​ເກາະ ​ທີ່ໝູ່​ເກາະ Paracel ຊຶ່ງ​ເປັນ​ເຂດ ​ທີ່​ມີການອ້າງກຳມະສິດ​ໂດຍ
ຫວຽດນາມ​.

ສະຫະລັດ ​ໃນ​ວັນ​ອັງຄານ​ຜ່ານ​ມາ ​ໄດ້​ຮຽກຮ້ອງ​ໃຫ້​ຈີນ ດຳ​ເນີນ​ການ​ແກ້​ໄຂ​ຢ່າງ​ສັນຕິ ຕໍ່
ບັນຫາ​ຂັດແຍ້ງ ເລື້ອງເຂດ​ນ້ຳ​ແດນ​ດິນ ​ຢູ່​ໃນ​ທະ​ເລ​ຈີນ​ໃຕ້.

​ໃນ​ອາທິດ​ນີ້​ເຊັ່ນ​ກັນ ພົນ​ເຮືອ​ເອກ Samuel Locklear ຜູ້​ບັນຊາ​ການ​ ໃນເຂດ ມະຫາສະມຸດ ປາຊີ​ຟິກຂອງສະຫະລັດ ກ່າວ​ຖະ​ແຫລ​ງ ຕໍ່​ບັນດາ​ຜູ້​ແທນສະຫະລັດ​ວ່າ ຈີນ ​ແມ່ນ “ບໍ່​ມີ​ທ່າ​ທີ​ວ່າ​ຈະ​ຊ້າ​ລົງ ​ໃນ​ຈັງ​ວະ​ຂອງ​ການ​ພັດທະນາ​ດ້ານ​ທະຫານ ຂອງ​ພວກ​ເຂົາ​ເຈົ້າ ​ໃຫ້​ທັນ​ສະ​ໄໝ​ຂຶ້ນ ​ໂດຍສະ​ເພາະ ​ແມ່ນ​ກອງທັບເຮືອ” ທີ່ໄດ້ເພີ້​ມອິດ​ທະ​ພົນ​ຂອງ​ປະ​ເທດ​ ​ໃນ​ທະ​ເລ​ຈີນ ​ໃຕ້ ​ແລະ ທະເລຈີນຕາ​ເວັນ​ອອກນັ້ນ.