ລິ້ງ ສຳຫລັບເຂົ້າຫາ

ກອງກຳລັງ ຂອງອີຣັກ ແລະຊາວເຄີດ ຢຶດຄືນໄດ້ ຫົວເມືອງສຳຄັນ ຈາກພວກລັດອິສລາມ


ນັກຕໍ່ສູ້ນິກາຍ Shiite ຄົນນຶ່ງ ແນປືນຂອງລາວ ໃສ່ພວກຫົວຮຸນແຮງ ໃນຂະນະ ທີ່ເຝົ້າຍາມເຂດເມືອງ Jurf al-Sakhar ໃນອີຣັກ ຊຶ່ງກອງກຳລັງຮັກສາຄວາມໝັ້ນຄົງ ໄດ້ຢຶດຄືນໄດ້ຈາກພວກຫົວຮຸນແຮງລັດອິສລາມ ເມື່ອວັນທີ 25 ຕຸລາ 2014.

ນາ​ຍົກ​ລັດຖະມົນຕີ​ອີຣັກ ທ່ານ Haider al-Abadi ​ເອີ້ນ​ການ​
ຢຶດ​ເອົາ ​ເມືອງ​ Jurf al-Sakhar ໄດ້ຄືນນັ້ນ ວ່າ​ເປັນ “ການ​
ທຳລາຍ​ອັນ​ຮ້າຍແຮງ”
ຕໍ່​ພວກ​ລັດ​ອິສລາມ.

ກອງ​ກຳລັງ​ອີຣັກ ທີ່​ໄດ້​ຮັບ​ການ​ຊ່ວຍ​ເຫຼືອ​ໂດຍການ​ໂຈມ​ຕີ​ທາງ​
ອາກາດ​ຂອງ​ແນວ​ໂຮມ ທີ່​ນຳ​ໂດຍ​ສະຫະລັດ ກ່າວ​ວ່າ ເຂົາ​ເຈົ້າ
​ໄດ້​ເຂົ້າຄວບ​ຄຸມ​ ເມືອງທີ່​ສຳຄັນ ຢູ່ທາງທິດໃຕ້​ຂອງ​ນະຄອນ
ຫລວງ​ແບກ​ແດດນັ້ນໂດຍ​ສິ້ນ​ເຊີງ​ແລ້ວ ລຸນຫຼັງ​ການ​ຕໍ່ສູ້​ກັບ​ພວກ
​ຫົວ​ຮຸນ​ແຮງ​ຢ່າງ​ໜັກ.

ພວກລັດອິສລາມ ​ໄດ້ຂົ່ມຂູ່ທີ່​ຈະ​ເຂົ້າຢຶດ​ເອົາ​ນະຄອນຫລວງ​
ແບກ​ແດດ ​ແລະການ​ສູນ​ເສຍ​ເຂດ​ແດນ​ໃດໆ ​ໃຫ້​ແກ່​ກອງ​ກຳລັງອີຣັກນັ້ນ ​ແມ່ນ​ເປັນ​ຄວາມ ​ປະລາ​ໄຊ ຢ່າງ​ໜັກໜ່ວງ.

​ໃນ​ວັນ​ເສົາ​ວານ​ນີ້​ເຊັ່ນກັນ ​ແຫ​ລ່ງຂ່າວ​ຈາກ​ເຈົ້າໜ້າ​ທີ່​ຄວາມໝັ້ນຄົງ​ ຂອງອີຣັກ ກ່າວ​ວ່າ​ ບັນດານັກຕໍ່ສູ້ທະຫານບ້ານ​ຊາວ​ເຄີ​ດ ​ໄດ້ຕີ​ເອົາ​ຄືນ​ໄດ້ ເມືອງ Zuma ຢູ່​ທາງ​ພາກ​ເໜືອ​ຂອງອີຣັກ ​ແລະໝູ່​ບ້ານ​ອ້ອມ​ແອ້ມຈຳນວນ​ນຶ່ງ ຈາກ​ພວກ​ລັດ​ອິສລາມ.

ກອງ​ບັນຊາ​ການ​ສະຫະ​ລັດ ສຳ​ຫລັບ​ເຂດ​ພາກ​ຕາ​ເວັນ​ອອກ​ກາງ ຫຼື U.S. Central Command ກ່າວ​ວ່າ​ ​ບັນດາເຮືອບິ​ນລົບ​ຂອງ​ແນວ​ໂຮມ ​ໄດ້​ທຳ​ການ​ໂຈມ​ຕີ​ທາງ​ອາກາດ
22 ຖ້ຽວ ຕໍ່ຕ້ານ​ກອງ​ກຳລັງ ພວກ​ຫົວ​ຮຸນ​ແຮງ​ໃນ​ອີ​ຣັກ ​ເມື່ອ​ວັນ​ສຸກ​ແລະ​ວັນ​ເສົາ​ຜ່ານ​ມາ.
​ເປົ້າໝາຍ​ຕ່າງໆ ​ແມ່ນລວມທັງ ​ເມືອງ Fallujah ​ແລະບໍລິ​ເວນ​ນຶ່ງໃກ້ໆ​ກັບ​ເຂື່ອນ Mosul ​
​ກັບ​ເມືອງ Bayji ຢູ່​ທາງ​ພາກ​ເໜືອ ຊຶ່ງ​ເປັນທີ່​ຕັ້ງ ຂອງ​ໂຮງ​ກັ່ນນ້ຳມັນ.

​ເຮືອບິນ​ລົບ​ຂອງ​ສະຫະລັດ ຍັງ​ໄດ້​ທຳລາຍ​ປືນ​ໃຫຍ່​ຂອງ​ພວກ​ລັດອິສ ລາມ ​ຢູ່​ເມືອງ​
ໂກ​ບາ​ນີ​ ​ໃນຊີ​ເຣຍ ​ໃກ້ໆ​ກັບ​ເຂດ​ຊາຍ​ແດນເທີ​ກີ.

ບັນດານັກຕໍ່ສູ້​ຊາວ​ເຄີ​ດ ​ໄດ້​ປ້ອງກັນ​ເມືອງ​ໂກ​ບາ​ນີ ຈາກ​ພວກ​ຫົວ​ຮຸນ​ແຮງ​ລັດ​ອິສລາມ
ມາ​ເປັນ​ເວລາ​ເກືອບ​ເດືອນ​ນຶ່ງ​ແລ້ວ.

ວີດີໂອ: ພວກລັດອິສລາມບຸກ ຄືບໜ້າ ເຂົ້າໄປໃກ້ ນະຄອນຫລວງແບກແດດ

XS
SM
MD
LG