ລັດຖະມົນຕີການຕ່າງປະເທດສະຫະລັດ ທ່ານ John Kerry
ກ່າວວ່າ ສະຫະລັດມີຄວາມໝາຍໝັ້ນ ທີ່ຈະຊຸກຍູ້ໃຫ້ດຳເນີນ
ການຕໍ່ໄປ ກ່ຽວກັບຈຸດສຸມໃໝ່ໃນເອເຊຍ ຂອງຕົນນັ້ນ.
ການໃຫ້ຄວາມເຫັນດັ່ງກ່າວ ຂອງທ່ານ Kerry ມີຂຶ້ນໃນລະ
ຫວ່າງການ ກ່າວຄຳປາໄສເມື່ອວັນພຸດວານນີ້ ຢູ່ທີ່ສູນກາງ
ຕາເວັນອອກ-ຕາເວັນຕົກ ທີ່ ລັດຮາວາຍ ຊຶ່ງເປັນບ່ອນຢຸດ
ແຫ່ງສຸດທ້າຍຂອງການເດີນທາງໄປຢ້ຽມຢາມເຂດປາຊີຟິກ
ເປັນເວລາ 8 ມື້.
ຫົວໜ້ານັກການທູດ ຂອງສະຫະລັດ ກ່າວວ່າ ປະທານາທິບໍດີ
ບາຣັກ ໂອບາມາ ໄດ້ຂໍຮ້ອງທ່ານໃຫ້ “ເພີ້ມທະວີ” ການດຳເນີນຄວາມພະຍາຍາມທາງ
ການທູດຂອງທ່ານ ຢູ່ໃນຂົງເຂດດັ່ງກ່າວ.
ທ່ານ Kerry ກ່າວວ່າ ສິ່ງທີ່ສຳຄັນໃນຄວາມພະຍາຍາມເຫຼົ່ານັ້ນ ແມ່ນການຜັນຂະຫຍາຍ
ຄວາມຮ່ວມໄມ້ຮ່ວມມື ກັບຈີນ ຊຶ່ງຈີນໄດ້ສະແດງຄວາມກັງວົນ ຕໍ່ອັນທີ່ເອີ້ນວ່າ “ການຫັນ” ໄປສູ່ເອເຊຍຂອງສະຫະລັດ.
ທ່ານ Kerry ເວົ້າວ່າ: “ບັດນີ້ ສິ່ງນຶ່ງທີ່ຂ້າພະເຈົ້າຮູ້ຈັກ ຈະປົກປັກຮັກສາສັນຕິພາບ
ແລະ ສະຖຽນລະພາບຢູ່ໃນຂົງເຂດ ກໍແມ່ນຄວາມສຳພັນ ແບບສ້າງສັນລະຫວ່າງ
ສະຫະລັດ ແລະ ຈີນ. ປະທານາທິບໍດີ ໂອບາມາ ໄດ້ສະແດງໃຫ້ເຫັນຢ່າງຈະແຈ້ງ
ແລ້ວວ່າ ສະຫະລັດຍິນດີ ກັບການມີອິດທິພົນເພີ້ມຂຶ້ນ ແບບມີສັນຕິພາບ ຄວາມ
ຈະເລີນຮຸ່ງເຮືອງ ແລະ ສະຖຽນລະພາບ ຂອງຈີນນັ້ນ ກໍຄືການເປັນປະເທດທີ່ມີ
ບົດບາດອັນແບບມີຄວາມຮັບຜິດຊອບໃນເອເຊຍ ແລະໃນໂລກ ແລະ ສະໜັບ
ສະໜຸນກົດລະບຽບ ແລະ ຫລັກການຕ່າງໆ ກ່ຽວກັບເລື້ອງເສດຖະກິດ ແລະ
ຄວາມໝັ້ນຄົງ. ປະທານາທິບໍດີ ໄດ້ກ່າວຢ່າງຈະແຈ້ງ ດັ່ງທີ່ຂ້າພະເຈົ້າໄດ້ເວົ້າ
ມານີ້ວ່າ ພວກເຮົາແມ່ນມີຄວາມໝາຍໝັ້ນ ທີ່ຈະຫລີກເວັ້ນຈາກກັບດັກ ໃນການ
ເປັນຄູ່ແຂ່ງທາງດ້ານຍຸດທະສາດ.”
ຂົງເຂດນຶ່ງທີ່ບໍ່ສາມາດຕົກລົງກັນໄດ້ ລະຫວ່າງຈີນ ແລະ ສະຫະລັດກໍ ຄືບັນຫາຂັດແຍ້ງ
ເລື່ອງເຂດນ້ຳແດນດິນ ຂອງປັກກິ່ງກັບບັນດາປະເທດ ເພື່ອນບ້ານ ໃນທະເລຈີນຕາເວັນ
ອອກ ແລະ ທະເລຈີນໃຕ້.
ໃນລະຫວ່າງກອງປະຊຸມຂອງບັນດາຜູ້ນຳປະເທດໃນເຂດເອເຊຍຕາເວັນອອກສຽງໃຕ້
ໃນມຽນມາ ບ່ອນທີ່ທ່ານ Kerry ກໍໄດ້ເຂົ້າຮ່ວມດ້ວຍນັ້ນ ຈີນໄດ້ປະຕິເສດ ຕໍ່ຂໍ້ສະເໜີ ຂອງສະຫະລັດ ເພື່ອຫລຸດຜ່ອນ ຄວາມເຄັ່ງຕຶງຕ່າງໆ ທີ່ກ່ຽວພັນກັບບັນຫາຂັດແຍ້ງ
ດັ່ງກ່າວ.
ທ່ານ Kerry ໃນວັນພຸດວານນີ້ ໄດ້ກ່າວຢ້ຳອີກ ວ່າສະຫະລັດບໍ່ໄດ້ເອົາທ່າທີໃດໆ ກ່ຽວ
ກັບບັນຫາຂັດແຍ້ງຕ່າງໆ ແຕ່ທ່ານກ່າວວ່າ ວໍຊິງຕັນແມ່ນເປັນຫ່ວງ ກ່ຽວກັບວິທີແກ້ໄຂ
ບັນຫາຂັດແຍ້ງເຫຼົ່ານັ້ນ.
