ເຈົ້າໜ້າທີ່ສາທາລະນະສຸກ ລະດັບສູງທ່ານນຶ່ງຂອງສະຫະລັດ
ກ່າວວ່າ ຜູ້ປ່ວຍຍ້ອນພະຍາດອີໂບລາຊາວໄລບີເຣຍ ຢູ່ລັດ
ເທັກຊັສ ແມ່ນ “ກຳລັງຕໍ່ສູ້ເພື່ອຊີວິດ” ຢູ່ທີ່ໂຮງໝໍແຫ່ງນຶ່ງ
ໃນນະຄອນ Dallas.
ດຣ Thomas Frieden ແຫ່ງສູນຄວບຄຸມພະຍາດ ຫຼື CDC
ຂອງສະຫະລັດ ໄດ້ບອກຕໍ່ໂທລະພາບ CNN ເມື່ອວັນອາທິດ
ວານນີ້ວ່າ ການຊອກຫາທຸກໆຄົນ ຜູ້ທີ່ໄດ້ສຳພັດກັບ ຄົນປ່ວຍ
ທ້າວ Thomas Eric Duncan ນັ້ນ ຈະຊ່ວຍຍຸດຕິ ການແຜ່ລາມ
ຂອງເຊື້ອອີໂບລາໄດ້.
ທ່ານໝໍໄດ້ກ່າວອີກວ່າ ນັ້ນແມ່ນເຫດຜົນ ທີ່ທ່ານໝັ້ນໃຈວ່າຈະບໍ່ມີການລະບາດເກີດຂຶ້ນຢູ່ໃນສະຫະລັດ. ແຕ່ທ່ານກ່າວວ່າ ບັນດາເຈົ້າໜ້າທີ່ສະຫະລັດ ແມ່ນມີຄວາມກັງວົນຢ່າງເລິກເຊິ່ງ ກ່ຽວກັບສິ່ງທີ່ເກີດຂຶ້ນ ຢູ່ໃນອາຟຣິກາຕາເວັນຕົກ ບ່ອນທີ່ທ່ານກ່າວວ່າ ຖ້າປ່ອຍໃຫ້ພະຍາດລະບາດຢູ່ຕໍ່ໄປດົນເທົ່າໃດ ມັນອາດຈະແຜ່ລາມອອກໄປປະເທດອື່ນໆ ຫຼາຍຂຶ້ນອີກ.
ອາການຂອງທ້າວ Duncan ໄດ້ຊຸດລົງ ໃນວັນເສົາຜ່ານມາ ຈາກຮ້າຍແຮງ ໄປເປັນຂັ້ນ
ອັນຕະລາຍ. ລາວໄດ້ຖືກວິນິດໄສວ່າ ຕິດເຊື້ອອີໂບລາ 4 ມື້ ຫຼັງຈາກເດີນທາງກັບຄືນມາ
ສະຫະລັດ ເມື່ອວັນທີ 20 ກັນຍາ ຈາກ ປະເທດໄລບີເຣຍ.
ນາຍແພດແຈ້ງໃຫ້ຊາບ ກ່ຽວກັບອາການຂອງທ້າວ Thomas Eric Duncan:
ບັນດາເຈົ້າໜ້າທີ່ລັດເທັກຊັສ ແລະລັດຖະບານກາງສະຫະລັດ ເຊື່ອວ່າ ລາວໄດ້ສຳພັດ ໂດຍກົງ ຫຼືບໍ່ໂດຍກົງ ກັບຄົນ ຫຼາຍອາດຮອດ 100 ຄົນກໍໄດ້ ແຕ່ພວກຄົນເຫຼົ່ານັ້ນ ບໍ່ໄດ້ສະແດງອາການໃດໆເລີຍ.
ອີ ໂບລາ ໄດ້ສັງຫານປະມານ 3,500 ຄົນແລ້ວ ຢູ່ໃນອາຟຣິກາຕາເວັນຕົກ ນັບຕັ້ງແຕ່ພະຍາດດັ່ງກ່າວໄດ້ເລີ້ມລະບາດຂຶ້ນ ເມື່ອປີແລ້ວນີ້. ປະເທດ ກີນີ ໄລບີເຣຍ ແລະ ຊີແອຣາ ລີອອນ ແມ່ນໄດ້ຮັບຜົນກະທົບຢ່າງໜັກໜ່ວງກ່ວາໝູ່.
ເຈົ້າໜ້າທີ່ສະຫະລັດ ໃຫ້ຄວາມໝັ້ນໃຈວ່າ ອີໂບລາຈະບໍ່ລະບາດ ຢູ່ໃນສະຫະລັດ:
