ປະທານປະເທດຈີນ ທ່ານສີ ຈິ້ນຜິງ ພົບປະກັບນາຍົກລັດຖະ
ມົນຕີໄທ ທ່ານປຣະຍຸດ ຈັນໂອຊາ ທີ່ໄດ້ເດີນທາງໄປຢ້ຽມຢາມ
ຢູ່ທີ່ປັກກິ່ງ ໃນວັນທີ 23 ທັນວາມື້ນີ້.
ທ່ານສີ ແລະ ທ່ານປຣະຍຸດ ຈັບມືກັນ ຢູ່ທີ່ຫໍປະຊາຊົນແຫ່ງຊາດ
ໃນປັກກິ່ງ ກ່ອນຈະພາກັນນັ່ງລົງ ສຳຫລັບການເຈລະຈາສອງ
ຝ່າຍ ພ້ອມກັນກັບຄະນະຜູ້ແທນຈາກຈີນ ແລະໄທ.
ທ່ານປຣະຍຸດ ຍັງໄດ້ພົບປະກັບນາຍົກລັດຖະມົນຕີຈີນ ທ່ານຫລີ
ເກີ້ຈຽງ ມື້ໜຶ່ງກ່ອນໜ້ານີ້ ຊຶ່ງຕິດຕາມມາດ້ວຍ ພິທີລົງນາມ ບ່ອນ
ທີ່ພວກເຂົາເຈົ້າຟື້ນຟູຄືນໃໝ່ ຂໍ້ຕົກລົງໃນການແລກປ່ຽນເງິນຕາ ທີ່ມີມູນຄ່າເຖິງ 70 ຕື້ຢວນ ຫຼື 11 ຕື້ 250 ລ້ານດອນລາ ແລະ ເສີມສ້າງການຮ່ວມມືທາງເທັກໂນໂລຈີ ໃນດ້ານແຫລ່ງນ້ຳ ແລະ ຊົນລະປະທານ ແລະ ການຮ່ວມມືລະຫວ່າງ ຕະຫລາດຫຸ້ນຂອງໄທ ແລະ ທະນາຄານປະຊາຊົນຂອງຈີນ.
ຂໍ້ຕົກລົງໃນການແລກປ່ຽນເງິນຕາ ລະຫວ່າງທັງສອງປະເທດນັ້ນ ກຳນົດໝົດອາຍຸລົງໃນວັນທີ 22 ທັນວານີ້.
ພາຍໃຕ້ຂໍ້ຕົງລົງທີ່ມີການຕໍ່ອາຍຸດັ່ງກ່າວ ທະນາຄານກາງຂອງທັງສອງປະເທດຈະແລກປ່ຽນ ເງິນຕາຂອງຕົນ ມູນຄ່າຫຼາຍໆລ້ານດອນລາ ເພື່ອຊ່ວຍສະໜັບສະໜຸນ ດ້ານການເງິນຕໍ່
ຂໍ້ຕົກລົງການຄ້າ ແລະການລົງທຶນຕ່າງໆ.
ທ່ານຫຼີ ໄດ້ເດີນທາງໄປຢ້ຽມຢາມ ໄທເມື່ອວັນທີ 19 ທັນວາຜ່ານມາ ຊຶ່ງການເປັນການຢ້ຽມຢາມທີ່ສຳຄັນຂອງຜູ້ນຳຕ່າງປະເທດ ນັບຕັ້ງແຕ່ການກໍ່ລັດຖະປະຫານໃນເດືອນພຶດສະພາ ອັນເປັນສັນຍານທີ່ບາງກອກ ກ່າວວ່າ ເປັນການຫັນເຂົ້າສູ່ພາວະປົກກະຕິ ແລະ ສົ່ງເສີມສຳຫລັບການຄ້າຂາຍ ໃນຂົງເຂດບອນທີ່ສະຫະລັດ ແລະຈີນ ແຂ່ງຂັນກັນໃຫ້ມີອິດທິພົນ ນັ້ນ.
ໃນລະຫວ່າງການຢ້ຽມຢາມຂອງທ່ານຫຼີນັ້ນ ຈີນໄດ້ຕົກລົງຈະກໍ່ສ້າງເຄືອຂ່າຍທາງລົດໄຟ
ໃນໄທ ແລະ ຕົກລົງຊື້ເຂົ້າ 2 ລ້ານໂຕນຈາກໄທ.
ຈີນຍັງໄດ້ສະເໜີ ເງິນກູ້ຢືມຫຼາຍກວ່າ 3 ຕື້ດອນລາ ແລະ ການຊ່ວຍເຫຼືອໃຫ້ແກ່ບັນດາ
ປະເທດເພື່ອນບ້ານລວມທັງໄທ ເພື່ອໃຫ້ປັບປຸງລະບົບໂຄງລ່າງ ແລະ ການຜະລິດ ແລະ
ເພື່ອຕໍ່ສູ້ກັບຄວາມຍາກຈົນ.
