ກຸ່ມປົກປ້ອງສິດທິມະນຸດກຸ່ມນຶ່ງ ໄດ້ນຳພາບຈາກດາວທຽມອອກ
ເຜີຍແຜ່ ທີ່ໄດ້ສະແດງໃຫ້ເຫັນເຖິງການທຳລາຍ ໃນທາງພາກ
ຕາເວັນອອກສຽງເໜືອຂອງໄນເຈີເຣຍ ທີ່ກະທຳໂດຍກຸ່ມຫົວ
ຮຸນແຮງ Boko Haram.
ອົງການນິລະໂທດກຳສາກົນ ກ່າວວ່າ ພາບຂອງເມືອງ Baga
ແລະເມືອງ Doron Baga ທີ່ຢູ່ ໃກ້ຄຽງ ຊຶ່ງໄດ້ຖ່າຍທັງກ່ອນ
ແລະຫລັງການໂຈມຕີ ສະແດງໃຫ້ເຫັນວ່າ ມີບ້ານເຮືອນ
ປະມານ 3 ພັນ 700 ຫຼັງ ໄດ້ຖືກຈູດເຜົາ ບໍ່ດົນຫຼັງຈາກທີ່ກຸ່ມ
Boko Haram ໄດ້ເຂົ້າຍຶດເອົາເມືອງ Baga ເມື່ອວັນທີ 3
ມັງກອນຜ່ານມານີ້.
ການຈູດເຜົາບ້ານເຮືອນສ່ວນໃຫຍ່ ແມ່ນຢູ່ໃນເມືອງ Doron Baga ຊຶ່ງນັກຄົ້ນຄວ້າ ຂອງອົງ
ການນິລະໂທດກຳສາກົນ ທ່ານ Daniel Eyre ກ່າວວ່າ “ເກືອບວ່າ ມັນໄດ້ລຶບອອກໄປຈາກແຜນທີ່ໝົດກ້ຽງເລີຍພຽງແຕ່ໃນເວລາ 4 ມື້ເທົ່ານັ້ນ.”
ກຸ່ມປົກປ້ອງສິດທິມະນຸດກຸ່ມນີ້ ຍັງກ່າວອີກວ່າ ຈາກການສຳພາດກັບພວກທີ່ເຫັນເຫດການ ແລະເຈົ້າໜ້າທີ່ທ້ອງຖິ່ນ ແນະໃຫ້ເຫັນວ່າ ພວກຫົວຮຸນແຮງໄດ້ຍິງພົນລະເຮືອນຫຼາຍຮ້ອຍຄົນ ຊຶ່ງຮວມທັງພວກເດັກນ້ອຍ ແລະແມ່ຍິງ ທີ່ກຳລັງອອກລູກຢູ່ນັ້ນ.
ກອງກຳລັງທະຫານ ໄນເຈີເຣຍ ກະປະມານຈຳນວນຂອງຜູ້ເສຍຊີວິດ ໃນການໂຈມຕີທີ່ເມືອງ
Baga ແມ່ນ 150 ຄົນ ແຕ່ວ່າ ເຈົ້າໜ້າທີ່ທ້ອງຖິ່ນໄດ້ກ່າວວ່າ ມີທ່າທາງວ່າຈະມີຫຼາຍກວ່າ 1 ພັນຄົນ ດ້ວຍຊ້ຳ.
ອົງການນິລະໂທດກຳສາກົນ ໄດ້ກ່າວໃນວັນພຸດວານນີ້ວ່າ ອິງຕາມການຄົ້ນຄວ້າຂອງຕົນນັ້ນ ກຸ່ມ Boko Haram ໄດ້ໂຈມຕີເມືອງ Baga ເພາະວ່າ ມັນແມ່ນບ້ານຂອງສະມາຊິກຂອງກອງກຳລັງປະສົມພົນລະເຮືອນ ຊຶ່ງເປັນກຸ່ມປະຊາຊົນ ທີ່ໃຫ້ການຊ່ອຍເຫຼືອແກ່ພວກທະຫານໃນ
ການຕໍ່ສູ້ກັບ ກຸ່ມຫົວຮຸນແຮງອີສລາມນັ້ນ.
ເບິ່ງວີດີໂອກ່ຽວຂ້ອງ:
