ປະເທດ ອອສເຕຣເລຍ ໄດ້ເຫັນດີທີ່ຈະປິດສະຖານທີ່ກັກຂັງຜູ້ຂໍລີ້ໄພໃນເກາະ Manus ທາງພາກເໜືອຂອງ ປາປົວ ນິວກີນີ.
ການປິດສະຖານທີ່ດັ່ງກ່າວໄດ້ຖືກປະກາດໃຫ້ຊາບໃນວັນພຸດມື້ນີ້ ໃນຖະແຫລງການສະ ບັບໜຶ່ງ ໂດຍນາຍົກລັດຖະມົນຕີ ປາປົວ ນິວກີນີ ທ່ານ Peter O’Neil, ທີ່ກ່າວວ່າ ໄດ້ມີການບັນລຸຂໍ້ຕົກລົງສະບັບໜຶ່ງ ຫຼັງຈາກການພົບປະກັບລັດຖະມົນຕີ ຮັບຜິດຊອບ ດ້ານຄົນເຂົ້າເມືອງຂອງອອສເຕຣເລຍ ທ່ານ Peter Dutton ທີ່ເມືອງ Port Moresby. ສານສູງ ສຸດຂອງປະເທດເກາະດອນທີ່ຕັ້ງຢູ່ໃນມະຫາສະໝຸດ ປາຊີຟິກ ແຫ່ງນີ້ ໄດ້ຕັດສິນໃນ ເດືອນເມສາທີ່ຜ່ານມາວ່າ ສະຖານທີ່ດັ່ງກ່າວແມ່ນບໍ່ຖືກຕ້ອງຕາມກົດໝາຍ, ໃນຂະນະທີ່ ມັນໄດ້ລ່ວງລະເມີດສິດທິຕາມລັດຖະທຳມະນູນຂອງພວກຖືກກັກຂັງ ກ່ຽວກັບ ສິດເສລີ ພາບຂອງ ສ່ວນບຸກຄົນ.
ຖະແຫຼງການບໍ່ໄດ້ແຈ້ງໃຫ້ຊາບກ່ຽວກັບກຳນົດເວລາໃນການປິດສະຖານທີ່ກັກຂັງດັ່ງ ກ່າວໃນທີ່ສຸດນັ້ນ.
ມີຫລາຍກວ່າ 800 ຄົນແມ່ນກຳລັງຖືກກັກຂັງທີ່ສູນ Manus ແລະ ອີກຫຼາຍຮ້ອຍຄົນຖືກ ກັກຂັງ ທີ່ສະຖານກັກຂັງແຫ່ງທີ 2 ໃນເກາະ Nauru, ເຊິ່ງເປັນສ່ວນໜຶ່ງຂອງນະໂຍບາຍ Canberra ເພື່ອສະກັດກັ້ນພວກທີ່ພະຍາຍາມເດີນທາງໂດຍທາງເຮືອໄປອອສເຕຣເລຍ ແລະ ຂໍລີ້ໄພທີ່ນັ້ນ. ພວກອົບພະຍົບໄດ້ຖືກຂັດຂວາງບໍ່ໃຫ້ເຂົ້າໄປຕັ້ງຖິ່ນຖານໃໝ່ ໃນ ອອສເຕຣເລຍ, ເຖິງແມ່ນວ່າ ພວກເຂົາເຈົ້າໄດ້ຮັບສະຖານະເປັນອົບພະຍົບກໍຕາມ.
ທ່ານ Dutton ໄດ້ອອກຖະແຫຼງການສະບັບໜຶ່ງໃນວັນພຸດມື້ນີ້ ເພື່ອຢືນຢັນອີິກຄັ້ງໜຶ່ງ ກ່ຽວກັບ ນະໂຍບາຍດັ່ງກ່າວນັ້ນ ແລະ ເນັ້ນຢ້ຳວ່າ ຈະບໍ່ມີໃຜຈາກສະຖານທີ່ກັກຂັງໃນ ເກາະ Manus ໄດ້ຮັບອະນຸຍາດ ໃຫ້ເຂົ້າໄປຕັ້ງຖິ່ນຖານໃນ ອອສເຕຣເລຍ.
