ບັນດາເຈົ້າໜ້າທີ່ສະຫະລັດ ແລະອີຣັກຈຳນວນນຶ່ງ ພາກັນສະແດງຄວາມເຫັນໄປໃນແງ່ດີຫຼາຍຂຶ້ນ ກ່ຽວກັບຄວາມເປັນໄປໄດ້ໃນການທີ່ຈະເຂົ້າຍຶດເອົາເມືອງ Mosul ຊຶ່ງເປັນເມືອງທີ່ສຳຄັນ ກັບຄືນມາຈາກກຸ່ມກໍ່ການຮ້າຍລັດອິສລາມຫລື IS ໄວກວ່າທີ່ຄາດຄິດໄວ້ໃນຂັ້ນຕົ້ນ.
ບໍ່ມີໃຜສະເໜີແນະວ່າ ການສູ້ລົບເພື່ອເຂົ້າຍຶດເອົາເມືອງສຳຄັນ ຊຶ່ງເປັນເມືອງ ຫລວງຂອງກຸ່ມ ທີ່ສະຖາປະນາຕົນເອງວ່າເປັນລັດອິສລາມນັ້ນ ຈະເປັນເລື້ອງ ທີ່ງ່າຍດາຍ. ແຕ່ກໍມີຄວາມຮູ້ສຶກກັນວ່າ ແຮງກະຕຸກຊຸກຍູ້ແມ່ນເປັນຂອງກຳລັງອີຣັກ ທີ່ໝູນຫລັງໂດຍກຳລັງທາງອາກາດຂອງສະຫະລັດແລະແນວໂຮມ ແລະບັດນີ້ກໍເຖິງເວລາທີ່ຈະບຸກຄວາມຄືບໜ້າໄດ້.
“ໃນຫລາຍໆດ້ານການໂຈມຕີທາງທະຫານຂອງພວກເຮົາ ປັດນີ້ ແມ່ນກ້າວໜ້າ ກ່ອນທີ່ພວກເຮົາໄດ້ຄຶດເອົາໄວ້ ໃນປັດຈຸບັນນີ້” ນັ້ນຄືຄຳເວົ້າຂອງທູດພິເສດປະ ທານາທິບໍດີສະຫະລັດ ທ່ານ Envoy Brett McGurk ໄດ້ກ່າວໃນວັນອັງຄານວານນີ້ ກ່ອນໜ້າສອງ ກອງປະຊຸມ ທີ່ເພັ່ງເລັງໃສ່ອະນາຄົດຂອງອີຣັກແລະການ ສູ້ລົບຕ້ານກຸ່ມ IS.
“ເມືອງ Mosul ບັດນີ້ ແມ່ນຂຶ້ນຢູ່ກັບພວກເຮົາ” ທ່ານໄດ້ກ່າວເພີ້ມຕື່ມຢູ່່ໃນການພົບກັບລັດຖະມົນຕີຕ່າງປະເທດອີຣັກ ທີ່ສະຖາບັນສັນຕິພາບສະຫະລັດໂດຍໃຫ້ ຂໍ້ສັງເກດວ່າ ກຳລັງຮັກສາຄວາມປອດໄພອີຣັກ ຍັງບໍ່ທັນໄດ້ເສຍໄຊ ໃນການສູ້ລົບມາໄດ້ກວ່ານຶ່ງປີແລ້ວ.
ລັດຖະມົນຕີຕ່າງປະເທດອີຣັກ ກໍມີຄວາມເຫັນໄປໃນແງ່ດີ ໂດຍຮ້ອງເມືອງ Mosul ວ່າ “ເປັນເປົ້າໝາຍຕໍ່ໄປ.”
ທ່ານ Ibrahim al-Jaafari ກ່າວຜ່ານນາຍພາສາວ່າ “ມັນເປັນບ່ອນຫລົບລີ້ແຫ່ງສຸດທ້າຍ ຂອງ Daesh ໃນອີຣັກ.”
ເຖິງແມ່ນໄດ້ຮັບກຳລັງໃຈຈາກການບຸກໂຈມຕີ ເມື່ອໄວໆມານີ້ເພື່ອເຂົ້າຍຶດເອົາຖານທັບອາກາດ Qayyarah West ຊຶ່ງຕັ້ງຢູ່ທາງທິດໃຕ້ຂອງເມືອງ Mosul ຈາກ IS ກໍຕາມ ທັງທ່ານ McGurk ຫລືທ່ານ Jaafari ກໍບໍ່ຍອມຕັ້ງກຳນົດ ເວລາ ກ່ຽວກັບການປະຕິບັດງານເພື່ອຍຶດເມືອງ Mosul ໂດຍຮັບຮູ້ວ່າຄວາມພະຍາຍາມໃດໆກໍຕາມ ທີ່ຈະຍຶດເອົາເມືອງດັ່ງກ່າວນັ້ນຄືນມາຈະເຕັມໄປດ້ວຍ ຄວາມສັບສົນ ດ້ວຍການຕີຕ້ານຄືນກໍມີທາງເປັນໄປໄດ້.
