ບັນດາເຈົ້າໜ້າທີ່ຈີນກ່າວໃນວັນອັງຄານມື້ນີ້ວ່າ ອັກຄີໄຟທີ່ໄດ້
ລຸກໄໝ້ເຜົາຜານບ້ານພັກແຫ່ງນຶ່ງຂອງພວກຜູ້ເຖົ້າ ຢູ່ໃນພາກ
ກາງຂອງປະເທດຈີນ ເຮັດໃຫ້ມີຜູ້ເສຍຊີວິດ 38 ຄົນ ແລະໄດ້ຮັບ
ບາດເຈັບຫົກຄົນ ອ້າງອີງຕາມລາຍງານຂອງ ອົງການຂ່າວເອພີ.
ອັກຄີໄພໄດ້ເກີດຂື້ນໃນຕອນກາງຄືນຂອງວັນຈັນວານນີ້ ຢູ່ຕຶກ
ອາຄານບ້ານພັກ ພວກຜູ້ເຖົ້າທີ່ບໍລິຫານງານໂດຍເອກກະຊົນ
ທີ່ເມືອງ Pingdingshan ໃນແຂວງ Henan ອີງຕາມຖະແຫລງການຂອງຫ້ອງການຄຸ້ມຄອງຄວາມປອດໄພໃນດ້ານ ວຽກງານ
ຂອງແຂວງ.
ຖະແຫລງການກ່າວວ່າ ສອງຄົນທີ່ໄດ້ຮັບບາດເຈັບ ແມ່ນຢູ່ໃນອາການສາຫັດ. ອົງການ
ຂ່າວຊິນຫົວຂອງທາງການຈີນ ກ່າວວ່າ ການປະຕິບັດງານກູ້ໄພ ກຳລັງດຳເນີນຢູ່ຕໍ່ໄປ
ໃນຕອນເຊົ້າວັນອັງຄານມື້ນີ້ ແລະສາເຫດຂອງອັກຄີໄພ ຍັງບໍ່ທັນເປັນທີ່ແຈ່ມແຈ້ງເທື່ອ.
ຍ້ອນມີປະຊາຊົນທີ່ເຖົ້າແກ່ຊະລາເພີ້ມຂື້ນຢ່າງວອງໄວ ແລະພາຍໃຕ້ຕາໜ່າງ ຄວາມ
ປອດໄພຂອງສັງຄົມທີ່ບໍ່ມີການຊ່ວຍເຫລືອແກ່ປະຊາຄົມພຽງພໍ ຈີນປະເຊີນໜ້າກັບ
ຄວາມກົດດັນເພີ້ມຂຶ້ນ ເພື່ອໃຫ້ສະໜອງການປິ່ນປົວເບິ່ງແຍງພວກ ຜູ້ເຖົ້າທີ່ປອດໄພ
ແລະບໍ່ແພງເກີນໄປ.
ໃນປີ 2013 ຜູ້ທີ່ບໍ່ພໍໃຈຄົນນຶ່ງ ໄດ້ຈູດບ້ານພັກຂອງພວກຜູ້ເຖົ້າ ໂດຍສັງຫານຕົນເອງ
ແລະອີກ 10 ຄົນທີ່ແຂວງ Heilongjiang ຢູ່ທາງພາກຕາເວັນອອກ ສຽງເໜືອຂອງຈີນ.