ຫົວໜ້າຄະນະກຳມະການຕຸລາການຂອງສະພາສູງສະຫະລັດ ກ່າວວ່າ ແມ່ຍິງ ທີ່ກ່າວ
ຫາທ່ານແບຣັດ ຄາແວນໍ ຜູ້ຖືກສະເໜີຊື່ໃຫ້ເປັນຜູ້ພິພາກສາສານສູງສຸດວ່າລວນລາມ
ທາງເພດຜູ້ກ່ຽວນັ້ນ ມີເວລາຮອດຕອນເຊົ້າ ວັນສຸກມື້ອື່ນ ເພື່ອຈະແຈ້ງໃຫ້ຊາບວ່າ ຜູ້
ກ່ຽວມີແຜນທີ່ຈະໄປໃຫ້ການຕໍ່ໜ້າຄະນະກຳມະການດັ່ງກ່າວໃນວັນຈັນອາທິດຈະມາ
ນີ້ຫຼືບໍ່.
ທ່ານນາງຄຣິສຕິນ ແບລຊີ ຝອດ (Christine Blasey Ford) ອາຈານສອນ ຈິດຕະ
ວິທະຍາຢູ່ທີ່ລັດຄາລີຟໍເນຍ ໄດ້ກ່າວຫາທ່ານຄາແວນໍວ່າ ລວນລາມທາງເພດຕໍ່ທ່ານ
ນາງເມື່ອ 36 ປີກ່ອນ ເວລາບຸກຄົນທັງ 2 ຍັງເປັນນັກຮຽນຢູ່ມັດທະຍົມປາຍ ຊຶ່ງການ
ກ່າວຫາໃນການລວນລາມດັ່ງກ່າວ ໄດ້ເຮັດໃຫ້ທ່ານນາງຝອດ ມີຄວາມຢ້ານກົວກ່ຽວ
ກັບຊີວິດຂອງທ່ານນາງ. ທ່ານຄາແວນໍໄດ້ປະຕິເສດຕໍ່ການກ່າວອ້າງທີ່ວ່ານີ້.
ທ່ານຊັກ ແກຣັສລີ (Chuck Grassley) ປະທານຄະນຳກຳມະການຕຸລາການຂອງ
ສະພາສູງ ກ່າວຢູ່ໃນຈົດໝາຍສະບັບນຶ່ງວ່າ “ດັ່ງທີ່ທ່ານຮູ້ ຂ້າພະເຈົ້າ ແມ່ນເປີດຄືນ
ການຮັບຟັງຄຳໃຫ້ການ ກ່ຽວກັບການສະເໜີແຕ່ງຕັ້ງຜູ້ພິພິພາກສາຄາແວນໍ ໂດຍຈະ
ພິຈາລະນາ ກ່ຽວກັບການກ່າວຫາ ຂອງ ດຣ. ຝອດ. ການຮັບຟັງຄຳໃຫ້ການດັ່ງກ່າວ
ຈະເລີ້ມຄືນອີກໃນມື້ວັນຈັນ ທີ 25 ກັນຍາໃນເວລາ 10 ໂມງເຊົ້າ. ຂ້າພະເຈົ້າໄດ້ເຊື້ອ
ເຊີນ ດຣ. ຝອດ ມາໃຫ້ການ ກ່ຽວກັບການກ່າວຫາ ຂອງທ່ານນາງ ຕໍ່ຜູ້ພິພາກສາຄາ
ແວນໍ ແລະເພື່ອເປັນການຮັບຮູ້ ກ່ຽວກັບວ່າມັນມີຄວາມຫຍຸ້ງຍາກຫຼາຍປານໃດທີ່ຈະ
ສົນທະນາກັນ ໃນການກ່າວຫາແບບນີ້ ຕໍ່ສາທາລະນະ ຂ້າພະເຈົ້າຍັງໄດ້ສະເໜີໃຫ້
ໂອກາດຕໍ່ທ່ານນາງມາໃຫ້ການຢ່າງເປັນການເປີດເຜີຍ ຫຼືແບບປິດລັບ.”
ທ່ານນາງຝອດບໍ່ໄດ້ສະແດງຮ່ອງຮອຍໃດໆໃຫ້ເຫັນວ່າ ທ່ານນາງຈະໄປໃຫ້ການຫຼືບໍ່.
ທະນາຍຄວາມຂອງທ່ານນາງ ໄດ້ຮຽກຮ້ອງ ໃຫ້ອົງການສັນຕິບານກາງຫຼືແອັຟບີອາຍ
ຂອງສະຫະລັດ ທຳການສືບສວນກ່ຽວກັບການກ່າວຫານີ້ ກ່ອນທີ່ທ່ານນາງຈະໄປໃຫ້
ການ.
ທ່ານນາງລີຊາ ແບັງສ໌ ນຶ່ງໃນທະນາຍຄວາມຂອງທ່ານນາງຝອດ ກ່າວຕໍ່ໂທລະພາບ
CNN ໃນວັນພຸດວານນີ້ວ່າ “ການເລັ່ງລັດເພື່ອຮັບຟັງຄຳໃຫ້ການແມ່ນບໍ່ຈຳເປັນແລະ
ໃນທາງກົງກັນຂ້າມຄະນະກຳມະການແມ່ນກຳລັງຄົ້ນພົບຄວາມຈິງຢູ່ແລ້ວ.”
ທ່ານນາງແບັງສ໌ ກ່າວວ່າ ທ່ານນາງຝອດ ແລະຄອບຄົວຂອງທ່ານນາງ ແມ່ນໄດ້ຮັບ
ການຂົ່ມຂູ່ ຊຶ່ງເຮັດໃຫ້ພວກເຂົາເຈົ້າຕ້ອງໄດ້ພາກັນໜີອອກຈາກເຮືອນໄປ.
ທ່ານນາງແບັງສ໌ ກ່າວວ່າ “ທ່ານນາງຍັງສືບຕໍ່ ເຊື່ອໝັ້ນວ່າ ການສືບສວນຢ່າງເຕັມທີ່
ແບບບໍ່ກ່ຽວຂ້ອງ ກັບພັກການເມືອງ ໃນເລື້ອງນີ້ ແມ່ນມີຄວາມຈຳເປັນແລະທ່ານນາງ
ກໍເຕັມໃຈ ທີ່ຈະໃຫ້ຄວາມຮ່ວມມື ກັບທາງຄະນະນະກຳມະການ. ແຕ່ແນວໃດກໍຕາມ
ທາງຄະນະກຳມະການ ໄດ້ກຳນົດແຜນການທີ່ຈະດຳເນີນຕໍ່ໄປ ໃນການຮັບຟັງຄຳໃຫ້
ການ ທີ່ມີພະຍານແຕ່ພຽງ 2 ຄົນເທົ່ານັ້ນ ແມ່ນເປັນການສືບສວນທີ່ບໍ່ຍຸຕິທຳ ຫຼືຈິງໃຈ
ເລີຍ ຖ້າຫາກມີພະຍານ ຫຼາຍໆຄົນ ຊຶ່ງຊື່ຂອງພວກເຂົາເຈົ້າ ໄດ້ປາກົດ ໃຫ້ສາທາລະ
ນະຊົນຮູ້ຢູ່ແລ້ວ ແລະກໍຄວນຈະຮວມຢູ່ໃນການດຳເນີນການໃດໆກໍຕາມ.”
ຄະນະກຳມະການຕຸລາການຂອງສະພາສູງ ກຳລັງພິຈາລະນາ ການສະເໜີແຕ່ງຕັ້ງ
ໃຫ້ທ່ານຄາແວນໍ ເປັນຜູ້ພິພາກສາສານສູງສຸດ ຕະຫຼອດຊີວິດ ຂອງປະເທດ.
