ການໂຕ້ວາທີເທື່ອຫລ້າສຸດ ຂອງບັນດາຜູ້ສະມັກປະທານາທິບໍດີ
ສະຫະລັດສັງ ກັດພັກຣີພັບບລບິກັນ ໃນວັນພະຫັດວານນີ້ ໄດ້
ກາຍມາເປັນການຮ້ອງໃສ່ກັນ ໃນຂະນະທີ່ບັນດາຜູ້ສະມັກກ່າວ
ເຖິງບັນຫາຕ່າງໆເຊັ່ນເລື້ອງຄົນເຂົ້າເມືອງຜິດກົດໝາຍ ນະໂຍ
ບາຍຂອງສະຫະລັດຢູ່ພາກຕາເວັນອອກກາງ ແລະຄວາມແຈ້ງ
ຂາວກ່ຽວກັບປະຫວັດການເສຍພາສີຂອງບັນດາຜູ້ສະໝັກ.
ມະຫາເສດຖີອະສັງຫາລິມະຊັບພັນລ້ານ ທ່ານ Donald Trump
ໄດ້ກ່າວອ້າງຊໍ້າແລ້ວຊໍ້າອີກວ່າ ທ່ານຈະເຮັດໃຫ້ເມັກຊິໂກ ຈ່າຍ
ຄ່າສ້າງກຳແພງ ທີ່ທ່ານໄດ້ສະເໜີຈະສ້າງຂຶ້ນ ຢູ່ຊາຍແດນທາງ
ພາກໃຕ້ຂອງສະຫະລັດ ເພື່ອຫຼຸດຜ່ອນການລັກລອບເຂົ້າເມືອງ
ຜິດກົດໝາຍ ແລະຍ້ອນການຄັດຄ້ານຂອງບັນດາຜູ້ນຳເມັກຊິໂກກ່ຽວກັບບັນຫາດັ່ງກ່າວ ທ່ານກ່າວວ່າ “ກຳແພງນີ້ຈະສູງຂຶ້ນຕື່ມ 10 ຟິດ.”
ບັນດາຄູ່ແຂ່ງ ທີ່ມີຄະແນນສຽງໃກ້ຄຽງຂອງທ່ານ ສະມາຊິກສະພາສູງຈາກລັດ Florida ທ່ານ Marco Rubio ແລະສະມາຊິກສະພາສູງ ຈາກລັດ Texas ທ່ານ Ted Cruz ກ່າວຫາທ່ານ Trump ວ່າ ໃຊ້ແຮງງານຄົນເຂົ້າເມືອງຜິດກົດໝາຍຢູ່ໃນໂຄງການກໍ່ສ້າງຕຶກທີ່ສຳຄັນໆຈຳນວນນຶ່ງ. ທັງສອງທ່ານກ່າວວ່າ ທ່ານ Trump ຖືກບັງຄັບໃຫ້ຈ່າຍຄ່າປັບໃໝ 1 ລ້ານໂດລາ ໃນຖານຈ້າງຄົນເຂົ້າເມືອງຜິດກົດໝາຍ.
ທັງທ່ານ Rubio ແລະ ທ່ານ Cruz ໄດ້ກ່າວເຖິງຄວາມເພິ່ງພໍໃຈຂອງພວກທ່ານທີ່ຈະເຮັດເປີດເຜີຍປະຫວັດການເສຍພາສີເຂົາເຈົ້າແກ່ສາທາລະນະຊົນຮູ້ ແລະໄດ້ຕິຕຽນທ່ານ Trump ທີ່ຍັງລັງເລ ໃນເລື້ອງດັ່ງກ່າວ. ທ່ານ Trump ກ່າວວ່າ ທ່ານຈະເປີດເຜີຍປະຫວັດການເສຍພາສີຂອງທ່ານ ຊຶ່ງເປັນການປະ ຕິບັດແບບທຳມະດາຢູ່ແລ້ວ ສຳລັບບັນດາຜູ້ສະໝັກປະທານາທິບໍດີສະຫະລັດ ໃນອັນທີ່ທ່ານຮ້ອງວ່າ “ເປັນການກວດກາທີ່ປົກກະຕິ.”
ໃນການຕອບຄຳຖາມກ່ຽວກັບນະໂຍບາຍຕ່າງປະເທດນັ້ນ ທ່ານ Trump ກ່າວວ່າ ທ່ານບໍ່ໃຫ້ການສະໜັບສະໜູນ ຕໍ່ຂໍ້ຕົກລົງຢຸດຍິງທີ່ຈະເລີ້ມມີຜົນບັງຄັບຢູ່ໃນຊີເຣຍ.
