ໄອຍະການພິເສດ ທີ່ພວມທຳການສືບສວນ ກ່ຽວກັບການໃຊ້ອິດທິພົນຂອງຣັດເຊຍ
ແຊກແຊງເຂົ້າໃນການເລືອກຕັ້ງປະທານາທິບໍດີສະຫະລັດ ໃນປີກາຍນີ້ ແລະຄວາມ
ເປັນໄປໄດ້ ທີ່ອາດມີການພົວພັນ ກັບການໂຄສະນາຫາສຽງຂອງປະທານາທິບໍດີ
ດໍໂນລ ທຣຳ ໄດ້ຂະຫຍາຍວົງກວ້າງອອກ ຮວມທັງການກວດກາເບິ່ງວ່າປະທານາ
ທິບໍດີ ໄດ້ຂັດຂວາງຂະບວນການຍຸຕິທຳ ຫຼືບໍ່?
ການເປີດເຜີຍດັ່ງກ່າວ ມີຂຶ້ນ ເມື່ອແລງວັນພຸດວານນີ້ ໃນບົດຂຽນທີ່ພິມເຜີຍແຜ່
ໂດຍໜັງສືພິມ Washington Post, New York Time ແລະ Wall Street
Journal ອີງຕາມຄຳເວົ້າຂອງພວກທີ່ຮູ້ເລື່ອງດີ ກ່ຽວກັບການສືບສວນ.
ພວກໜັງສືພິມທັງສາມ ກ່າວວ່າ ທ່ານ Robert Mueller ໄອຍະການພິເສດ
ມີແຜນທີ່ຈະສຳພາດຜູ້ອຳນວຍການອົງການສືບລັບແຫ່ງຊາດ ທ່ານ Dan Coats, ຜູ້ອຳນວຍການອົງ ການຄວາມໝັ້ນຄົງແຫ່ງຊາດ ຫຼື NSA ທ່ານ Michael Rogers
ແລະ ທ່ານ Richard Ledgett ອະດີດຮອງຜູ້ອຳນວຍການອົງການ NSA.
ອີງຕາມລາຍງານຂອງໜັງສືພິມ Washington Post ແລະ Wall Street Journal
ແລ້ວ ທ່ານ Ledgett ໄດ້ຂຽນບັນທຶກທີ່ໄດ້ອະທິບາຍເຖິງການສົນທະນາທາງໂທລະສັບ
ທີ່ທ່ານທຣຳ ໄດ້ໂອ້ລົມກັບທ່ານ Coats ຊຶ່ງປະທານາທິບໍດີ ໄດ້ຂໍຮ້ອງໃຫ້ທ່ານ Coats
ປະກາດຢ່າງເປັນການເປີດເຜີຍວ່າ ຄະນະໂຄສະນາຫາສຽງຂອງທ່ານ ບໍ່ໄດ້ຮວມຫົວ
ກັບຣັດເຊຍ.
ໜັງສືພິມ Washington Post ຍັງໄດ້ລະບຸອີກວ່າ ທ່ານທຣຳ ໄດ້ຮຽກຮ້ອງໃນລັກສະນະ
ດຽວກັນນີ້ ໃນການໂອ້ລົມທາງໂທລະສັບກັບທ່ານ Rogers.
ທ່ານ Mark Corallo ໂຄສົກຂອງທະນາຍຄວາມສ່ວນຕົວຂອງທ່ານທຣຳ ໄດ້ກ່າວວ່າ
“ອົງການ FBI ໄດ້ເຮັດໃຫ້ຂໍ້ມູນຮົ່ວໄຫຼ ກ່ຽວກັບປະທານາທິບໍດີ ນັ້ນແມ່ນໂພດໄປ
ແບບທີ່ໃຫ້ອະໄພບໍ່ໄດ້ ແລະຜິດກົດໝາຍນຳດ້ວຍ.”
ປະທານຂອງຄະນະກຳມະການແຫ່ງຊາດຂອງພັກ Republican ທ່ານນາງ Ronna McDaniel ໄດ້ຕຳນິຕິຕຽນໜັງສືພິມ Washington Post ວ່າ “ເປັນການກ່າວຫາ ທີ່
ບໍ່ມີມູນຄວາມຈິງ.”
“ມັນຍັງບໍ່ມີຫຼັກຖານໃດໆກ່ຽວກັບການຂັດຂວາງຂະບວນການຍຸຕິທຳ ແລະບັນດາ
ຜູ້ນຳຄົນໃນປະຈຸບັນ ແລະອະດີດ ຂອງປະຊາຄົມສືບລັບ ຕ່າງກໍໄດ້ກ່າວຊ້ຳແລ້ວຊ້ຳ
ອີກວ່າ ມັນບໍ່ໄດ້ມີຄວາມພະຍາຍາມໃດໆ ທີ່ຈະຂັດຂວາງການສືບສວນທີ່ວ່ານີ້,”
ນັ້ນຄືຄຳເວົ້າຂອງທ່ານນາງ ທີ່ໄດ້ກ່າວຢູ່ໃນຖະແຫຼງການສະບັບນຶ່ງ.
ທ່ານທຣຳ ໄດ້ໃຊ້ Twitter ຕອບໂຕ້ ຕໍ່ລາຍງານຂ່າວຕ່າງໆ ໃນຕອນເຊົ້າວັນພະຫັດມື້ນີ້.
ທ່ານຂຽນວ່າ “ພວກເຂົາເຈົ້າໄດ້ເສກສັນປັ້ນແຕ່ງຂ່າວການສົມຮູ້ຮ່ວມຄິດກັບຣັດເຊຍ
ສູນເປີເຊັນມີຄວາມຈິງ ດັ່ງນັ້ນ ດຽວນີ້ຈຶ່ງເວົ້າເຖິງເລື່ອງການຂັດຂວາງຂະບວນການ
ຍຸຕິທຳຊຶ່ງຂ່າວທີ່ບໍ່ມີມູນຄວາມຈິງນັ້ນ.”
ໃນເດືອນພຶດສະພາຜ່ານມານີ້ ທ່ານ ທຣຳ ໄດ້ປົດຜູ້ອຳນວຍການ ອົງການ FBI
ທ່ານ James Comey ໂດຍກ່າວວ່າ “ເລື່ອງກ່ຽວກັບຣັດເຊຍ ນີ້” ແມ່ນຍັງຢູ່ໃນຄວາມຄິດ
ຂອງທ່ານ ຕອນທີ່ທ່ານໄດ້ຕັດສິນໃຈ ທີ່ຈະປົດຫົວໜ້າເຈົ້າໜ້າທີ່ປະຕິບັດກົດໝາຍຂອງ
ປະເທດ ໃນຂະນະທີ່ທ່ານ Comey ເປັນຫົວໜ້າການສືບສວນກ່ຽວກັບການແຊກແຊງ
ຂອງຣັດເຊຍ.
ປະມານສັບປະດານຶ່ງຕໍ່ມາ ທ່ານ Mueller ໄດ້ຖືກແຕ່ງຕັ້ງ ໃຫ້ເຂົ້າຮັບຕຳແໜ່ງເປັນ
ໄອຍະການພິເສດ ເພື່ອນຳພາໃນການສືບສວນຂອງທ່ານ.
