ບັນດາເຈົ້າໜ້າທີ່ໃນປະເທດ ເຮຕີ ໄດ້ຮຽກຮ້ອງໃຫ້ປະຊາຊົນສະຫງົບສະຕິອາລົມໃນ
ວັນອາທິດວານນີ້, ຫຼັງຈາກແຜ່ນດິນໄຫວຄວາມແຮງ 5.9 ໄດ້ສັ່ນສະເທືອນໃນປະເທດ
ທີ່ທຸກຍາກນັ້ນ.
ແຜ່ນດິນໄຫວໃນວັນເສົາທີ່ຜ່ານມາ ໄດ້ສັງຫານຢ່າງໜ້ອຍ 12 ຄົນ ແລະ ບາດເຈັບ
ຫຼາຍກວ່າ 180 ຄົນ. ສູນກາງຂອງແຜ່ນດິນໄຫວ ແມ່ນຢູ່ໃກ້ໆກັບເມືອງ ຜອດ ເດິ ແປ
(Port de Paix) ຢູ່ທາງພາກເໜືອ, ແຕ່ສາມາດຮູ້ສຶກໄດ້ທົ່ວປະເທດ.
ອົງການສຳຫຼວດທໍລະນີວິທະຍາ ສະຫະລັດ ໄດ້ລາຍງານໃນຕອນບ່າຍຂອງວັນອາທິດ
ວານນີ້ວ່າ ແຜ່ນດິນໄຫວນ້ອຍ ທີ່ເກີດຂຶ້ນຕາມມາພາຍຫຼັງ ຄວາມແຮງ 5.2 ໄດ້ສັ່ນສະ
ເທືອນໃນພາກພື້ນດຽວກັນ ຂອງເມືອງ ຜອດ ເດ ແປ, ໃນພາກເໜືອຂອງ ເຮຕີ.
ປະທານາທິບໍດີ ໂຈເວີແນລ ມົວເຊ ແລະ ນາຍົກລັດຖະມົນຕີ ຈອງ ອອງຣີ ຊ້ຽງ (Jean
Henry Ceant) ໄດ້ເດີນທາງໄປເມືອງທີ່ໄດ້ຮັບຜົນກະທົບຈາກໄພພິບັດນັ້ນ ໃນວັນ
ອາທິດວານນີ້ ເພື່ອປະສານງານການບັນເທົາທຸກ.
ທ່ານ ມົວເຊ ໄດ້ຂຽນຂໍ້ຄວາມໃນ ທວິດເຕີ ວ່າ “ຂ້າພະເຈົ້າຂໍຊົມເຊີຍປະຊາຊົນທັງຫຼາຍ
ໃນການສະແດງຄວາມສາມັກຄີກັນ ແລະ ຊ່ອຍເຫຼືອກັນຂອງເຂົາເຈົ້າ.”
ລາຍງານເວົ້າວ່າ, ໂຮງໝໍແຫ່ງນຶ່ງ, ສູນຊຸມຊົນ ແລະ ເຮືອນຫຼາຍຫຼັງແມ່ນໄດ້ຖືກທຳລາຍ.
ນາງ ມາຣີ ໂຄລດ ຊິລເວີແຣັງ ໄດ້ກ່າວຕໍ່ວີໂອເອ ເຄຣໂອລ ວ່າ “ຕອນນັ້ນຂ້າພະເຈົ້າກຳ
ລັງເບິ່ງໂທລະພາບຢູ່, ທ່ານປະທານາທິບໍດີກຳລັງເວົ້າຢູ່ ແລະ ໃນທັນທີທັນໃດຂ້າພະ
ເຈົ້າກໍຮູ້ສຶກວ່າ ຕັ່ງຂອງຂ້າພະເຈົ້າກຳລັງສັ່ນ. ຂ້າພະເຈົ້າຄິດວ່າ ໝາຂອງພວກເຮົາເປັນ
ຜູ້ສັ່ນມັນ, ແຕ່ຫຼັງຈາກນັ້ນ ລູກສາວຂອງຂ້າພະເຈົ້າກໍໄດ້ຖາມວ່າ, ແມ່, ເຈົ້າຮູ້ສຶກແຜ່ນ
ດິນໄຫວບໍ່? ແລະ ນັ້ນກໍແມ່ນເວລາທີ່ຂ້າພະເຈົ້າໄດ້ແລ່ນອອກໄປທາງນອກ ເພື່ອເບິ່ງ
ວ່າມັນກຳລັງເກີດຫຍັງຂຶ້ນ.”
ຜູ້ຊາຍອີກຄົນນຶ່ງໄດ້ກ່າວຕໍ່ວີໂອເອວ່າ ລາວກຳລັງເຮັດວຽກຢູ່ຄອມພິວເຕີຂອງລາວ ໃນ
ທັນໃດນັ້ນໂຕະກໍເລີ່ມສັ່ນ. ລາວໄດ້ເວົ້າວ່າ ທຳອິດລາວບໍ່ຮູ້ວ່າແມ່ນຫຍັງເຮັດໃຫ້ມັນສັ່ນ.
ຜູ້ຊາຍຄົນນັ້ນໄດ້ເວົ້າວ່າ “ຂ້າພະເຈົ້າແລ່ນອອກໄປທາງນອກ ແລະ ໄດ້ເຫັນຄົນພວກນີ້
ຢູ່ເຕັມຖະໜົນ ແລະ ຂ້າພະເຈົ້າກໍຮູ້ວ່າ ນັ້ນແມ່ນແຜ່ນດິນໄຫວ.”
