ປະທານາທິບໍດີສະຫະລັດ ທ່ານບາຣັກ ໂອບາມາ ໄດ້ສັ່ງໃຫ້ປະຊາຄົມສືບລັບທຳການທົບທວນ “ຢ່າງຄົບຖ້ວນ” ເບິ່ງກິດຈະກຳ ທີ່ພົວພັນ ກັບການເຈາະຂໍ້ມູນ ໂດຍແນໃສ່ ເພື່ອລົບກວນການເລືອກຕັ້ງປະທານາທິບໍດີສະຫະລັດໃນປີ 2016.
ຫລັງຈາກການປະກາດຂອງທ່ານ ໃນວັນສຸກວານນີ້ແລ້ວ ໜັງສືພິມ ທີ່ສຳຄັນ 2 ສະບັບຂອງສະຫະລັດ ຄື New York Times ແລະ Washington Post ກໍລາຍງານວ່າ ຣັດເຊຍໄດ້ແຊກແຊງເຂົ້າໃນການເລືອກຕັ້ງປະທານາທິບໍດີ ຂອງສະຫະລັດເມື່ອໄວໆມານີ້ເພື່ອຊ່ອຍໃຫ້ທ່ານ Donald Trump ເປັນຜູ້ຊະນະ.
ໜັງສືພິມ New York Times ລາຍງານວ່າ ຣັດເຊຍໄດ້ເຈາະຂໍ້ມູນຄອມພິວເຕີ້ ທັງຂອງຄະນະກຳມະການແຫ່ງຊາດພັກຣີພັບບລີກັນ ແລະຄະນະກຳມະການແຫ່ງຊາດຂອງພັກເດໂມແຄຣັດ ແຕ່ເປີດເຜີຍ ພຽງແຕ່ຂໍ້ມູນ ທີ່ສ້າງຄວາມເສຍຫາຍຈາກຄະນະກຳມະການແຫ່ງຊາດ ຂອງພັກເດໂມແຄຣັດ ເທົ່ານັ້ນ. ພັກເດໂມແຄຣັດ ໄດ້ປະເຊີນໜ້າກັບການຮົ່ວໄຫລຂອງອີແມລຄະນະກຳມະການພັກ ໃນຂະນະທີ່ວັນເວລາ ໃນການເລືອກຕັ້ງປະທາ ນາທິບໍດີຫຍັບໃກ້ເຂົ້າມາ. ໜັງສືພິມ New York Times ກ່າວວ່າ ອົງການສືບລັບຕ່າງໆ ໄດ້ສະຫລຸບວ່າ ຣັດເຊຍເປັນຜູ້ສົ່ງເອກກະສານ ຂອງພັກເດໂມແຄຣັດ ໃຫ້ແກ່ກຸ່ມ WikiLeaks.
ເຈົ້າໜ້າທີ່ອະວຸໂສທ່ານນຶ່ງທີ່ຂໍສະຫງວນຊື່ໃນລັດຖະບານທ່ານໂອບາມາໄດ້ກ່າວເຖິງຣັດເຊຍ ໂດຍບອກກັບໜັງສືພິມ New York Times ວ່າ “ພວກເຮົາ ໃນເວລານີ້ ມີຄວາມເຊື່ອໝັ້ນເປັນຢ່າງສູງວ່າ ພວກເຂົາໄດ້ເຈາະຂໍ້ມູນຂອງຄະນະກຳມະການແຫ່ງຊາດຂອງພັກເດໂມແຄຣັດ ແລະຄະນະກຳມະການແຫ່ງຊາດຂອງພັກຣີພັບບລີກັນແລະເປັນທີ່ຈະແຈ້ງບໍ່ໄດ້ເປີດເຜີຍເອກກະສານຈາກຄະນະກຳມະການແຫ່ງຊາດຂອງພັກຣີພັບບລີກັນ.”
ໜັງສືພິມ New York Times ລາຍງານວ່າ ສ່ວນບຸກຄົນຊາວຣັດເຊຍທີ່ເຈົ້າໜ້າທີ່ສືບລັບສະຫະລັດກ່າວວ່າ ເປັນຜູ້ຮັບຜິດຊອບ ຕໍ່ການເຈາະຂໍ້ມູນນັ້ນໄດ້ຖືກລະບຸໂຕແລ້ວ ແຕ່ປາ ກົດວ່າບໍ່ມີຜູ້ໃດໄດ້ຖືກລົງໂທດ.
ສ່ວນໜັງສືພິມ Washington Post ລາຍງານວ່າ ອົງການສືບລັບຊີໄອເອເຊື່ອວ່າຣັດເຊຍໄດ້ແຊກແຊງ ເຂົ້າໃນການເລືອກຕັ້ງ ຂອງສະຫະລັດ ເພື່ອຊ່ອຍໃຫ້ ທ່ານ Trump ເປັນຜູ້ຊະນະ. ໃນລາຍງານຂ່າວທີ່ພິມເຜີຍແຜ່ທາງເວັບໄຊຂອງ ໜັງສືພິມດັ່ງກ່າວໃນຕອນແລງວັນສຸກວານນີ້ Washington Post ໄດ້ອ້າງຄຳເວົ້າຂອງເຈົ້າໜ້າທີ່ໆຂໍສະຫງວນຊື່ທີ່ກ່າວ ວ່າ ເປົ້າໝາຍໃນການແຊກແຊງຂອງ ຣັດເຊຍ ແມ່ນເພື່ອຢາກໃຫ້ຜູ້ສະໝັກຄົນນຶ່ງເອົາຊະ ນະຜູ້ສະໝັກອີກຄົນນຶ່ງເພື່ອ ຊ່ອຍໃຫ້ທ່ານ Trump ຖືກຮັບເລືອກ.
