ສື່ມວນຊົນລາຍງານວ່າ ຊາຍປິດບັງໜ້າຂອງກຸ່ມຫົວຮຸນແຮງ
ລັດອິສລາມ ທີ່ໄດ້ປາກົດໂຕ ຢູ່ໃນວີດີໂອຂອງການສັງຫານ
ຕັດຄໍໂຕປະກັນ ຫຼາຍຄັ້ງແລ້ວນັ້ນ ແມ່ນໄດ້ຖືກລະບຸໂຕໃນ
ຂັ້ນຕົ້ນ ແຕ່ແຫລ່ງຂ່າວໃນ ດ້ານຄວາມໝັ້ນຄົງ ໄດ້ເຕືອນວ່າ
ລາຍງານນັ້ນອາດຈະບໍ່ຖືກຕ້ອງ.
ລາຍງານຂ່າວຕ່າງໆ ໄດ້ອ້າງເຖິງຄຳເວົ້າຂອງພວກໝູ່ເພື່ອນ
ຂອງທ້າວ Mohammed Emwazi ທີ່ກ່າວວ່າ ພວກເຂົາເຈົ້າ
ເຊື່ອກັນວ່າ ລາວເປັນຄົນຮູບຮ່າງສູງ ທີ່ເວົ້າສຳນຽງຂອງ
London ທີ່ຖືກຕັ້ງຊື່ວ່າ “Jihadi John” ນັ້ນ.
ທ່ານ Cameron ບໍ່ຍອມ ລະບຸໂຕ 'Jihadi John'
ແຫລ່ງຂ່າວສອງແຫ່ງຂອງສະຫະລັດ ບອກນັກຂ່າວສືບສວນຂອງ ອົງ ການຂ່າວ Reuters ວ່າພວກຕົນເຊື່ອວ່າ ທ້າວ Emwazi ແມ່ນຊາຍປິດບັງໜ້າໃນວີດີໂອ.
ແຕ່ ນັກຂ່າວຂອງວີໂອເອ ທ່ານ Jamie Dettmer ຢູ່ທີ່ນະຄອນ Rome ກ່າວວ່າ ແຫລ່ງ
ຂ່າວໜ່ວຍສືບລັບຂອງຢູໂຣບຕ່າງໆ ໄດ້ປະຕິເສດ ທີ່ຈະໃຫ້ການຢືນຢັນ ກ່ຽວກັບການ
ລະບຸໂຕດັ່ງກ່າວນັ້ນ ໂດຍກ່າວວ່າ “ເລື້ອງນີ້ມັນສັບສົນຫຼາຍກວ່ານັ້ນ.”
ໂຄສົກຍິງ ຂອງສະພາຄວາມໝັ້ນຄົງແຫ່ງຊາດສະຫະລັດ ກ່າວວ່າ ການຄາດຕະກຳຂອງ
ພົນລະເມືອງສະຫະລັດ ໂດຍພວກລັດອິສລາມ ແມ່ນຈະຕ້ອງໄດ້ສືບສວນສອບສວນຕໍ່ໄປ ແຕ່ຈະບໍ່ໃຫ້ການຢືນຢັນ ຫຼື ປະຕິເສດຕໍ່ລາຍງານຕ່າງໆເຫຼົ່ານັ້ນກ່ຽວກັບການລະບຸໂຕຂອງ Jihadi John. ທ່ານນາງ ກ່າວອີກວ່າ ບັນດາເຈົ້າໜ້າທີ່ສະຫະລັດ ກຳລັງທຳງານຢ່າງໃກ້ຊິດ ກັບພາຄີນາໆຊາດ ລວມທັງອັງກິດ ເພື່ອນຳເອົາພວກຄາດຕະກອນ ມາລົງໂທດຕາມກົດໝາຍ.
