ລິ້ງ ສຳຫລັບເຂົ້າຫາ

ວັນພະຫັດ, ໒໘ ມີນາ ໒໐໒໔

ມີລາຍງານວ່າ Rwanda ທໍລະ​ມານ​​ ທຸບ​ຕີ ​ເອົາ​ໄຟຟ້າ​ຈີ້ ​ແລະ​​ປະຫານຊີວິດ ພວກ​ທີ່​ຖືກ ​ຄຸມ​ຂັງ ​ເພື່ອ​ຄົ້ນ​ຫາ​ຂໍ້​ມູນ​ຫຼັກ​ຖານ


ພວກກະບົດຊາວຄອງໂກ M23 ຈັບກຸມທະຫານຂອງພວກ
ກະບົດ FDLR (Force Democratique de Liberation du Rwanda) ຜູ້ທີ່ກັບຄືນໄປຍັງ Rwanda ໃກ້ໆກັບ Kibumba, Goma ເໜືອ, 27 ພະຈິກ, 2012.
ພວກກະບົດຊາວຄອງໂກ M23 ຈັບກຸມທະຫານຂອງພວກ ກະບົດ FDLR (Force Democratique de Liberation du Rwanda) ຜູ້ທີ່ກັບຄືນໄປຍັງ Rwanda ໃກ້ໆກັບ Kibumba, Goma ເໜືອ, 27 ພະຈິກ, 2012.

ອົງການມະນຸດສະທຳ ຫຼື Human Right Watch ກ່າວ​ວ່າ ພວກ​ທະຫານ Rwanda
ໄດ້​ທໍລະ​ມານພວກ​ທີ່​ຖືກ​ຄຸມ​ຂັງ ຢ່າງ​ຕໍ່​ເນື່ອງ​ ອັນ​ຮວມມີ ການ​ທຸບ​ຕີ ​ເອົາ​ໄຟຟ້າ​ຈີ້ ​ແລະ​
ທຳ​ການ​ປະຫານຊີວິດ ​ເພື່ອ​ຄົ້ນ​ຫາ​ຂໍ້​ມູນ​ຫຼັກ​ຖານ.

ອົງການ​ດັ່ງກ່າວ ​ທີ່​ມີ​ສຳນັກງານ​ຢູ່ນະຄອນ New York ​ໄດ້​ອອກ​ລາຍ​ງານ​ສະບັບ​ນຶ່ງ ​
ທີ່​ມີ 91 ໜ້າ​ ໃນ​ວັນ​ອັງ​ຄານ​ມື້​ນີ້ ທີ່​ເປີດ​ເຜີຍ ຈຳນວນ 104 ລາຍ ຂອງ​ພວກ​ຜູ້​ຄົນ ທີ່​ຖືກ
​ຈັບ​ກຸມ​ຄຸມ​ຂັງ ຢ່າງ​ຜິດ​ກົດໝາຍ ​ໃນຄຸກ​ທະຫານ​ຂອງ Rwanda ລະຫວ່າງ​ປີ 2010
ຫາ 2016. ພວກ​ທີ່​ຖືກ​ຄຸມ​ຂັງ ຫຼາຍ​ຄົນ ​ແມ່ນ​ມີ​ຄະດີ ທີ່ສົງ​ໄສ​ວ່າ ​ເປັນ​ສະມາຊິກຫຼື​ບໍ່​
ກໍ​ປະ​ກອບ ສ່ວນ​ກັບ​ກອງ​ກຳລັງ​ປະຊາທິປະ​ໄຕ​ເພື່ອ​ປົດ​ປ່ອຍ Rwanda ຊຶ່ງ​ສ່ວນ​ໃຫຍ່
​ແມ່ນກອງ​ກຳລັງ​ຊົນ​ກຸ່ມ Hutu Rwanda ທີ່​ຕັ້ງ​ຢູ່ ​ໃນ​ສາທາລະນະ​ລັດ ຄອງ​ໂກ. ສະມາ
ຊິກ​ບາງ​ຄົນໃນ​ກຸ່ມດັ່ງກ່າວ ຖືກ​ສົງ​ໄສ​ວ່າ ອາດ​ຈະ​ພົວພັນ​ໃນ​ການ​ຂ້າ​ລ້າງ​ເຜົ່າ​ພັນ.

ພວກ​ເຄາະ​ຮ້າຍ​ດັ່ງກ່າວຫຼາຍຄົນ ​ໄດ້​ບອກ​ກັບຄະນະ​ສືບສວນ​ຂອງ​ອົງການ Human
Right Watch ວ່າ ພວກ​ເຂົາ​ເຈົ້າ​ໄດ້​ເຊັນຊື່ລົງ​ໃນ​ການ​ຮັບສາລະພາບທີ່ຜິດໆ ເພາະວ່າ
ພວກ​ເຂົາ​ບໍ່​ສາມາດທົນຕໍ່ການ​ທໍລະ​ມານ​ໄດ້​ອີກ​ຕໍ່​ໄປ​ ​ແລະ​ເຊື່ອ​ວ່າ​ພວກ​ເຂົາ​ເຈົ້າ​ແມ່ນ​
ໃກ້ຈະ​ຕາຍ​ຢູ່ແລ້ວ. ລາຍ​ງານດັ່ງກ່າວ​ຍັງໄດ້​ເວົ້າ​ອີກ​ວ່າ ​ການ​ທໍ​ລະ​ມານ ທາລຸນ​ຢ່າງ​
ເປັນ​ລະບົບ​ນັ້ນ​ ແມ່ນ​ຖືກ​ເມີນ​ເສີຍ​ຈາກພວກໄອ​ຍະ​ການ ​ແລະ​ຜູ້​ພິ​ພາກ​ສາ​ສານ
ທັງຫຼາຍເວລາພວກ​ເຄາະ​ຮ້າຍ​ນີ້ຮ້ອງທຸກ​ໄປ​.

ກຸ່ມ​ດັ່ງກ່າວ​ເວົ້າ​ວ່າ ຈຳ​ນວນ​ພວກ​ເຄາະ​ຮ້າຍ ​ແມ່ນຈະ​ມີ​ສູງ​ກວ່າ ຈຳນວນ​ທີ່​ພວກ​ເຂົາ ​
ໄດ້​ຮັບ​ການ​ຢືນຢັນຕັ້ງຫຼາຍເທົ່າ.

ອ່ານ​ຂ່າວ​ນີ້​ເພີ່ມຕື່ມ​ເປັນ​ພາສາ​ອັງກິດ

XS
SM
MD
LG