ກະຊວງການຕ່າງປະເທດສະຫະລັດ ກ່າວວ່າ ຕົນກຳລັງຊອກຫາ
ຂໍ້ມູນຢ່າງລະອຽດຈາກລັດ ຖະບານ Saudi Arabia ກ່ຽວກັບ
ລາຍງານ ທີ່ວ່າ ຊາວອາເມຣິກັນ 9 ຄົນ ໄດ້ຖືກກັກຂັງຢູ່ປະເທດ
ດັ່ງກ່າວ ໃນຖານສົງໄສວ່າເປັນພວກກໍ່ການຮ້າຍ.
ໂຄສົກຂອງກະຊວງການຕ່າງປະເທດ ທ່ານ John Kirby ໄດ້ກ່າວໃນວັນຈັນວານນີ້ວ່າ ເຈົ້າໜ້າທີ່ສະຫະລັດ ໄດ້ເຫັນລາຍງານຂອງສື່ມວນຊົນ Saudi ກ່ຽວກັບການກັກຂັງ ແລະວ່າພວກນັກການທູດກຳລັງພົວພັນກັບເຈົ້າໜ້າທີ່ໃນນະຄອນ Riyadh ແລ້ວ. ທ່ານຍັງໄດ້ກ່າວຕື່ມອີກວ່າ ທ່ານບໍ່ໄດ້ຮູ້ດ້ວຍຊ້ຳ “ເຖິງການຂໍ້ຫາອັນໃດແທ້ຂອງການຖືກກັກຂັງ ໂດຍຊ່ອງທາງຂອງທາງການ.” ທ່ານໄດ້ບອກກັບພວກນັກຂ່າວວ່າ ທ່ານບໍ່ສາມາດຢືນຢັນເຖິງ “ຄວາມຈິງ” ຂອງລາຍງານພວກນີ້ໄດ້.
ໜັງສືພິມ Saudi ໄດ້ລະບຸ ໃນວັນອາທິດຜ່ານມານີ້ວ່າ ຄົນສັນຊາດອາເມຣິກັນ 9 ຄົນແລະບຸກຄົນອື່ນໆອີກ 24 ຄົນ ໄດ້ຖືກກັກຂັງ ໃນຖານສົງໄສວ່າເປັນພວກກໍ່ການຮ້າຍ ໃນຮອບອາທິດທີ່ຜ່ານມາ. ໜັງສືພິມ Saudi Gazette ໄດ້ກ່າວວ່າ ພວກທີ່ຖືກກັກຂັງຮວມມີຊາວ Saudi 14 ຄົນ ຊາວເຢເມນ 3 ຄົນ ຊາວຊິເຣຍ 2 ຄົນ ຊາວອິນໂດເນເຊຍ 1 ຄົນ
ອີກ 1 ຄົນ ຈາກຟິລິບປີນ ແລະອື່ນໆອີກ 3 ຄົນ.
Website ຂອງກະຊວງການຕ່າງປະເທດຂອງ Saudi ໄດ້ພິມເຜີຍແຜ່ໃນວັນຈັນວານນີ້ ລາຍຊື່ຂອງພວກທີ່ສົງໄສວ່າເປັນພວກກໍ່ການຮ້າຍ ທີ່ຖືກກັກຂັງນັ້ນ ແມ່ນມີ 5,158 ຄົນ ຊຶ່ງຮວມທັງຊາວອາເມຣິກັນ 8 ຄົນ. ຂໍ້ມູນທີ່ວ່ານີ້ ບໍ່ໄດ້ໃຫ້ລາຍລະອຽດຂອງສື່ສຽງຂອງພວກ
ເຂົາເຈົ້າ ແມ້ນແຕ່ເພດ ແລະຍັງໄດ້ລະບຸອີກວ່າ ມີ 4 ຄົນ ທີ່ໄດ້ຖືກກັກຂັງໃນວັນ ທີ 25ມັງກອນທີ່ຜ່ານມານີ້. Website ຍັງໄດ້ກ່າວອີກວ່າ ຊາວອາເມຣິກັນ ອີກ 4 ຄົນ ແມ່ນໄດ້
ຖືກກັກຂັງ ໃນເດືອນພະຈິກ ແລະເດືອນທັນວາ ປີກາຍນີ້ ແລະທັງໝົດ 8 ຄົນ ທີ່ກ່າວມານີ້
ແມ່ນກຳລັງຢູ່ໃນລະຫວ່າງ “ການສືບສວນ ສອບສວນ.” ຊາວອາເມຣິກັນ 9 ຄົນ ແມ່ນໄດ້ຖືກ
ຈັບກຸມໃນຂໍ້ຫາຢ່າງອື່ນ ທີ່ບໍ່ຊັດເຈນໃນປີ 2007, Website ຍັງໄດ້ບອກອີກວ່າ ພວກທີ່ຖືກ
ກັກຂັງນີ້ ສາມາດ “ຂໍຍື່ນອຸທອນໄດ້.”
ຂ່າວ Saudi ໃນວັນອາທິດຜ່ານມາ ບໍ່ໄດ້ແຈ້ງໃຫ້ຊາບວ່າ ຊາວອາເມຣິກັນທີ່ສົງໄສວ່າເປັນພວກກໍ່ການຮ້າຍ ບໍ່ໄດ້ມີສ່ວນພົວພັນແຕ່ຢ່າງໃດ ກັບພວກຫົວຮຸນແຮງກຸ່ມລັດອິສລາມ ຊຶ່ງອອກມາອ້າງເອົາຄວາມຮັບຜິດຊອບ ໃນການໂຈມຕີຮ້າຍແຮງ ຕໍ່ກອງກຳລັງຂອງ Saudi ແລະຊົນກຸ່ມນ້ອຍຊາວ Shi’ites ໃນຮອບສອງສາມເດືອນທີ່ຜ່ານມານີ້.
