ພວກເຈົ້າໜ້າທີ່ສະຫະລັດ ໄດ້ຈັບກຸມຊາຍຄົນນຶ່ງ ໃນລັດຢູທາ ທີ່ກ່ຽວພັນກັບຈົດ
ໝາຍທີ່ມີການສົງໄສ ທີ່ໄດ້ສົ່ງຫາປະທານາທິບໍດີ ແລະທຳນຽບຫ້າແຈ.
ທ້າວ ວິລລຽມ ຄລາຍດ໌ ແອລເລນ ຈາກລັດຢູທາ ຖືກຈັບໃນວັນພຸດວານນີ້ ໃນຂໍ້
ກ່າວຫາວ່າໄດ້ສົ່ງຈົດໝາຍທີ່ມີແກ່ນໝາກຫຸ່ງສາ ທີ່ສາມາດເອົາໄປສະກັດເອົາສານ
ໄຣຊິນ ທີ່ເປັນພິດສູງຫລາຍ.
ຈົດໝາຍສະບັບນຶ່ງໃນນັ້ນ ແມ່ນສົ່ງໄປຫາປະທານາທິບໍດີ ດໍໂນລ ທຣຳ.
“ຊອງຈົດໝາຍນັ້ນບໍ່ໄດ້ໄປຮອດທຳນຽບຂາວ ແລະມັນກໍບໍ່ໄດ້ເຂົ້າໄປໃນທຳນຽບ
ຂາວເລີຍ,” ອີງຕາມຄຳເວົ້າຂອງໜ່ວຍງານຮັກສາຄວາມສະຫງົບຂອງທຳນຽບ
ຂາວໃນວັນອັງຄານຜ່ານມາ.
ຈົດໝາຍສອງສະບັບ ໄດ້ສົ່ງໄປຫາທຳນຽບຫ້າແຈ ໂດຍທີ່ສະບັບນຶ່ງ ແມ່ນສົ່ງເຖິງ
ທ່ານຈີມ ແມັດຕິສ, ລັດຖະມົນຕີກະຊວງປ້ອງກັນປະເທດ ແລະອີກສະບັບນຶ່ງ ແມ່ນ
ສົ່ງເຖິງນາຍພົນທະຫານເຮືອ ຈອນ ຣີເຈີດສັນ, ຫົວໜ້າດ້ານການປະຕິບັດງານຂອງ
ກອງທັບເຮືອ.
ຈົດໝາຍເຫລົ່ານັ້ນ ໄດ້ໄປເຖິງສູນກາງແຈກຢາຍຈົດໝາຍຂອງກະຊວງປ້ອງກັນປະເທດ
ຢູ່ໃກ້ທຳນຽບຫ້າແຈ. ອົງການປ້ອງກັນກຳລັງທະຫານຂອງທຳນຽບຫ້າແຈ ກວດພົບສານ
ດັ່ງກ່າວ ໃນຂະນະທີ່ທຳການກວດເບິ່ງສິ່ງທີ່ສົ່ງທາງໄປສະນີ ສະນັ້ນ ຈົດໝາຍເຫລົ່ານັ້ນ
ບໍ່ໄດ້ເຂົ້າໄປໃນອາຄານ ຂອງທຳນຽບຫ້າແຈເລີຍ, ອີງຕາມຄຳເວົ້າຂອງບັນດາເຈົ້າໜ້າທີ່.
ສານໄຣຊິນ ແມ່ນສານພິດທີ່ເກີດຂຶ້ນແບບທຳມະຊາດທີ່ພົບເຫັນໃນແກ່ນໝາກຫຸ່ງສາ.
ຖ້າຫາກຄົນສູດດົມເຂົ້າໄປ, ກິນນ້ຳມັນທີ່ກັ່ນເຂົ້າໄປ ຫລືສັກເຂົ້າໄປ, ທາດຣໄຣຊິນ ສາ
ມາດທີ່ຈະສັງຫານຊີວິດຄົນໄດ້ພາຍໃນ 48 ຊົ່ວໂມງ ຫລັງຈາກໄດ້ສຳພັດກັບທາດດັ່ງ
ກ່າວ. ອີງຕາມສູນກາງຄວບຄຸມ ແລະປ້ອງກັນພະຍາດສະຫະລັດ, ແມ່ນບໍ່ມີຢາຖອນພິດ
ສຳລັບສານໄຣຊິນເລີຍ.