ລາຍງານໃໝ່ສະບັບນຶ່ງກ່າວອ້າງວ່າ ຄະນະຜູ້ແທນຂອງປະທານ
ປະເທດຈີນ ທ່ານ Xi Jinping ໄດ້ຊື້ເອົາງາຊ້າງແບບຜິດກົດ
ໝາຍຫຼາຍພັນກິໂລ ໃນຂະນະທີ່ ທຳການຢ້ຽມຢາມ ປະເທດ
Tanzania ໃນປີ 2013.
ການກ່າວຫາດັ່ງກ່າວ ໄດ້ມີຂຶ້ນໃນວັນພະຫັດມື້ນີ້ ໃນລາຍງານ
ຂອງອົງການການສືບສວນ ດ້ານສະພາບແວດລ້ອມ ຫຼື EIA
ທີ່ໄດ້ເວົ້າວ່າ ຄວາມຮຽກຮ້ອງຕ້ອງການງາຊ້າງຂອງຈີນ ໄດ້ສ້າງ
ຄວາມເສຍຫາຍຮ້າຍແຮງຕໍ່ຈຳນວນຂອງຊ້າງ ຢູ່ໃນປະເທດ
Tanzania.
ອົງການ EIA ກ່າວວ່າ ຄະນະຜູ້ແທນຂອງຈີນ ໃຊ້ການຢ້ຽມຢາມໃນເດືອນມີນາປີ 2013 ຄັ້ງນີ້ ເພື່ອນຳເອົາງາຊ້າງອອກຈາກປະເທດດັ່ງກ່າວ ໃນຖົງການທູດ ຂຶ້ນເຮືອບິນຂອງປະທານປະເທດຈີນ.
ລາຍງານຂອງອົງການທີ່ບໍ່ຂຶ້ນກັບລັດຖະບານດັ່ງກ່າວທີ່ມີສຳນັກງານຢູ່ອັງກິດ ຍັງໄດ້ອ້າງ ຄຳເວົ້າຂອງພວກລັກລອບເອົາງາຊ້າງ ໃນນະຄອນ Dar es Salaam ທີ່ກ່າວວ່າ ການຊື້ທີ່ວ່ານີ້ ເຮັດໃຫ້ລາຄາຂອງງາຊ້າງ ຖີບຕົວສູງຂຶ້ນເປັນສອງເທົ່າ.
ລາຍງານກ່າວຕື່ມວ່າ ບັນດານັກການທູດແລະເຈົ້າໜ້າທີ່ທະຫານຈີນ ຮວມທັງພວກນັກທຸ ລະກິດ ຜ່ານມາໄດ້ໃຊ້ການຢ້ຽມຢາມຂອງຕົນ ຊື້ງາຊ້າງເປັນຈຳນວນຫຼວງຫຼາຍ.
ຈີນ ຍັງບໍ່ທັນໃຫ້ຄວາມເຫັນໃດໆກ່ຽວກັບການກ່າວຫານີ້ ແຕ່ໃນອະດີດນັ້ນ ຈີນເຄີຍກ່າວມາແລ້ວວ່າ ຕົນຈະກະທຳສຸດຄວາມສາມາດເພື່ອປ້ອງກັນການລັກລອບຂ້າສັດປ່າທີ່ຜິດກົດໝາຍ.
ຈີນເປັນຕະຫຼາດໃຫຍ່ສຸດຂອງໂລກໃນການຊື້ຂາຍງາຊ້າງທີ່ມີການລັກລອບ. ງາຊ້າງນີ້ຖືວ່າເປັນສັນຍາລັກຂອງຄວາມມັ່ງຄັ່ງ ຮັ່ງມີສີສຸກ ແລະນຳໃຊ້ໃນການຕົກແຕ່ງປະດັບປະດາ ແລະໃຊ້ປະສົມຢາແຜນໂບຮານຂອງຈີນນຳ.
