ກອງທະຫານ ແລະ ກຸ່ມຂອງນັກຊ່ຽວຊານຈາກເກົາຫຼີເໜືອ ແລະ ໃຕ້ ໄດ້ເລີ່ມເກັບກູ້
ລະເບີດຝັງດິນ ຢູ່ຕາມເຂດຊາຍແດນທີ່ມີການປ້ອງກັນຢ່າງໜາແໜ້ນຂອງເຂົາເຈົ້າໃນ
ວັນຈັນມື້ນີ້ ພາຍໃຕ້ຂໍ້ຕົກລົງຫຼຸດຜ່ອນຄວາມເຄັ່ງຕຶງ ທີ່ສອງປະເທດໄດ້ຕົກລົງກັນ ໃນ
ເດືອນທີ່ຜ່ານມາ, ອີງຕາມການກ່າວໃນຖະແຫຼງການສະບັບນຶ່ງຂອງກະຊວງປ້ອງກັນ
ປະເທດເກົາຫຼີໃຕ້.
ບໍ່ໄດ້ມີການຢືນຢັນ ໃນທັນທີຈາກ ເກົາຫຼີເໜືອ ວ່າ ກອງທະຫານຂອງເຂົາເຈົ້າໄດ້ເລີ່ມ
ທີ່ຈະປະຕິບັດໂຄງການທີ່ຖືກຮັບຮອງເອົາ ໃນນະຄອນຫຼວງ ພຽງຢາງ, ເກົາຫຼີເໜືອ,
ໂດຍປະທານາທິບໍດີ ເກົາຫຼີໃຕ້ ທ່ານ ມູນ ແຈ ອິນ ກັບ ປະທານປະເທດ ເກົາຫຼີເໜືອ
ທ່ານ ກິມ ຈົງ ອຶນ.
ອີງຕາມຖະແຫຼງການຂອງ ເກົາຫຼີໃຕ້ ນັ້ນ, ທັງສອງຝ່າຍ ໄດ້ຕົກລົງທີ່ຈະເກັບກູ້ລະເບີດ
ຝັງດິນທຸກໜ່ວຍໃນເຂດທີ່ເອີ້ນວ່າ ເຂດຮັກສາຄວາມປອດໄພຮ່ວມ ຫຼື JSA ພາຍໃນ
20 ວັນຂ້າງໜ້າ. ວຽກງານຍັງຈະດຳເນີນຂຶ້ນ ໃນພາກສ່ວນຂອງເມືອງ ຈີອໍວອນ
(Cheorwon) ໃນແຂວງ ກັງວອນ (Gangwon), ຈຸດທີ່ມີການຕໍ່ສູ້ກັນຢ່າງໜັກໃນລະ
ຫວ່າງ ສົງຄາມ ເກົາຫຼີ ຊື່ວ່າ ພູຫົວທະນູ ຫຼື Arrow Head Hill.”
ໃນປີ 2019 ກອງກຳລັງຈາກ ເກົາຫຼີເໜືອ ແລະ ເກົາຫຼີໃຕ້ ຈະຄົ້ນຫາສົບຂອງທະຫານ
ຫຼາຍຮ້ອຍຄົນທີ່ຄິດວ່າຍັງຖືກຝັງຢູ່ໃນເມືອງ ຈີອໍວອນ.
ຂໍ້ຕົກລົງເດືອນກັນຍາ ຍັງປະກອບມີ ການປົດປ້ອມຍາມ ແລະ ອາວຸດຕ່າງໆຈາກເຂດ
JSA ຫຼັງການເກັບກູ້ລະເບີດແລ້ວ. ກອງທະຫານທີ່ຍັງເຫຼືອຢູ່ທີ່ນັ້ນ ແມ່ນຈະບໍ່ໃຫ້ປະ
ກອບພາອາວຸດ.
ເຂດ JSA ແມ່ນເປັນພຽງເຂດດຽວ ທີ່ຕັ້ງຢູ່ຕາມເຂດປອດທະຫານ ຍາວ 250 ກິໂລແມັດ
ທີ່ກອງທະຫານຈາກສອງປະເທດ ເກົາຫຼີ ໄດ້ປະເຊີນໜ້າຕໍ່ໜ້າກັນ. ກອງບັນຊາການອົງ
ການສະຫະປະຊາຊາດ ທີ່ເປັນຜູ້ຄວບຄຸມເຂດປອດທະຫານນັ້ນ ກໍມີກອງກຳລັງປະຈຳ
ການຢູ່ທີ່ນັ້ນເຊັ່ນກັນ.
