ຈີນ ໄດ້ສະແດງທ່າທີທີ່ແຂງກະດ້າງຂອງຕົນໃນການໂຕ້ຖຽງກັນຕໍ່ບັນຫາດ້ານຄວາມໝັ້ນຄົງໃນພາກພື້ນອິນໂດປາຊີຟິກ ຢູ່ທີ່ກອງປະຊຸມ Shangri-La ໃນປະເທດສິງກະໂປລະຫວ່າງທ້າຍອາທິດຜ່ານມາ, ຂະນະທີ່ລັດຖະມົນຕີກະຊວງປ້ອງກັນປະເທດຈີນ ທ່ານດົງ ຈູນ (Dong Jun) ໄດ້ປະນາມຕໍ່ກອງກຳລັງພາຍນອກຈຳນວນນຶ່ງ ທີ່ໃຫ້ການສະໜັບສະໜູນດ້ານການທະຫານແກ່ ໄຕ້ຫວັນ ໃນຂະນະທີ່ທ່ານກ່າວຫາ ຟີລິບປິນ ວ່າກໍາລັງເປັນອັນຕະລາຍຕໍ່ສະຖຽນລະພາບໃນບໍລິເວນຂົງເຂດທະເລຈີນໃຕ້.
ໃນຂະນະດຽວກັນ, ທ່ານ ດົງ ກໍກ່າວວ່າ ປັກກິ່ງ ໄດ້ນໍາໃຊ້ຂໍ້ຈໍາກັດເພື່ອຕອບ ໂຕ້ຕໍ່ສິ່ງທີ່ພວກເຂົາອະທິບາຍວ່າເປັນ “ການລະເມີດສິດທິ ແລະການເກາະຜິດ” ທີ່ດໍາເນີນການໂດຍປະເທດໃດນຶ່ງ, ເຊິ່ງບໍ່ໄດ້ກ່າວຊື່ອອກມາໂດຍກົງເຖິງ ຟີລິບປິນ, ບັນດາຄະນະຜູ້ແທນຈາກບາງປະເທດກ່າວວ່າ ຄຳປາໄສຂອງ ທ່ານ ດົງ ເປັນ “ການຂົ່ມຂູ່ແບບບໍ່ເປີດແປນ.”
ທ່ານນາງ ເຈັນນິເຟີ ພາກເກີ້ (Jennifer Parker), ຜູ້ຊ່ຽວຊານດ້ານການປ້ອງ ກັນປະເທດຢູ່ທີ່ມະຫາວິທະຍາໄລແຫ່ງຊາດອອສເຕຣເລຍ ແລະເປັນຜູ້ແທນຢູ່ທີ່ ກອງປະຊຸມສົນທະນາ Shangri-La ກ່າວວ່າ “ໃນຄໍາປາໄສຂອງ ທ່ານ ດົງ, ມັນເປັນການຂົ່ມຂູ່ຢ່າງຫຼວງຫຼາຍຕໍ່ພາກພື້ນອິນໂດ-ປາຊີຟິກ, ລວມທັງການ ເຕືອນທີ່ ‘ພວກແບ່ງແຍກດິນແດນ ໄຕ້ຫວັນ’ ຈະຖືກຕອກໃສ່ເສົາແຫ່ງຄວາມ ອັບອາຍຢູ່ໃນປະຫວັດສາດ ແລະ ບັນດາປະເທດເຫຼົ່ານັ້ນທີ່ກໍາລັງແຊກແຊງ ຄວາມພະຍາຍາມເພື່ອເຕົ້າໂຮມເຂົ້າເປັນເອກະພາບກັນກັບໄຕ້ຫວັນຂອງ ປັກກິ່ງ ຈະຕ້ອງປະເຊີນກັບການທຳລາຍດ້ວຍຕົນເອງ.”
ນອກຈາກການຂົ່ມຂູ່ກ່ຽວກັບໄຕ້ຫວັນແລ້ວ, ທ່ານນາງ ພາກເກີ້ ກ່າວຕື່ມອີກວ່າ ຄຳປາໄສຂອງ ທ່ານ ດົງ ຍັງໄດ້ສະທ້ອນໃຫ້ເຫັນເຖິງການບໍ່ເອົາໃຈໃສ່ຫົວຊາຂອງປັກກິ່ງ ຕໍ່ອົງການຂອງ ຟີລິບປິນ ກ່ຽວກັບຂໍ້ພິພາດກັນຂອງທັງສອງປະເທດຢູ່ບໍລິເວນຂົງເຂດທະເລຈີນໃຕ້, ເຊິ່ງ ທ່ານນາງ ກ່າວຕໍ່ VOA ຜ່ານທາງ ໂທລະສັບວ່າ “ໃນຄໍາຖະແຫຼງການຂອງ ທ່ານ ດົງ ນັ້ນ, ເປັນການສະແດງ ອອກໃຫ້ເຫັນໃນລະດັບທີ່ແຈ່ມແຈ້ງວ່າ ບໍ່ເຄົາລົບຕໍ່ ຟີລິບປິນ.”
ໃນລະຫວ່າງການກ່າວຄຳປາໄສເປັນເວລາ 40 ນາທີ, ທ່ານ ດົງ ໄດ້ກ່າວຫາບາງກອງກຳລັງພາຍນອກ, ເຊິ່ງເປັນການກ່າວຫາໂດຍທາງອ້ອມກ່ຽວກັບ ສະຫະລັດ ທີ່ກໍາລັງທຳລາຍແກນກາງຂອງສະມາຄົມປະຊາຊາດເອເຊຍຕາເວັນອອກສຽງໃຕ້ ຫຼື ASEAN, ແລະກໍາລັງນຳເອົາ “ປັດໄຈທີ່ບໍ່ໝັ້ນຄົງຕ່າງໆ ມາສູ່ສັນຕິພາບ ແລະ ການພັດທະນາຂອງພາກພື້ນແຫ່ງນີ້.”
ຟໍຣັມສະແດງຄວາມຄິດເຫັນ