ໃນວັນສຸກມື້ນີ້, ຍັງຄົງມີຄວາມພະຍາຍາມຕໍ່ໄປ ເພື່ອກູ້ເອົາເຮືອບິນສອງລຳທີ່ຕໍາກັນຢູ່ເທິງອາກາດ ນອກນະຄອນຫຼວງວໍຊິງຕັນ ໃນຕອນແລງຂອງວັນພຸດແລ້ວນີ້, ສົ່ງຜົນເຮັດໃຫ້ມີຜູ້ເສຍຊີວິດ 67 ຄົນ.
ບັນດາເຈົ້າໜ້າທີ່ສືບສວນຈາກຫຼາຍສໍານັກງານຂອງ ສະຫະລັດ ຄົ້ນພົບກ່ອງດຳຈາກເຮືອບິນໂດຍສານຂອງສາຍການບິນອາເມຣິກັນແອລາຍ ທີ່ແຕກອອກເປັນຫຼາຍຊິ້ນສ່ວນຕົກລົງໃນແມ່ນ້ຳ Potomac ຫຼັງຈາກຕຳກັບເຮືອບິນເຮລິຄັອບເຕີ້ກອງທັບສະຫະລັດ ໃນເຫດການດັ່ງກ່າວ. ເຈົ້າໜ້າທີ່ຈາກກົມດັບເພີງກ່າວວ່າ ນັກດຳນ້ຳຕັ້ງໃຈທີ່ຈະ “ກູ້ເອົາເຮືອບິນ” ແລະຊອກຫາອົງປະກອບຕ່າງໆເພີ້ມເຕີມ.
ຄະນະກຳມະການດ້ານຄວາມປອດໄພຂົນສົ່ງແຫ່ງຊາດ ຈະລວບລວມເອົາຂໍ້ມູນການບິນຂອງເຮືອບິນ ແລະເຄື່ອງບັນທຶກລາຍລະອຽດຂອງການບິນໃນຫ້ອງນັກບິນ ເພື່ອຊອກຫາຂໍ້ມູນຂອງສາເຫດຕ່າງໆທີ່ເຮັດໃຫ້ເຮືອບິນຕົກນັ້ນ.
ບໍ່ມີຜູ້ລອດຊີວິດໃນບັນດາຜູ້ໂດຍສານ ແລະພະນັກງານການບິນ 64 ຄົນ ຈາກຖ້ຽວບິນຂອງສາຍການບິນອາເມຣິກກັນແອລາຍ, ເຊິ່ງດໍາເນີນການໂດຍສາຍການບິນ PSA ທີ່ເປັນສາຂາຍ່ອຍ, ແລະເຈົ້າໜ້າທີ່ການບິນສາມຄົນໃນເຮລິຄັອບເຕີ UH-60 Black Hawk ຂອງກອງທັບ, ອີງຕາມລາຍງານຂອງລັດຖະບານກາງ ແລະລັດຖະບານທ້ອງຖິ່ນ ໃນວັນພະຫັດວານນີ້. ເຮືອບິນທັງສອງລຳ ໄດ້ຕົກລົງໃສ່ແມ່ນ້ຳ Potomac ໃກ້ກັບສະໜາມບິນແຫ່ງຊາດ Ronald Reagan Washington, ຢູ່ນອກຈາກນະຄອນຫຼວງວໍຊິງຕັນ ພຽງເລັກນ້ອຍ, ໃນເມືອງ ອາຣລິງຕັນ, ລັດ ເວີຈີເນຍ, ໃນຕອນແລງຂອງວັນພຸດແລ້ວນີ້, ເຊິ່ງການເກັບກູ້ ຍັງຄົງສືບຕໍ່ດໍາເນີນຢູ່.
In photos: Passenger jet and military helicopter collide in Washington
ເຈົ້າໜ້າທີ່ຄວບຄຸມການຈະລາຈອນທາງອາກາດຄົນນຶ່ງທີ່ກໍາລັງປະຕິບັດໜ້າທີ່ຕາມປົກກະຕິ ໄດ້ມອບໜ້າທີ່ໃຫ້ພະນັກງານສອງຄົນຢູ່ໃນຫໍຄອຍຂອງສະໜາມບິນ ໃນເວລາທີ່ການຕຳກັນເກີດຂຶ້ນ, ອີງຕາມລາຍງານຈາກສໍານັກງານການບິນແຫ່ງຊາດຂອງສະຫະລັດ (Federal Aviation Administration).
ບົດລາຍງານເປີດເຜີຍວ່າ “ເປັນການກໍານົດຕໍາແໜ່ງທີ່ບໍ່ປົກກະຕິ ສໍາລັບເວລາຂອງມື້ນັ້ນ ແລະປະລິມານຂອງການຈະລາຈອນ.”
ປະທານາທິບໍດີສະຫະລັດ ທ່ານ ດໍໂນລ ທຣໍາ ໄດ້ເຊັນລົງນາມໃນຄຳສັ່ງຝ່າຍບໍລິຫານ 2 ສະບັບ ໃນຕອນບ່າຍຂອງວັນພະຫັດວານນີ້, ລວມທັງການແຕ່ງຕັ້ງຮອງຜູ້ບໍລິຫານຂອງ FAA. ຄໍາສັ່ງດ້ານການບິນອີກນຶ່ງສະບັບ ໄດ້ຍົກເລີກແຜນການລິເລີ້ມຄວາມຫຼາກຫຼາຍຂອງລັດຖະບານກາງ.
ໃນຂະນະທີ່ລົງນາມໃນຄໍາສັ່ງຝ່າຍບໍລິຫານຢູ່ຫ້ອງການຮູບຊົງໄຂ່ ຫຼື Ovalຂອງທໍານຽບຂາວ, ທ່ານ ທຣໍາ ໄດ້ກ່າວຊ້ໍາໂດຍບໍ່ມີຫຼັກຖານວ່າ ໂຄງການຄວາມຫຼາກຫຼາຍຂອງລັດຖະບານກາງ ອາດຈະມີສ່ວນເຮັດໃຫ້ເກີດເຫດການດັ່ງກ່າວມານັ້ນ.
ລັດຖະມົນຕີກະຊວງຄົມມະນາຄົມຂົນສົ່ງຂອງສະຫະລັດ ທ່ານ ຊອນ ດັບຟີ (Sean Duffy), ຜູ້ທີ່ໄດ້ເຂົ້າຮ່ວມໃນກອງປະຊຸມຖະແຫຼງຂ່າວ ໃນວັນພະຫັດວານນີ້ ເພື່ອອະທິບາຍກ່ຽວກັບອຸບັດຕິເຫດຂອງເຮືອບິນຕົກ, ທ່ານກ່າວວ່າ ທັງການບິນຂອງເຮືອບິນ ແລະເຮລິຄັອບເຕີ ແມ່ນຢູ່ໃນ “ຮູບແບບມາດຕະຖານຂອງການບິນ” ທີ່ນຳໄປສູ່ການຕໍາກັນ.
ໃນການຖະແຫຼງຂ່າວ, ທ່ານ ທຣໍາ ໄດ້ຮຽກຮ້ອງໃຫ້ພາກັນສະແດງຄວາມສະຫງົບຊ່ວງໄລຍະນຶ່ງໃຫ້ແກ່ຜູ້ເຄາະຮ້າຍ ແລະກ່າວວ່າ ຊັບສິນຕ່າງໆໃນລະດັບທ້ອງຖິ່ນ, ລະດັບລັດ, ແລະລະດັບລັດຖະບານກາງ ແມ່ນຖືກນໍາມາໃຊ້ໃນພາລະກິດການເກັບກູ້ຄັ້ງນີ້.
ຟໍຣັມສະແດງຄວາມຄິດເຫັນ