ລິ້ງ ສຳຫລັບເຂົ້າຫາ

ການຍົກຍ້າຍ ພົນລະເຮືອນ ອອກຈາກ ເມືອງອາເລັບໂປ ໄດ້ຖືກໂຈະໄວ້


ການຍົກຍ້າຍພວກຜູ້ຄົນ ອອກຈາກນະຄອນອາເລັບໂປ ໄດ້ຖືກໂຈະໄວ້ ເຮັດໃຫ້ຫຼາຍ
ພັນຄົນ ຕົກຄ້າງຢູ່ໃນເມືອງດັ່ງກ່າວ. ສຽງລະເບີດແຕກ ສາມາດໄດ້ຍິນ ໃນວັນສຸກມື້ນີ້ ຢູ່ໃກ້ໆ ກັບຂະບວນລົດ ທີ່ກຳລັງເຄື່ອນຍ້າຍເອົາພວກຄົນ ອອກຈາກເມືອງນັ້ນ.

ອົງການຂ່າວຂອງທາງການ ລາຍງານວ່າ ພວກຕໍ່ຕ້ານລັດຖະບານ ໄດ້ລະເມີດຕໍ່ ສັນຍາຢຸດຍິງ ກັບລັດຖະບານຊີເຣຍ. ມັນບໍ່ຈະແຈ້ງເທື່ອວ່າ ການຍົກຍ້າຍຄົນອອກ
ເມືອງອາເລັບໂປ ຈະເລີ້ມຄືນໃໝ່ ໃນເວລາໃດ.

ກ່ອນໜ້ານີ້ ປະທານາທິບໍດີຂອງຣັດເຊຍ ໄດ້ກ່າວວ່າ ປະເທດຂອງທ່ານແມ່ນກຳລັງ ທຳງານຮ່ວມກັບ ເທີກີ ເພື່ອເລີ່ມຕົ້ນການເຈລະຈາ ສັນຕິພາບ ຮອບໃໝ່ ກ່ຽວກັບ
ຊີເຣຍ ໂດຍມີເປົ້າໝາຍ ເພື່ອໃຫ້ມີການຢຸດຍິງທົ່ວປະເທດ.

ການກ່າວຖະແຫລງ ເມື່ອວັນສຸກມື້ນີ້ ໃນລະຫວ່າງການຢ້ຽມຢາມ ຍີ່ປຸ່ນ ທ່ານ Vladimir Putin ໄດ້ກ່າວວ່າ ທ່ານ ແລະ ປະທານາທິບໍດີ ເທີກີ ທ່ານ Recep Tayyip Erdogan ຈະສະເໜີ ໃຫ້ຈັດການເຈລະຈາ ລະຫວ່າງ ລັດຖະບານຂອງຊີເຣຍ ແລະ ກຸ່ມຝ່ານຄ້ານ ຊຶ່ງອາດເປັນໄປໄດ້ວ່າ ຈະມີຂຶ້ນ ໃນນະຄອນຫຼວງ Astana ຂອງກາຊັກສະຖານ.

ຄຳເຫັນຂອງທ່ານ Putin ໄດ້ມີຂຶ້ນ ໃນຂະນະທີ່ພົນລະເຮືອນຫຼາຍຄົນຕື່ມອີກ ກຽມພ້ອມ ທີ່ຈະເດີນທາງອອກໄປຈາກ ເມືອງອາເລັບໂປ ທີ່ໄດ້ຖືກທຳລາຍ ຫຼັງຈາກຫຼາຍພັນຄົນ ໄດ້ຫລົບໜີອອກໄປ ໃນວັນພະຫັດວານນີ້ ພາຍໃຕ້ຂໍ້ຕົກລົງຢຸດຍິງ ທີ່ໄດ້ໄກ່ເກ່ຍ ໂດຍ ຣັດເຊຍ ແລະເທີກີ ຊຶ່ງເປັນທີ່ຈຳເປັນໄດ້ຍິນຍອມຕາມ ອັນທີ່ເປັນເມືອງທີ່ໄດ້ຖືກແບ່ງ
ແຍກ ໃຫ້ແກ່ການຄຸ້ມຄອງຂອງລັດຖະບານຊີເຣຍ.

ຄາດກັນວ່າ ສະພາຄວາມໝັ້ນຄົງອົງການສະຫະປະຊາຊາດ ຈະພົບປະກັນ ໃນກອງ ປະຊຸມສຸກເສີນ ​ໃນວັນສຸກມື້ນີ້ ເພື່ອປຶກສາຫາລື ເລື່ອງຂອງອາເລັບໂປ. ຝຣັ່ງ ຊຶ່ງໄດ້ ຮຽກຮ້ອງ ໃຫ້ເປີດກອງປະຊຸມ ຢາກໃຫ້ບັນດາຜູ້ສັງເກດການສາກົນ ທີ່ມີຢູ່ ໃຫ້ຕິດ
ຕາມເບິ່ງການຍົກຍ້າຍພົນລະເຮືອນ ຊຶ່ງກຳລັງມີຂຶ້ນຢູ່ນັ້ນ ຫຼັງຈາກມີການສູ້ລົບກັນ
ຢູ່ໃນເມືອງເປັນເວລາຫຼາຍປີຜ່ານມາ. ການຢຸດຍິງ ກ່ອນໜ້ານີ້ ໄດ້ພັງລົງເກືອບວ່າ ໃນທັນທີທັນໃດ ໂດຍໄດ້ຍຸຕິຄວາມພະຍາຍາມ ເພື່ອການຍົກຍ້າຍດັ່ງ​ກ່າວ.

ອ່ານຂ່າວນີ້ຕື່ມ ເປັນພາສາອັງກິດ

XS
SM
MD
LG