ສະພາກາແດງກ່າວວ່າ ຕົນໄດ້ຈັດສົ່ງການຊ່ວຍເຫຼືອສຸກເສີນ
ທາງດ້ານການແພດ ຊຸດທຳອິດ ໄປໃຫ້ເຢເມນ ບ່ອນທີ່ການ
ໂຈມຕີທາງອາກາດ ພາຍໃຕ້ການນຳພາ ຂອງຊາອຸດີ ຍັງບໍ່ມີ
ຮ່ອງຮອຍທີ່ສະແດງໃຫ້ເຫັນວ່າ ຈະຢຸດເຊົາລົງໃນໄວໆນີ້ແຕ່
ຢ່າງໃດເລີຍ.
ເຮືອບິນຂົນສົ່ງລຳນຶ່ງ ໄດ້ໄປເຖິງນະຄອນຫລວງ Sana’a
ຂອງປະເທດເຢເມນ ໃນວັນສຸກມື້ນີ້ ໂດຍນຳເອົາອຸບປະກອນ
ການແພດ 16 ໂຕນໄປໃຫ້ ອີງຕາມໂຄ ສົກຍິງ ຂອງຄະນະ
ກຳມະການສະພາກາແດງສາກົນ.
ສະພາກາແດງ ແລະກຸ່ມໃຫ້ການຊ່ວຍເຫລືອອື່ນໆ ໄດ້ພະຍາຍາມາເປັນເວລາຫລາຍ
ອາທິດແລ້ວ ທີ່ຈະຈັດສົ່ງການຊ່ວຍເຫລືອ ໄປໃຫ້ປະເທດເຢເມນ ບ່ອນທີ່ພວກກະບົດ Houthis ຂອງຊາວ Shi’ite ໄດ້ສູ້ລົບກັບກຳລັງທີ່ເປັນພັນທະມິດ ກັບປະທານາທິບໍດີ
ຂອງປະເທດດັ່ງກ່າວ.
ເຮືອບິນລົບຫລາຍລຳ ຂອງກຳລັງປະສົມຈາກປະເທດອາຣັບທີ່ນັບຖືສາສະໜາ ອິສລາມ
ນິກາຍ Sunni ໄດ້ທຳການໂຈມຕີມາເປັນເວລາສອງອາທິດ ຕໍ່ຫຼາຍໆ ເຂດຂອງປະເທດ
ທີ່ຄວບຄຸມໂດຍພວກກະບົດ Houthis ຊຶ່ງເຊື່ອກັນວ່າ ໄດ້ ຮັບການສະໜັບສະໜຸນຈາກ
ອີຣ່ານ ຊຶ່ງເປັນມະຫາອຳນາດຢູ່ໃນຂົງເຂດ.
ໃນອີກດ້ານນຶ່ງສະພາປາກິສຖານ ຊຶ່ງເປັນປະເທດທີ່ຄອບງຳໂດຍຊາວ Sunni ທີ່ມີຊາຍ
ແດນຕິດກັບອີຣ່ານນັ້ນ ໄດ້ລົງຄະແນນສຽງໃນວັນສຸກມື້ນີ້ ບໍ່ເຂົ້າຮ່ວມ ກັບກຳລັງປະສົມ.
ແຕ່ບັນດາສະມາຊິກສະພາ ໄດ້ໃຫ້ການສະໜັບສະໜຸນຕໍ່ຮ່າງ ຍັດຕິ ຮຽກຮ້ອງໃຫ້ເປີດ
ການເຈລະຈາ ເພື່ອຫາທາງຍຸດຕິຄວາມຮຸນແຮງດັ່ງກ່າວ ແທນ.
