ຜູ້ນໍາ ເສື້ອແດງ ຄົນນຶ່ງ ຖືກຍິງ ຢູ່ຈັງຫວັດ ອຸດອນ ຂອງໄທ (ສະໄລດ໌/ວີດີໂອ)

ຜູ້​ສະໜັບສະໜຸນລັດຖະບານ ທີ່​ຮູ້​ກັນ​ດີຄົນນຶ່ງ ຖືກ​ຍິງ​ແລະ​ໄດ້​ຮັບ
​ບາດ​ເຈັບ ​ຢູ່​ທີ່ພາກຕາເວັນອອກສຽງເໜືອ ຂອງ​ໄທ ​ໃນ​ຂະນະ​ທີ່
ບາ​ງກອກ ໄດ້ປະກາດ​ພາວະ​ສຸກ​ເສີນ ເພື່ອຮັບມືກັບຄວາມ​ຮຸນ
​ແຮງທາງ​ດ້ານ​ການ​ເມືອງ ທີ່ຍັງດຳເນີນຢູ່ຕໍ່ມາ.

ຕໍາຫລວດກ່າວ​ວ່າ ຜູ້​ນໍາ “​ເສື້ອ​ແດງ” ທ່ານຂວັນໄຊ ໄພຣພະນາ
​ໄດ້​ຖືກ​ຍິງ​ສອງ​ລູກຊ້ອນ ​ໂດຍ​ພວກໂຈມ​ຕີບໍ່​ຊາບຝ່າຍ ​ທີ່ຍິງປືນ
ສາດເຂົ້າ ໃສ່ຂະນະ​ທີ່​ຂັບ​ລົດ​ຜ່ານ​ໄປ​ ໃ​ນວັນ​ພຸດ​ມື້​ນີ້ ຢູ່ທີ່​ບ້ານ​
ພັກຂອງ​ທ່ານ ​ໃນ ຈັງຫວັດອຸດອນ​ທານີ ທາງພາກຕາເວັນອອກ
ສຽງເໜືອຂອງໄທ.

​

ເຫດຮ້າຍ​ດັ່ງກ່າວ ເກີດຂຶ້ນຫລັງຈາກມີການ​ໂຈມ​ຕີຫລາຍໆຄັ້ງ ຕໍ່ພວກ​ປະທ້ວງຕໍ່ຕ້ານລັດຖະ
ບານ ຊຶ່ງ​ໃນ​ວັນ​ພຸດ​ມື້​ນີ້ ເລີ້ມການປະທ້ວງເປັນ​ມື້ ທີເກົ້າ​ລຽນ​ຕິດ ຢູ່ທີ່​ເມືອງ​ຫລວງ​ຂອງໄທ.
ຄວາມ​ຮຸນ​ແຮງ​ໄດ້ເຮັດ​ໃຫ້​ມີປະກາດ​ພາວະ​ສຸກ​ເສີນ 60 ມື້​ຢູ່ທີ່ບາງ​ກອກ ​ແລະ​ເຂດ​ອ້ອມ​ແອ້ມ
ເຖິງ​ ແຕ່ກໍບໍ່​ມີ​ຮ່ອງ​ຮອຍ​ ຂອງກໍາລັງ​ຮັກສາ​ຄວາມ ​ປອດ​ໄພ ທີ່ຈະມາຂັບໄລ່ ກວດ​ລ້າງ​ພວກ ປະ​ທ້ວງ.

​ເຖິງ​ແມ່ນ​ວ່າ ມີ​ຕໍາຫລວດ ​ເພີ້ມການ​ກວດ​ຄົ້ນ ທີ່​ດ່ານ​ກວດ​ຕ່າງໆ ໃກ້​ກັບຄ້າຍ​ຂອງ​ພວກປະ ທ້ວງກໍດີ ​ແຕ່ຍັງ​ບໍ່​ມີ​ກໍາລັງ​ທະຫານທີ່ຕິດອາວຸດເຕັມອັດຕາ ​ມີໜ້າຢູ່ໃນເຂດດັ່ງກ່າວ. ບັນດາ​ເຈົ້າ​ໜ້າ​ທີ່​ບໍ່​ໄດ້​ຫ້າມ​ການ​ອອກ​ນອກ​ເຮືອນຫລື​ຫ້າມ​ບໍ່ໃຫ້​ໂຮມ​ຊຸ​ມນຸມທາງການ​ເມືອງ ດັ່ງ​ທີ່​ໄດ້ກຳນົດໄວ້ພາຍ​ໃຕ້ດໍາລັດພາວະ​ສຸກ​ເສີນ.

ຜູ້ບັນຊາ​ການກອງທັບບົກຂອງໄທ ນາຍພົນ Prayuth Chan-Ocha ກ່າວໃນ​ວັ​ນພຸດ​ມື້​ນີ້​ວ່າ
ທະຫານ​ຂອງ​ທ່ານຈະ “ບໍ່​ນໍາພາ​ປະ​ເທດ​ຊາດເຂົ້າ​ໄປ​ສູ່​ຄວາມ​ຮຸນ​ແຮງ.” ​ແຕ່ທ່ານກໍ​ໄດ້​ເຕືອນ​
ວ່າ ຖ້າ​ຫາກ​ສະຖານະ​ການຕົກຢູ່ໃນສະພາບທີ່ແກ້ໄຂກັນບໍ່ໄດ້ແລ້ວ “ທະຫານ​ຈຶ່ງຈະຕ້ອງໄດ້
ກ້າວເຂົ້າໄປ ເພື່ອແກ້ໄຂສະຖານະການ.”