ສະມາຊິກສະພາທ່ານໜຶ່ງ ໄດ້ເຮັດໃຫ້ການດຳເນີນວຽກງານ
ຂອງສະພາສູງຍຸດຕິລົງໃນວັນພຸດວານນີ້ ໂດຍໄດ້ໃຊ້ສິດຂອງ
ທ່ານ ຂຶ້ນກ່າວຖະແຫຼງກາງສະພາ ແບບຕໍ່ເນື່ອງຢ່າງບໍ່ມີການ
ລົບກວນໃດໆ ຕາບໃດທີ່ເຫື່ອແຮງຂອງທ່ານຍັງທົນໄດ້ຢູ່.
ທ່ານ Rand Paul ສະມາຊິກສະພາສູງສັງກັດພັກ Republican
ໄດ້ເລີ້ມເວົ້າບໍ່ຢຸດ ເພື່ອ ປະທ້ວງຕໍ່ຄວາມພະຍາຍາມ ທີ່ຈະຕໍ່
ອາຍຸກົດໝາຍຮັກຊາດ ຫຼື Patriot Act ຊຶ່ງເປັນກົດ ໝາຍທີ່
ໄດ້ຮ່າງຂຶ້ນ ຫຼັງຈາກການໂຈມຕີໃນວັນທີ 11 ກັນຍາ 2001
ທີ່ໃຫ້ສິດອຳນາດໃນ ຂອບເຂດທີ່ກວ້າງຂວາງແກ່ລັດຖະບານ
ສະຫະລັດ ໃນການສືບສວນແລະປ້ອງກັນການວາງແຜນ
ຂອງພວກກໍ່ການຮ້າຍ. ທ່ານ Paul ໄດ້ສືບຕໍ່ກ່າວຖະແຫຼງຢ່າງຕໍ່ເນື່ອງເຖິງ 10 ຊົ່ວໂມງເຄິ່ງ ກ່ອນທີ່ໄດ້ມີການຢຸດເຊົາ.
ທ່ານ Paul ໄດ້ເລີ້ມກ່າວຄຳເວົ້ານີ້... “ຂ້າພະເຈົ້າຈະບໍ່ໃຫ້ ກົດໝາຍຮັກຊາດ ເປັນການກະ ທຳທີ່ບໍ່ຮັກຊາດ ດຳເນີນໄປຢ່າງບໍ່ມີການທ້າທາຍນັ້ນ,” ຊຶ່ງມັນເປັນການໃຫ້ຄວາມເຫັນ
ຍາວ ທີ່ສຸດໃນສະພາ ຂອງສະມາຊິກສະພາສູງໃດໆ ໃນປີນີ້. ທ່ານຍັງໄດ້ກ່າວຕໍ່ໄປວ່າ
“ໃນຊ່ວງໜຶ່ງຂອງປະວັດສາດຂອງຊາດ ບ່ອນທີ່ຄວາມຫວາດກົວ ແລະ ຄວາມພຶງພໍໃຈ ອະນຸຍາດໃຫ້ມີການສະສົມອຳນາດ ແລະສິດເສລີພາບ ແລະສິດຂອງສ່ວນບຸກຄົນ ໄດ້ຮັບຄວາມເສຍ ຫາຍນັ້ນ.”
ທ່ານ Paul ທີ່ໄດ້ປະກາດລົງສະໝັກເຂົ້າແຂ່ງຂັນເປັນປະທານາທິບໍດີໃນປີ 2016 ແມ່ນເປັນຜູ້ທີ່ກ້າຕຳນິຕິຕຽນຢ່າງອາດຫານ ຕໍ່ການເກັບກຳຂໍ້ມູນຂະໜາດໃຫຍ່ຂອງອົງການຮັກສາຄວາມປອດໄພແຫ່ງຊາດ ກ່ຽວກັບບັນທຶກຂໍ້ມູນໂທລະສັບຂອງຊາວອາເມຣິກັນ
ຊຶ່ງໃນຫວ່າງໝໍ່ໆມານີ້ ໂຄງການດັ່ງກ່າວຖືກສານອຸທອນຂອງລັດຖະບານກາງສະຫະລັດ ຕັດສິນວ່າຜິດກົດໝາຍ ແລະໃນທີ່ສຸດກໍຈະໄດ້ຖືກຕັດສິນໂດຍສານສູງສຸດ ນອກເສຍຈາກວ່າທາງລັດຖະສະພາເປັນຜູ້ປະຕິຮູບເອງ.
