ພະລາຊີນີ Elizabeth ແຫ່ງອັງກິດ ຊົງສະຫລອງວັນຂີດໝາຍທີ່ສໍາຄັນຄັ້ງປະວັດສາດໃນວັນຈັນມື້ນີ້ ຊຶ່ງເປັນວັນເລີ້ມຕົ້ນເທດສະການສະເຫລີມສະຫລອງຄົບຮອບ 60 ປີ ແຫ່ງການຂຶ້ນຄອງລາດຊະບັນລັງຂອງພະນາງ.
ພະລາຊີນີຊຶ່ງມີພະຊົນມາຍຸ 85 ພັນສາເລີ້ມຕົ້ນເທດສະການສະເຫລີມສະຫລອງດັ່ງກ່າວໃນວັນຈັນມື້ນີ້ ໂດຍສະເດັດໄປຢ້ຽມຢາມແບບບໍ່ອອກໜ້າອອກຕາ ໃນພາກຕາເວັນອອກຂອງອັງກິດ. ການສະຫລອງຈະດໍາເນີນໄປເຖິງຈຸດສູງສຸດ ຊຶ່ງຈະເປັນການສະຫລອງໃຫຍ່ເປັນເວລາ 4 ມື້ ໃນເດືອນມິຖຸນາ ຮວມທັງການສະແດງຂະບວນເຮືອ ຈໍານວນ 1 ພັນລໍາທີ່ຈະແລ່ນຂຶ້ນໄປຕາມແມ່ນໍ້າ Thames ນັ້ນ.
ໃນວັນອາທິດວານນີ້ ພະລາຊີນີ Elizabeth ພ້ອມດ້ວຍພະສາມີ ຄື ເຈົ້າຊາຍ Philip ໄດ້ຜ່ານຜ່າດິນຟ້າອາກາດທີ່ມີຫິມະຕົກ ໄປຮ່ວມພິທີທາງສາສະໜາຢູ່ໂບດແຫ່ງນຶ່ງ. ເຈົ້າຊາຍ Philip ຊົງມີພະຊົນມາຍຸ 90 ພັນສາ ແລະໄດ້ຊົງຮັບການຜ່າຕັດຫົວໃຈໃນເດືອນທັນວາຜ່ານມາ.
ບັນດາສະມາຊິກລາຊະວົງອັງກິດມີໝາຍກໍານົດທີ່ຈະໄປຮ່ວມພິທີສະເຫລີມສະຫລອງໂອກາດດັ່ງກ່າວໃນຕ່າງປະເທດ ທີ່ເປັນສະມາຊິກຂອງເຄືອຈັກກະພົບອັງກິດ. 16 ປະເທດໃນນັ້ນ ແມ່ນມີພະລາຊີນີ Elizabeth ເປັນກະສັດຂອງພວກເຂົາເຈົ້າເຊ່ນກັນ. ແຕ່ພະລາຊີນີ Elizabeth ແລະເຈົ້າຊາຍ Philip ຈະຈໍາກັດການເດີນທາງຂອງພວກພະອົງຢູ່ແຕ່ໃນອັງກິດ.
ພະລາຊີນີ Elizabeth ຊົງໄດ້ຂຶ້ນຄອງບັນລັງ ຕັ້ງແຕ່ຍັງເປັນເຈົ້າຟ້າຍິງຢູ່ ໃນວັນທີ 6
ກຸມພາ ປີ 1952 ເວລາພະບິດາ ຄື King George ທີ 6 ຊົງສິ້ນພະຊົນ ຫລັງຈາກມີ
ສຸຂະພາບບໍ່ດີມາເປັນ ເວລາຫລາຍປີ.
