ຍີ່ປຸ່ນ ໃນວັນອາທິດມື້ນີ້ ໄດ້ຢືນຢັນວ່າ ແມ່ຍິງຄົນນຶ່ງ ຜູ້ທີ່ໄດ້ຖືກກວດພົບວ່າ ບໍ່ມີເຊື່ອໄວຣັສ ແລ້ວກໍໄດ້ໃຫ້ລົງອອກຈາກເຮືອສຳລານ Diamond Princess ທີ່ໄດ້ຖືກກະທົບໂດຍການລະບາດຂອງໄວຣັສໂຄໂຣນາ ນັ້ນ ຊຶ່ງໃນເວລາຕໍ່ມາ ຜູ້ກ່ຽວໄດ້ຖືກກວດພົບວ່າ ມີເຊື້ອໄວຣັສ ຊຶ່ງໄດ້ກໍ່ໃຫ້ເກີດມີຄຳຖາມຫຼາຍຢ່າງ ກ່ຽວກັບ ປະສິດທິພາບ ຂອງມາດຕະການກັກກັນທັງຫຼາຍ.
ລັດຖະມົນຕີກະຊວງສາທາລະນະສຸກ ທ່ານຄັດຊຸໂນບຸ ຄາໂຕ ຍັງໄດ້ອອກມາຂໍອະໄພຍະໂທດ ຫຼັງຈາກທີ່ ຜູ້ໂດຍສານ 23 ຄົນ ໄດ້ຖືກປ່ອຍອອກໄປ ໂດຍປາສະຈາກ ການກວດຢ່າງຖືກຕ້ອງເສຍກ່ອນ.
ແມ່ຍິງດັ່ງກ່າວ ຜູ້ຢູ່ໃນໄວ 60 ປີ ໄດ້ກັບຄືນເມືອບ້ານເກີດຂອງນາງ ໃນເຂດແຂວງໂຕຈີກີ ຢູ່ກ້ຳເໜືອຂອງນະຄອນຫຼວງໂຕກຽວ ໂດຍທາງລົດໄຟ ຫຼັງຈາກທີ່ນາງໄດ້ລົງຈາກກຳປັ່ນ ເມື່ອວັນພຸດຜ່ານມາ ແຕ່ນາງ ກໍໄດ້ເປັນໄຂ້ໃນວັນສຸກ ແລະໄດ້ຖືກກວດພົບວ່າ ມີເຊື້ອໄວຣັສ ໃນວັນເສົາວານນີ້ ອີງຕາມເຈົ້າໜ້າທີ່ທ້ອງຖິ່ນທ່ານນຶ່ງ ທີ່ໄດ້ກ່າວຕໍ່ອົງການຂ່າວ AFP.
ແມ່ຍິງຄົນນີ້ ໄດ້ເປັນຜູ້ໂດຍສານຄົນທຳອິດ ຈາກເຮືອສຳລານດັ່ງກ່າວ ທີ່ກວດພົບວ່າ ມີເຊື້ອໄວຣັສ ໃນຍີ່ປຸ່ນ ຫຼັງຈາກທີ່ໄດ້ ຜ່ານການກວດສອບຮຽບຮ້ອຍ ແລະກໍໄດ້ອະນຸຍາດໃຫ້ລົງຈາກເຮືອ.
ລາຍງານຂ່າວ ອອກມາໃນຂະນະທີ່ບັນດານັກຊ່ຽວຊານດ້ານການຕິດແປດຂອງພະຍາດ ແລະບັນດາເຈົ້າໜ້າທີ່ທ້ອງຖິ່ນ ໄດ້ສອບຖາມເຖິງປະສິດທິພາບຂອງໄລຍະການກັກກັນຢູ່ເທິງກຳປັ່ນດັ່ງກ່າວ.
ເຈົ້າແຂວງໆໂຕຈີກີ ທ່ານໂຕໂມຄາຊຸ ຟູຄູດາ ໄດກ່າວຕໍ່ກອງປະຊຸມຖະແຫລງຂ່າວ ເມື່ອຕອນແລງວັນເສົາວານນີ້ ວ່າ “ໄດ້ມີການພິຈາລະນາຕັດສິນວ່າ ຈຳພວກຜູ້ທີ່ໄດ້ຖືກອະນຸຍາດໃຫ້ລົງຈາກກຳປັ່ນ ຫຼັງຈາກທີ່ໄດ້ກວດບໍ່ພົບວ່າ ມີເຊື້ອໄວຣັສ ຄົງຈະບໍ່ມີບັນຫາ ແຕ່ດຽວນີ້ ມັນໄດ້ເປັນທີ່ຈະແຈ້ງແລ້ວວ່າ ພວກຄົນເຫຼົ່ານັ້ນ ສາມາດມີເຊື້ອໄວຣັສໄດ້.”
