ລິ້ງ ສຳຫລັບເຂົ້າຫາ

logo-print

ປ. ປູຕິນ ເຕືອນວ່າ ຖ້າ ສຫລ ຖອນໂຕຈາກ ສົນທິສັນຍາ ອາດ​ຈະ​ພາ​ໃຫ້ ມີ​ການ​ແຂ່ງ​ຂັນ ອາວຸດ


ປະ​ທາ​ນາ​ທິ​ບໍ​ດີ ​ຣັດ​ເຊຍ ທ່ານ ວ​ລາ​ດີ​ເມຍ ປູ​ຕິນ ກ່າວໃນລະຫວ່າງ ກອງປະຊຸມຖະແຫລງຂ່າວຮ່ວມກັບ ນາຍົກລັດຖະມົນຕີ ຂອງອີຕາລີ ທ່ານ ​ກິວ​ເຊັບ​ເປ ກົງ​ເຕ (ບໍ່ໄດ້ຢູ່ໃນຮູບ) ໃນວັງເຄຣມລິນ, ຢູ່ນະຄອນຫຼວງ ມົສກູ, ວັນທີ 24 ຕຸລາ 2018.

ປະ​ທາ​ນາ​ທິ​ບໍ​ດີ ​ຣັດ​ເຊຍ ທ່ານ ວ​ລາ​ດີ​ເມຍ ປູ​ຕິນ ​ໄດ້ເຕືອນ​ກ່ຽວ​ກັບ​ການ​ແຂ່ງ​ຂັນ​ອາ​ວຸດ
​ຄັ້ງ​ໃໝ່ ຖ້າ​ປະ​ທາ​ນາ​ທິ​ບໍ​ດີ ​ສະ​ຫະ​ລັດ ທ່ານ ​ດໍ​ໂນ​ລ ທ​ຣຳ ຫາ​ກປະ​ຕິ​ບັດຕາມ​ຄຳ​ຂູ່ ​ຂອງ​
ທ່ານ ທີ່​ຈະ​ຖອນ​ຕົວ​ອອກ​ຈາກ ​ຂໍ້​ຕົກ​ລົງ​ຄວບ​ຄຸມ​ອາ​ວຸດ ທີ່​ສຳ​ຄັນ.

ຫລັງ​ຈາກ​ໄດ້​ໂອ້​ລົມ​ເຈ​ລະ​ຈາ​ກັບ​ ນາ​ຍົກ​ລັດ​ຖະ​ມົນ​ຕີ ​ອີ​ຕາ​ລີ ທ່ານ ​ກິວ​ເຊັບ​ເປ ກົງ​ເຕ ທີ່​
ນະ​ຄອນ​ຫຼວງ​ມົ​ສ​ກູ ​ແລ້ວ ທ່ານ​ ປູ​ຕິນ ​ກ່າວ​ວ່າ ທ່ານ​ຈະ​ຕອບ​ໂຕ້ “ແບບ​ດຽວກັນ” ຖ້າ​
ສະ​ຫະ​ລັດ​ ຫາກ​ຕິດ​ຕັ້ງ​ລູກ​ສອນ​ໄຟ ທີ່​ສາມ​າດ​ຍິງ​ໄດ້​ໃນ​ໄລ​ຍະ​ປານ​ກາງ ຢູ່​ ຢູ​ໂຣບ.

ທ່ານ​ປູ​ຕິນ ກ່າວ​ວ່າ “ຖ້າ​ພວກ​ເຂົາ​ ຈະ​ສົ່ງ​ລູກ​ສອນ​ໄຟ​ເຫຼົ່າ​ນີ້​ ມາຍັງ​ ຢູ​ໂຣບ ແນ່ນອນ
ການ​ຕອບ​ໂຕ້​ຂອງ​ພວກ​ເຮົາ ກໍ​ຈະ​ສະ​ທ້ອນ​ກັບ​ຄືນ​ແບບ​ດຽວ​ກັນ​ນີ້”
ແລະທ່ານ​ ກ່າວ
​ຕື່ມ​ວ່າ ການ​ຕອບ​ໂຕ້​ຂອງ​ ຣັດ​ເຊຍ ຈະ​ມີ​ຂຶ້ນ “ຢ່າງວ່ອງ​ໄວ​ ແລະ​ມີ​ປະສິດ​ທິ​ຜົນ.”

ລັດຖະມົນຕີປ້ອງກັນປະເທດ ຂອງຣັດເຊຍ ທ່ານ ເຊີຣເກ ໂຊຍກູ, ຫັນຫລັງໃຫ້ກ້ອງ, ພົບປະກັບ ທີ່ປຶກສາດ້ານຄວາມໝັ້ນຄົງແຫ່ງຊາດ ສະຫະລັດ ທ່ານ ຈອນ ໂບລຕັນ ໃນນະຄອນຫຼວງ ມົນກູ, ວັນທີ 23 ຕຸລາ 2018.
ລັດຖະມົນຕີປ້ອງກັນປະເທດ ຂອງຣັດເຊຍ ທ່ານ ເຊີຣເກ ໂຊຍກູ, ຫັນຫລັງໃຫ້ກ້ອງ, ພົບປະກັບ ທີ່ປຶກສາດ້ານຄວາມໝັ້ນຄົງແຫ່ງຊາດ ສະຫະລັດ ທ່ານ ຈອນ ໂບລຕັນ ໃນນະຄອນຫຼວງ ມົນກູ, ວັນທີ 23 ຕຸລາ 2018.

ນອກນັ້ນ ທ່ານ​ຍັງ​ເຕືອນ​ວ່າ ບັນ​ດາ​ປະ​ເທ​ດ​ໃນ​ຢູ​ໂຣບ​ທີ່​ຕົກ​ລົງ​ໃຫ້​ສະ​ຫະ​ລັດ​ຕິດຕັ້ງ​ລູກ​
ສອນ​ໄຟນັ້ນ ຈະ​ເຮັດ​ໃຫ້​ພວກ​ເຂົາ​ເຈົ້າ​ຕົກ​ຢູ່​ໃນ​ຄວາມ​ສ່ຽງຈາກ​ການ​ໂຈມຕີ​ຂອງ​ຣັດ​ເຊຍ.

ແຕ່​ໃນ​ຂະ​ນະ​ດຽວ​ກັນ ​ທ່ານ​ປູ​ຕິນກໍ​ກ່າວ​ວ່າ ທ່ານ​ຢາກ​ຫາ​ລື​ບັນ​ຫານີ້ ກັບ​ປະ​ທານາ​ທິ​ບໍ​ດີ
​ທ​ຣຳ ເວ​ລາ​ພວກ​ທ່ານ​ທັງ​ສອງ​ພົບ​ປະ​ກັນ​ ທີ່​ນະ​ຄອນ​ ປາ​ຣີ ​ໃນ​ເດືອນ​ໜ້າ ຊຶ່ງ​ພວກ​ທ່ານ​
ຈະ​ໄປ​ຮ່ວມ​ພິ​ທີສະ​ຫຼອງຄົບ​ຮອບ 100 ປີ​ ໃນ​ການ​ສິ້ນ​ສຸດ​ລົງ​ຂອງສົງ​ຄາມ​ໂລກ​ຄັ້ງ​ທີ 1.

ທ່ານ​ປູ​ຕິນ​ກ່າວ​ວ່າ “ຂ້າ​ພະ​ເຈົ້າ​ບໍ່​ເຂົ້າ​ໃຈ​ເລີຍ​ວ່າ ເປັນ​ຫຍັງ​ຈຶ່ງ​ຈະ​ເຮັດ​ໃຫ້​ຢູ​ໂຣບ​ ຕົກ​ຢູ່​
ໃນອັນ​ຕະ​ລາຍ​ຮ້າຍ​ແຮງ​ແບບນີ້. ຂ້າ​ພະ​ເຈົ້າ​ຍັງ​ມອງ​ບໍ່​ເຫັນ​ເຫດ​ຜົນ​ເລີຍ​ ສຳລັບ​ເລື່ອງ​
ດັ່ງ​ກ່າວ ພວກ​ເຮົາ​ພ້ອມ​ແລ້ວ ​ທີ່​ຈະ​ເຮັດ​ວຽກ​ກັບ​ຄູ່​ຮ່ວມ​ງານ​ຝ່າຍ ​ອາ​ເມຣິ​ກັນ ໂດຍ​
ປາ​ສະ​ຈາກ​ຄວາມ​ຢ້ານ​ກົວ​ໃດໆ.”

ເລ​ຂ​າ​ທິ​ການ​ໃຫຍ່​ອົງ​ການ​ເນ​ໂຕ້ ທ່ານ​ເຈັນ​ສ໌ ສ​ໂຕ​ລ​ເຕັນ​ເບີກ ໄດ້​ຖິ້ມ​ໂທດ​ໃສ່ ​ຣັດ​ເຊຍ
​ໃນວັນ​ພຸດ​ວານນີ້​ວ່າ ລະ​ເມີດ​ສົນ​ທິ​ສັນ​ຍາ​ຄວບ​ຄຸມ​ອາ​ວຸດ ທີ່​ປະ​ທາ​ນາທິ​ບໍ​ດີ​ ທ​ຣຳ ຢາກ​
ຈະ​ຢຸດ​ເຊົາ​ຢູ່​ແລ້ວ. ແຕ່​ຂະ​ນະ​ດຽວ​ກັນ ທ່ານ​ກໍ​ກ່າວ​ວ່າ ທ່ານຍັງ​ມອງ​ບໍ່​ເຫັນ​ວ່າ ຈະ​ມີ​
ການ​ແຂ່ງ​ຂັນ​ກຳ​ລັງ​ອາ​ວຸດ​ນິວ​ເຄ​ລຍ ​ຢູ່​ໃນ ​ຢູ​ໂຣບ.

ອະ​ດີດ​ຜູ້​ນຳ​ໂຊ​ຫວຽດ ທ່ານ​ ມີ​ແ​ຄລ ກໍບາ​ຊອ​ບ ແລະ​ມື້​ລາງ​ປະ​ທາ​ນາ​ທິ​ບໍ​ດີ ຣໍໂນລດ໌
ເຣເ​ກີນ ໄດ້​ລົງ​ນາມ​ໃນ​ສົນ​ທິ​ສັນ​ຍາ ກຳ​ລັງ​ອາ​ວຸດນິວ​ເຄ​ລຍ​ໄລ​ຍະ ປານ​ກາງ ​ໃນ​ປີ
1987. ສົນ​ທິ​ສັນ​ຍາ​ດັ່ງ​ກ່າວ ໄດ້​ຫ້າມ​ບໍ່​ໃຫ້ ສະ​ຫະ​ລັດ ແລະ​ ຣັດ​ເຊຍ ​ສ້າງ ທົດ​ລອງ ​
ເກັບສະ​ສົມ​ລູກ​ສອນ​ໄຟ​ນິວ​ເຄ​ລຍ ທີ່​ຍິງ​ຈາກ​ພາກ​ພື້ນ​ດິນ ​ໄລ​ຍະຕັ້ງ​ແຕ່​ 500 ຫາ
5,000 ກິ​ໂລ​ແມັດ ໄວ້​ໃນ​ສາງຂອງ​ຕົນ.

ປະ​ທາ​ນາ​ທິ​ບໍ​ດີ ​ທ​ຣຳ ໄດ້​ກ່າວ​ຫາ​ ຣັດ​ເຊຍ ​ວ່າ ລະ​ເມີດ​ສົນ​ທິ​ສັນ​ຍາ​ດັ່ງ​ກ່າວ​ໂດຍຕິ​ດ​ຕັ້ງ​
ລະ​ບົບ​ລູກ​ສອນ​ໄຟ​ຄ​ຣູ​ສ ທີ່​ຍິງ​ຈາກ​ພື້ນ​ດິນ ຊຶ່ງ​ເປັນ​ໄພ​ຂົ່ມ​ຂູ່​ຕໍ່​ອົງ​ການ​ເນ​ໂຕ້.

ຣັ​ດ​ເຊຍ ໄດ້ປະ​ຕິ​ເສດ ​ຕໍ່ການ​ລະ​ເມີດ​ສົນ​ທິ​ສັນ​ຍາລູກ​ສອນ​ໄຟ​ທີ່​ຍິງ​ໄດ້​ໃນ​ໄລ​ຍະປານ
​ກາງ ​ຫຼື INF ແລະ ​ກ່າວ​ວ່າ ລະ​ບົບ​ປ້ອງ​ກັນ​ລູກ​ສອນ​ໄຟຂອງ​ ສະ​ຫະ​ລັດ​ ຢູ່ໃນ ​ຢູ​ໂຣບ
ແລະ​ບາດ​ກ້າວທີ່​ກໍ່​ກວ​ນ​ອື່ນໆ​ນັ້ນ ແມ່ນການ​ລະ​ເມີດ.

ທ່ານຈອນ ​ໂບ​ລ​ຕັນ​ ທີ່​ປຶກ​ສາ​ດ້ານ​ຄວາມ​ໝັ້ນ​ຄົງ​ແຫ່ງ​ຊາດ​ຂອງ​ສະ​ຫະ​ລັດ ຜູ້​ຊຶ່ງໄດ້​ພົ​ບ
​ປະ​ກັບ​ປະ​ທາ​ນາ​ທິ​ບໍ​ດີ​ ປູ​ຕິນ ທີ່​ນະ​ຄອນ​ຫຼວງ​ ມົ​ສ​ກູ​ ໃນ​ວັນ​ອັງ​ຄານ​ຜ່ານມາ ເອີ້ນ​ການ
ລະ​ເມີດ​ຂອງ​ຣັດ​ເຊຍນັ້ນ ​ວ່າ “ມີ​ມາ​ແຕ່​ດົນ​ແລ້ວ ແລະ​ກໍ​ຢ່າງ​ຮ້າຍແຮງ.”

ອ່ານຂ່າວນີ້ຕື່ມ ເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG