ປະທານາທິບໍດີຣັດເຊຍ ທ່ານວລາດິເມຍ ປູຕິນໄດ້ຊົມເຊີຍສາຍພົວພັນອັນກວ້າງຂວາງຂອງປະເທດຕົນກັບຈີນ ໃນວັນອາທິດວານນີ້ ລວມທັງການຮ່ວມມືທາງດ້ານການທະຫານ ໃນຂະນະທີ່ທ່ານໄດ້ພົບປະກັບລັດຖະມົນຕີປ້ອງກັນປະເທດຈີນ, ທ່ານຫລີ ຊາງຟູ (Li Shangfu) ທີ່ນະຄອນຫຼວງມົສກູ.
ທ່ານປູຕິນ ກ່າວໃນບົດປາໄສເປີດກອງປະຊຸມວ່າ ການພັດທະນາສາຍພົວພັນລະຫວ່າງສອງປະເທດຂອງພວກເຮົາ ພວມດຳເນີນໄປດ້ວຍດີໃນທຸກຂົງເຂດ - ໃນດ້ານເສດຖະກິດ, ສັງຄົມ, ວັດທະນະທຳ ແລະ ການສຶກສາ ແລະໃນດ້ານການທະຫານ.
ວັງເຄຣມລິນໄດ້ເຜີຍແຜ່ຮູບພາບຂອງກອງປະຊຸມທີ່ສະແດງໃຫ້ເຫັນວ່າ ທ່ານປູຕິນ ຈັບມືກັບທ່ານຫລີ ແລະຈາກນັ້ນກໍນັ່ງລົງທີ່ໂຕະ. ລັດຖະມົນຕີກະຊວງປ້ອງກັນປະເທດຣັດເຊຍ, ເຊີເກ ຊອຍກູ (Sergei Shoigu) ກໍໄດ້ເຂົ້າຮ່ວມກອງປະຊຸມນີ້ນຳ. ປັກກິ່ງໄດ້ປະກາດການໄປຢ້ຽມຢາມມົສກູຂອງທ່ານຫລີ ໃນອາທິດ ແລ້ວນີ້, ໂດຍກ່າວວ່າ ທ່ານຈະພົບກັບເຈົ້າຫນ້າທີ່ປ້ອງກັນປະເທດ, ແຕ່ກໍບໍ່ໄດ້ ກ່າວເຖິງການພົບປະກັບທ່ານ ປູຕິນ. ທ່ານສີ ຈິ້ນຜິງ ປະທານປະເທດຈີນໄດ້ພົບປະກັບທ່ານປູຕິນ ຢູ່ມົສກູໃນເດືອນແລ້ວນີ້.
ທັງສອງປະເທດໄດ້ເພີ່ມທະວີການຮ່ວມມື ນັບແຕ່ຣັດເຊຍໄດ້ບຸກລຸກຢູເຄຣນໃນປີກາຍນີ້. ຈີນອ້າງວ່າ ມີຄວາມເປັນກາງຢ່າງເປັນທາງການກ່ຽວກັບການບຸກລຸກຂອງມົສກູ ແຕ່ໃນຂະນະດຽວກັນ ຣັດເຊຍແລະຈີນ ກໍໄດ້ປະກາດວ່າ ພວກຕົນມີການຮ່ວມມື “ຢ່າງບໍ່ມີຂອບເຂດ”.
ຈີນໄດ້ສະເໜີແຜນການສັນຕິພາບ ເພື່ອຍຸດຕິການປະທະກັນຢູ່ໃນຢູເຄຣນ ແຕ່ກໍບໍ່ໄດ້ຮຽກຮ້ອງໃຫ້ຣັດເຊຍຖອນທະຫານອອກໄປ ຕາມການຮຽກຮ້ອງຂອງປະທາ ນາທິບໍດີຢູເຄຣນ, ທ່ານໂວໂລດິເມຍ ເຊເລນສ໌ກີ ກ່ອນຈະມີການເຈລະຈາສັນຕິ ພາບເກີດຂຶ້ນ.
ຈີນໄດ້ປະຕິເສດການສົ່ງອຸປະກອນການທະຫານໄປຍັງຣັດເຊຍເລື້ອຍໆ, ແຕ່ເຈົ້າໜ້າທີ່ກີຢິບກ່າວໃນວັນສຸກຜ່ານມານີ້ວ່າ ກອງທະຫານຢູເຄຣນກຳລັງຊອກຫາສິ້ນສ່ວນທີ່ມາຈາກຈີນເພີ້ມຂຶ້ນໃນການຜະລິດອາວຸດຂອງຣັດເຊຍທີ່ໃຊ້ຢູ່ໃນຢູເຄຣນ.
