ປະທານາທິບໍດີ ຣັດເຊຍ ທ່ານ ວລາດິເມຍ ປູຕິນ ໄດ້ເພັ່ງເລັງໃສ່ການຄ້າ ແລະ ການແລກປ່ຽນວັດທະນະທຳໃນລະຫວ່າງການຢ້ຽມຢາມ ຈີນ ທາງລັດຖະການໃນວັນສຸກມື້ນີ້ ທີ່ໄດ້ເລີ່ມຂຶ້ນດ້ວຍມິດໄມຕີ ແລະ ການປະຊຸມກັບຜູ້ນຳ ຈີນ ທ່ານ ສີ ຈິ່ນຜິງ ທີ່ໄດ້ເຮັດໃຫ້ການເປັນຄູ່ຮ່ວມຂອງພວກທ່ານເລິກເຊິ່ງຂຶ້ນ “ຢ່າງບໍ່ມີຂີດຈຳກັດ” ໃນຂະນະທີ່ສອງປະເທດດັ່ງກ່າວປະເຊີນກັບຄວາມເຄັ່ງຕຶງຫຼາຍກວ່າເກົ່າກັບຕາເວັນຕົກ.
ທ່ານ ປູຕິນ ໄດ້ຍົກຍ້ອງ ຈີນ ຢູ່ງານວາງສະແດງ ຈີນ-ຣັດເຊຍ ໃນເມືອງ ຮາບິນ ທາງພາກຕາເວັນອອກສຽງເໜືອ, ໂດຍຍົກຍ້ອງການເຕີບໂຕໃນການຄ້າສອງຝ່າຍ. ທ່ານຍັງໄດ້ພົບປະກັບພວກນັກສຶກສາຢູ່ສະຖາບັນເທັກໂນໂລຈີ ຮາບິນ ໃນຕອນແລງຂອງວັນສຸກນີ້. ຮາບິນ, ເຊິ່ງແມ່ນເມືອງເອກຂອງແຂວງ ເຮລອງຈຽນ ຂອງ ຈີນ, ຄັ້ງນຶ່ງໄດ້ເປັນທີ່ຢູ່ຂອງຜູ້ຍົກຍ້າຍຖິ່ນຖານຊາວ ຣັດເຊຍ ແລະ ໄດ້ຮັກສາສາຍພົວພັນທາງປະຫວັດສາດຈຳນວນນຶ່ງໄວ້ໃນສະຖາປະນິກຂອງເຂົາເຈົ້າ, ເຊັ່ນໂບດໃຫຍ່ ເຊັ້ນ ໂຊເຟຍ ທີ່ຕັ້ງຢູ່ໃຈກາງເມືອງ, ເຊິ່ງແມ່ນອະດີດໂບດນິກາຍ ອໍໂຕດັອກສ໌ ຂອງ ຣັດເຊຍ.
ເຖິງແມ່ນວ່າການຢ້ຽມຢາມຂອງທ່ານ ປູຕິນ ແມ່ນມີສັນຍາລັກຫຼາຍກວ່າ ແລະ ບໍ່ມີຂໍ້ສະເໜີທີ່ແນ່ນອນຫຍັງຫຼາຍກໍຕາມ, ສອງປະເທດດັ່ງກ່າວແນວໃດກໍຕາມ ແມ່ນກຳລັງສົ່ງຂໍ້ຄວາມທີ່ຊັດເຈນ.
ທ່ານ ໂຈເຊັຟ ໂທຣີກຽນ, ນັກຄົ້ນຄວ້າຢູ່ສະຖາບັນ ຮູເວີ ຂອງມະຫາວິທະຍາໄລ ສແຕນຝອດ ກ່າວວ່າ “ໃນເວລານີ້, ເຂົາເຈົ້າກຳລັງເຕືອນປະເທດຕາເວັນຕົກວ່າເຂົາເຈົ້າສາມາດເປັນປໍລະປັກເວລາທີ່ເຂົາເຈົ້າຢາກເຮັດ.”
ຢູ່ງານວາງສະແດງໃນເມືອງ ຮາບິນ, ທ່ານ ປູຕິນ ໄດ້ກ່າວຢ້ຳເຖິງຄວາມສຳຄັນຂອງການຮ່ວມມືລະຫວ່າງ ຣັດເຊຍ ແລະ ຈີນ ໃນການພັດທະນາເທັກໂນໂລຈີໃໝ່ຮ່ວມກັນ.
ທ່ານກ່າວວ່າ “ໂດຍການເພິ່ງພາອາໄສປະເພນີຂອງມິດຕະພາບ ແລະ ການຮ່ວມມື, ພວກເຮົາສາມາດເບິ່ງໄປອະນາຄົດດ້ວຍຄວາມໝັ້ນໃຈ. ການເປັນຄູ່ຮ່ວມລະຫວ່າງ ຣັດເຊຍ ແລະ ຈີນ ຈະຊ່ວຍການເຕີບໂຕຂອງເສດຖະກິດຂອງພວກເຮົາ, ຮັບປະກັນຄວາມປອດໄພດ້ານພະລັງງານ, ຊ່ວຍພັດທະນາການຜະລິດ ແລະ ສ້າງວຽກເຮັດງານທຳໃໝ່.”
ຟໍຣັມສະແດງຄວາມຄິດເຫັນ