ລົດຕູ້ຕຳຫລວດຄັນນຶ່ງແລນຕຳພວກປະທ້ວງຕ້ານສະຫະລັດ ຢູ່ນອກສະຖານທູດສະຫະ ລັດໃນນະຄອນຫຼວງມານິລາ ໃນວັນພຸດມື້ນີ້ ເຮັດໃຫ້ຫລາຍຄົນໄດ້ຮັບບາດເຈັບ.
ພວກປະທ້ວງປະມານ 1000 ຄົນ ໄດ້ເຕົ້າໂຮມກັນຢູ່ຕໍ່ໜ້າສະຖານທູດ ຮຽກຮ້ອງໃຫ້ສິ້ນສຸດການມີໜ້າຂອງທະຫານສະຫະລັດຢູ່ໃນຟິລິບປິນ. ຕຳຫລວດໄດ້ຍິງແກັສນໍ້າຕາ ແລະໃຊ້ປືນນໍ້າຂັບໄຫລ່ຝູງຊົນໃຫ້ໜີໄປ.
ຮູບຢູ່ໃນໂທລະພາບສະແດງໃຫ້ເຫັນວ່າພວກປະທ້ວງພາກັນອ້ອມລົດຕູ້ຕຳຫລວດ ແລະທຸບຕີດ້ວຍໄມ້ຄ້ອນ ກ່ອນຄົນຂັບລົດຈະເລີ້ມແລ່ນຕຳພວກປະທ້ວງຊໍ້າແລ້ວຊໍ້າອີກ.
ນຶ່ງໃນບັນດາຜູ້ນຳປະທ້ວງ ທ້າວ Renato Reyes ກ່າວວ່າ ຢ່າງໜ້ອຍຜູ້ປະທ້ວງສາມຄົນໄດ້ເຂົ້າໂຮງໝໍ ຫລັງຈາກໄດ້ຖືກລົດຕູ້ຕຳຫລວດແລ່ນຕຳ.
ພວກປະທ້ວງຫລາຍສິບຄົນໄດ້ຖືກຈັບລະຫວ່າງການຂະບວນ ຫລັງຈາກເຂົາເຈົ້າໄດ້ແກວ່ງນໍ້າສີແດງໃສ່ພວກເຈົ້າໜ້າທີ່ຕຳຫລວດ.
ໃນບໍ່ເທົ່າໃດອາທິດທີ່ຜ່ານມານີ້ ປະທານາທິບໍດີຟິລິບປີນ ທ່ານ Rodrigo Duterte ໄດ້ເພີ້ິມການຮຽກຮ້ອງບໍ່ໃຫ້ນະໂຍບາຍຕ່າງປະເທດ ປະສານງານກັບສະຫະລັດ ແລະໄດ້ໂຈມຕີ ປະທານາທິບໍດີ Barack Obama ທາງສ່ວນຕົວ ໂດຍຮ້ອງທ່ານວ່າ “ເປັນລູກແມ່ຈ້າງ.”
