ຜູ້ປົກຄອງລັດ Missouri ໃນພາກກາງສະຫະລັດ ໄດ້ສົ່ງທະຫານ
National Guards ຫຼື ໜ່ວຍພິທັກຊາດ ໄປຍັງເມືອງ Fergu
son ຫຼັງຈາກເກີດການປະທ້ວງຊຶ່ງບາງຄັ້ງຮຸນແຮງມາເປັນເວລາ
ນຶ່ງສັບປະດາ ສືບເນື່ອງມາຈາກຕຳຫຼວດຜິວຂາວຄົນນຶ່ງ ຍິງໄວ
ລຸ່ນຜິວດຳທີ່ບໍ່ມີອາວຸດຕິດໂຕຄົນນຶ່ງ ເສຍຊີວິດໄປ.
ທ່ານ Jay Dixon ໄດ້ອະນຸຍາດໃຫ້ສົ່ງໜ່ວຍພິທັກຊາດໄປ ໃນ
ເຊົ້າວັນຈັນມື້ນີ້ ຫຼັງຈາກເກີດການປະທະກັນຮອບໃໝ່ຫຼາຍບັ້ນ
ລະຫວ່າງຕຳຫຼວດແລະພວກປະທ້ວງໃນເມືອງ Ferguson.
ໃນແລງວັນອາທິດວານນີ້ ພວກຕຳຫຼວດຕິດອາວຸດໃສ່ຊຸດປ້ອງກັນແກສ ທີ່ສະໜັບສະໜຸນ
ໂດຍລົດຫຸ້ມເກາະ ໄດ້ໃຊ້ແກສນ້ຳຕາ ເພື່ອພະຍາຍາມຂັບໄລ່ພວກປະຊາຊົນທີ່ກໍ່ຄວາມວຸ້ນວາຍຈຸນຶ່ງ ທີ່ໄດ້ພະຍາຍາມຍ່າງເຂົ້າໄປຫາພວກເຂົາເຈົ້າ. ຕຳຫຼວດກ່າວວ່າ ພວກປະທ້ວງບາງຄົນທີ່ປະກອບສ່ວນໃນອັນທີ່ປາກົດວ່າ ເປັນການປະທ້ວງທີ່ສັນຕິ ນັ້ນ ໄດ້ພະ
ຍາຍາມຈະເຂົ້າໄປໃກ້ປ້ອມບັນຊາການຂອງໜ່ວຍຮັກສາຄວາມປອດໄພແຫ່ງນຶ່ງ.
ຮ້ອຍເອກ Ron Johnson ເຈົ້າໜ້າທີ່ຕຳຫລວດ ກ່າວວ່າ ພວກປະທ້ວງພາກັນແກວ່ງ
“ລະເບີດໄຟ” ແລະຍິງປືນຂຶ້ນ ພ້ອມທັງລັກຂະໂມຍ ສິ່ງຂອງຈາກຮ້ານຄ້າ ແລະທຳການທຳລາຍຢ່າງປ່າເຖື່ອນ ແລະວ່າ ພວກປະທ້ວງໄດ້ຍິງໃສ່ຕຳຫຼວດ ແຕໍ່ບໍ່ມີຜູ້ໃດໄດ້ຮັບ
ບາດເຈັບ.
ພາບການກໍ່ຈະລາຈົນ ທີ່ເມືອງ Ferguson
ທ່ານ Johnson ບັນລະຍາຍຄວາມຮຸນແຮງດັ່ງກ່າວວ່າ “ເປັນພຶດຕິກຳ ທາງອາຍາທີ່
ມີການຄິດລ່ວງໜ້າໄວ້ກ່ອນ” ທີ່ມີວັດຖຸປະສົງເພື່ອສ້າງ ຄວາມເສຍຫາຍໃຫ້ແກ່ຊັບສິນ ສ້າງຄວາມເຈັບປວດໃຫ້ແກ່ຜູ້ຄົນ ແລະເກາະຜິດເພື່ອໃຫ້ມີການຕອບໂຕ້. ທ່ານກ່າວຕໍ່ໄປວ່າ ຕຳຫຼວດຈຳເປັນຕ້ອງຕອບໂຕ້ເພື່ອປ້ອງກັນຊີວິດຜູ້ຄົນ ແລະຊັບສິນ. ມີຫຼາຍຄົນຖືກ
ຈັບ.
ພວກປະທ້ວງໄດ້ປະຕິເສດຢ່າງໂມໂຫ ຕໍ່ລາຍງານຂ່າວທີ່ວ່າມີການກໍ່ຄວາມຮຸນແຮງ ກ່ອນຕຳຫຼວດຈະຍິງແກສນ້ຳຕາໃສ່ພວກຕົນນັ້ນ.
ຄວາມຮຸນແຮງດັ່ງກ່າວເກີດຂຶ້ນ ຫຼາຍຊົ່ວໂມງກ່ອນການປະກາດຫ້າມສັນຈອນໄປມາໃນຍາມກາງຄືນ ເລີ້ມມີຜົນບັງຄັບໃຊ້ເປັນຄືນທີສອງລຽນຕິດ. ການຫ້ານອອກນອກບ້ານໃນຍາມກາງຄືນ ມີຜົນບັງຄັບໃຊ້ຕັ້ງແຕ່ທ່ຽງຄືນໄປ ຕາມເວລາໃນທ້ອງຖິ່ນ ຈົນຮອດເວລາ 5:00 ໂມງເຊົ້າ.
