ພວກຫົວແບ່ງແຍກດິນແດນ ນິຍົມລັດເຊຍ ໃນຢູເຄຣນ
ກ່າວວ່າພວກຕົນພ້ອມແລ້ວ ທີ່ຈະຢຸດຍິງກັບລັດຖະບານ
ຢູເຄຣນ ໃນທ່າມກາງການບຸກຄືບໜ້າ ແລະ ຍຶດໄດ້ພື້ນທີ່
ຄືນຫລາຍຂຶ້ນ ຂອງກຳລັງຢູເຄຣນ.
ລັດຖະບານ Kyiv ຍັງບໍ່ທັນໄດ້ຕອບຂໍ້ສະເໜີຂອງພວກ
ກະບົດ. ແຕ່ລັດຖະບານໄດ້ກ່າວວ່າ ຕົນສາມາດຕົກລົງ
ຢຸດຍິງໄດ້ ຖ້າພວກແບ່ງແຍກດິນແດນ ສະຫຼະອາວຸດ
ຂອງພວກເຂົາ.
ກອງທັບຢູເຄຣນ ຍັງສືບຕໍ່ບີບຮັດ ກອງກຳລັງຂອງພວກແບ່ງ
ແຍກດິນແດນຢູ່ໃນເມືອງ Donetsk ແລະ Luhansk ອັນເປັນພຽງສອງທີ່ໝັ້ນ ທີ່ຍັງເຫຼືອຢູ່
ຂອງພວກເຂົາ.
ສະພາບການໃນເມືອງ Donetsk ໄດ້ເຊື່ອມໂຊມລົງ ຊຶ່ງໄດ້ເຮັດໃຫ້ມີຄວາມເປັນຫ່ວງວ່າ
ຈະເກີດວິກິດການ ດ້ານມະນຸດສະທຳ ໃນເມືອງດັ່ງກ່າວ. ເຈົ້າໜ້າທີ່ຂັ້ນສູງຂອງລັດຖະ
ບານຢູເຄຣນ ກ່າວວ່າ ກອງກຳລັງຣັດເຊຍຢາກເຂົ້າໄປຢູເຄຣນ ພາຍໃຕ້ຂໍ້ອ້າງຂອງການ
ປະຕິບັດ ພາລະກິດດ້ານມະນຸດສະທຳ ແຕ່ຢູເຄຣນໄດ້ຂັດຂວາງການເຄື່ອນໄຫວດັ່ງກ່າວ.
ບັນດາເຈົ້າໜ້າທີ່ຣັດເຊຍໄດ້ປະຕິເສດ ຕໍ່ເລື້ອງນີ້.
ຍັງມີການສູ້ລົບກັນຢູ່ ໃນເຂດເມືອງ Donetsk
ໃນວັນເສົາວານນີ້ເຊັ່ນກັນ ຮອງປະທານາທິບໍດີສະຫະລັດ ທ່ານ Joe Biden ໄດ້ປຶກສາ
ຫາລືສະຖານະການ ໃນພາກຕາເວັນອອກຂອງຢູເຄຣນ ກັບ ປະທານາທິບໍດີຢູເຄຣນ
ທ່ານ Petro Poroshenko ໂດຍທາງໂທລະສັບ. ຄຳຖະແຫລງສະບັບນຶ່ງຂອງ ທຳນຽບ
ຂາວກ່າວວ່າ ທັງສອງທ່ານໄດ້ເນັ້ນວ່າ ການກະທຳໃດໆ ຂອງຣັດເຊຍ ແມ່ນແຕ່ການກະ
ທຳ “ທີ່ອ້າງວ່າເພື່ອວັດຖຸປະສົງດ້ານມະນຸດສະທຳ” ກໍຕາມ ແມ່ນຈະຖືວ່າເປັນການ
ລະເມີດກົດໝາຍສາກົນ ແລະ ເປັນທີ່ຮັບເອົາບໍ່ໄດ້ ຖ້າບໍ່ໄດ້ຮັບການຍິນຍອມ ແລະ
ອະນຸຍາດຈາກ Kyiv.
ອີງຕາມຄຳຖະແຫລງນັ້ນ ທ່ານ Poroshenko ໄດ້ເວົ້າຕື່ມວ່າ ທ່ານກຳລັງທຳການຕິດຕໍ່
ກັບອົງການສະພາກາແດງ ກ່ຽວກັບການແຈກຢາຍ ການຊ່ວຍເຫຼືອດ້ານມະນຸດສະທຳ
ລວມທັງການຊ່ວຍເຫຼືອຈາກສະຫະລັດ ໃນພາກຕາເວັນອອກຂອງຢູເຄຣນນັ້ນ.
ທຳນຽບຂາວກ່າວວ່າ ທັງສອງທ່ານ ຍັງໄດ້ເຫັນພ້ອມນຳກັນວ່າ ຖ້າຣັດເຊຍຢາກປັບປຸງ
ສະພາບການດ້ານມະນຸດສະທຳ ໃນພາກຕາເວັນອອກຂອງຢູເຄຣນນັ້ນ ຣັດເຊບກໍຕ້ອງ
ຢຸດຕິການຍິງປືນໃຫຍ່ໃສ່ທະຫານຢູເຄຣນ ປ່ອຍພວກຢູເຄຣນ ທີ່ຖືກຈັບເປັນຕົວປະກັນ
ຢູ່ໃນຣັດເຊຍ ແລະ ຢຸດໃຫ້ການສະໜັບສະໜຸນ ພວກແບ່ງແຍກດິນແດນນິຍົມຣັດເຊຍ.
