ສຣີລັງກາພວມປະເຊີນກັບວິກິດການທາງດ້ານລັດຖະທຳມະນູນ.
ປະທານາທິບໍດີໄມທຣີພາລາ ສິຣິເສນາ ໄດ້ສັ່ງໂຈະການປະຕິບັດງານຂອງສະພາແຫ່ງຊາດ ໃນວັນເສົາມື້ນີ້ ໄປຈົນຮອດວັນທີ 16 ພະຈິກ.
ໃນວັນສຸກວານນີ້ ທ່ານໄດ້ສັ່ງປົດ ນາຍົກລັດຖະມົນຕີ ຣານິລ ວິກເຣເມສິງເຫ ແລະຍຸບຄະນະລັດຖະບານຂອງທ່ານ.
ຄະນະລັດຖະບານຂອງທ່ານວິກເຣເມສິງເຫ ກ່າວວ່າ ການເຄື່ອນໄຫວໃນວັນສຸກວານນີ້ ແມ່ນເທົ່າກັບເປັນການກໍ່ລັດຖະປະຫານ.
ແຕ່ແນວໃດກໍຕາມ ທ່ານວິກເຣເມສິງເຫ ໃນວັນເສົາມື້ນີ້ ຍັງຢູ່ທີ່ບ້ານພັກ Temple Trees ຊຶ່ງເປັນບ້ານພັກຢ່າງເປັນທາງການຂອງນາຍົກລັດຖະມົນຕີ. ທ່ານກ່າວວ່າ ທ່ານມີສຽງສ່ວນຫຼາຍສະໜັບສະໜຸນທ່ານຢູ່ໃນສະພາແລະກໍບໍ່ມີຄວາມຕັ້ງໃຈທີ່ຈະລາອອກຈາກຕຳແໜ່ງ. ທ່ານເວົ້າວ່າ “ຂ້າພະເຈົ້າມີສຽງສ່ວນຫຼາຍສະໜັບສະໜຸນ ຂ້າພະເຈົ້າຍັງຈະເຮັດໜ້າທີ່ ໃນຖານະນາຍົກລັດຖະມົນຕີ. ຂ້າພະເຈົ້າຈະເປັນນາຍົກລັດຖະມົນຕີຕໍ່ໄປ.”
ທ່ານເຈຮານ ເພເຣຣາ ຜູ້ອຳນວຍການບໍລິຫານຂອງສະພາສັນຕິພາບສຣີລັງກາ ຊຶ່ງເປັນອົງການຈັດຕັ້ງທີ່ບໍ່ສັງກັດພັກ ກ່າວຕໍ່ອົງການຂ່າວເອພີວ່າ “ສິ່ງທີ່ປະທານາທິບໍດີຄວນກະທຳໃນເວລານີ້ ແມ່ນຮຽກປະຊຸມສະພາໃນທັນທີ ແລະກໍລົງຄະແນນສຽງ. ນັ້ນແມ່ນແນວທາງປະຊາທິປະໄຕ ເພື່ອແກ້ໄຂວິກິດການ.”
ກະຊວງການຕ່າງປະເທດສະຫະລັດ ຮຽກຮ້ອງໃຫ້ທັງສອງຝ່າຍ “ປະຕິບັດຕາມລັດຖະທຳມະນູນຂອງສຣີລັງກາ ລະເວັ້ນຈາກການໃຊ້ຄວາມຮຸນແຮງ ແລະປະຕິບັດຕາມຂັ້ນຕອນທາງກົດໝາຍ.”
