ປະທານາທິບໍດີສະຫະລັດ ທ່ານບາຣັກ ໂອບາມາ ຈະກ່າວຄຳປາໄສ ທີ່ນະຄອນ Dallas ລັດ Texas ໃນພິທີໄວ້ອາໄລ ໃຫ້ແກ່ຕຳຫຼວດ 5 ທ່ານ ທີ່ໄດ້ຖືກຍິງສັງຫານ ໃນສັບປະດາແລ້ວນີ້ ໃນລະຫວ່າງທີ່ມີການເດີນຂະບວນປະທ້ວງຢູ່ນັ້ນ.
ຄັ້ງນີ້ ຈະເປັນຄັ້ງທີ 11 ໃນການຖະແຫຼງແບບນີ້ ລະຫວ່າງທີ່ທ່ານເປັນປະທານາທິບໍດີ ຕໍ່ປະຊາຄົມໃນເຂດທ້ອງຖິ່ນ ຫຼັງຈາກທີ່ໄດ້ມີການຍິງສັງຫານໜູ່ເກີດຂຶ້ນ.
ເຂົ້າຮ່ວມໃນພິທີດັ່ງກ່າວ ກໍມີຮອງປະທານາທິບໍດີ Joe Biden ພ້ອມທັບອະດີດປະທານາ ທິບໍດີ ທ່ານ George W. Bush. ໂຄສົກທຳນຽບຂາວທ່ານ Josh Earnest ໄດ້ກ່າວວ່າ ທ່ານໂອບາມາ ຕ້ອງການທີ່ຈະເປັນກຳລັງໃຈໃຫ້ແກ່ປະຊາຊົນທົ່ວປະເທດ ຫຼັງຈາກມີການໂຈມຕີທີ່ນະຄອນ Dallas ແລະການສັງຫານຜູ້ຊາຍຊາວເມຣິກັນເຊື້ອສາຍອາຟຣິກາ ໂດຍ ຕຳຫຼວດ ທີ່ຍັງຜົນໃຫ້ມີການປະທ້ວງທີ່ຂະຫຍາຍວົງກວ້າງອອກໄປໃນຫຼາຍຫົວເມືອງທົ່ວປະເທດ.
“ປະທານາທິບໍດີຮັບຮູ້ແລ້ວວ່າ ນີ້ບໍ່ແມ່ນສຳຫຼັບແຕ່ປະຊາຄົມໃນນະຄອນ Dallas ເທົ່ານັ້ນ ທີ່ເສົ້າໂສກສະຫຼົດໃຈແຕ່ວ່າຜູ້ຄົນໃນທົ່ວປະເທດ ທີ່ເປັນຫວ່ງເປັນໃຍ ຕໍ່ຄວາມຮຸນແຮງທີ່ຊາວອາເມຣິກັນໄດ້ຮູ້ເຫັນເປັນພິຍານນຳ ໃນສັບປະດາທີ່ຜ່ານມາ” ຊຶ່ງທ່ານ Earnest ໄດ້ກ່າວໄວ້ ແລະ “ຄວາມຈິງ ກໍຄືວ່າ ຄວາມຮຸນແຮງທີ່ພວກເຮົາໄດ້ພົບເຫັນນັ້ນ ບໍ່ແມ່ນພຽງແຕ່ໄດ້ເກີດຂຶ້ນຂໃນສັບປະດາແລ້ວນີ້ ແຕ່ວ່າມັນໄດ້ເກີດຂຶ້ນເລື້ອຍໆ ໃນໄລຍະຫຼາຍໆປີທີ່ຜ່ານມານີ້.”
ທ່ານ Earnest ໄດ້ກ່າວວ່າ ທ່ານໂອບາມາ ຈະເຂົ້າຮ່ວມກອງປະຊຸມ ໃນວັນພຸດມື້ອື່ນນີ້ ທີ່ທຳນຽບຂາວ ກັບບັນດາເຈົ້າໜ້າທີ່ ພວກນັກເຄື່ີອນໄຫວ ພວກນັກວິຊາການແລະພວກຜູ້ນຳສິດທິພົນລະເຮືອນ ທີ່ພະຍາຍາມຈັດໃຫ້ມີການໂອລົມສົນທະນາເຖິງການຫາທາງອອກທີ່ດີ ຕໍ່ການບໍ່ເຂົ້າໃຈກັນ ລະຫວ່າງຕຳຫຼວດແລະປະຊາຊົນ ຢູ່ໃນຫຼາຍໆປະຊາຄົມ.
ກ່ອນພິທີໄວ້ອາໄລນັ້ນ ໄດ້ມີຜູ້ຄົນຈຳນວນຫຼາຍກວ່າພັນຄົນ ພາກັນເຂົ້າຮ່ວມການຈູດທູບທຽນໄວ້ອາໄລຝຫ້ພວກທີ່ເສຍຊີວິດໄປ ໃນວັນຈັນວານນີ້ ທີ່ນະຄອນ Dallas ບ່ອນທີ່ຜູ້ບັນ ຊາການຕຳຫຼວດ ທ່ານ David Brown ຍົກຍ້ອງດ້ວຍການປຽບທຽບຕຳຫຼວດໃຫ້ເປັນວິລະ ບຸລຸດທີ່ເກັ່ງກ້າສາມາດນັ້ນ.
ອ່ານຂ່າວນີ້ເພີ້ມຕື່ມເປັນພາສາອັງກິດ
